Amakuru yahereye ejo acicikana avuga ko abasirikare bayobowe n’ushinzwe kurinda umukuru w’igihugu bafungiye mu rugo Perezida wa Niger, Mohamed Bazoum, ariko bikaba byari bitaremezwa neza niba yaba ari ‘’kudeta’’ cyangwa niba ari ikindi. Ubu byamaze kwemezwa, itsinda ry’abasirikare bahiritse ubutegetsi ryamaze kubitangaza kuri televiziyo y’igihugu ko bakuyeho ubutegetsi bwari buriho.
Amakuru dukesha Ibiro ntaramakuru by’Abongereza, BBC, avuga ko abasirikare bo muri Niger muri Afurika y’uburengerazuba batangaje kuri televiziyo y’igihugu ko bahiritse ubutegetsi. Bavuze ko basheshe Itegekonshinga, bahagaritse inzego zose ndetse bafunze imipaka y’igihugu.
Ejo ku wa gatatu, Perezida wa Niger, Mohamed Bazoum yari yafunzwe n’abasirikare bo mu mutwe umurinda. Nyuma y’aya makuru, mu kiganiro yagiranye kuri telefone na Minisitiri w’ububanyi n’amahanga w’Amerika Antony Blinken, Amerika yamusezeranyije “ubufasha budatezuka”.
Umunyamabanga mukuru w’Umuryango w’Abibumbye, António Guterres na we yavuze ko yavuganye na Perezida Bazoum ndetse amusezeranya ubufasha bwuzuye bwa Loni.
Bazoum ni inshuti ikomeye y’ibihugu byo mu burengerazuba (Amerika n’u Burayi) mu rugamba rwo kurwanya intagondwa ziyitirira idini rya Islam muri Afurika y’uburengerazuba. Mu myaka ishize, ibihugu bibiri by’ibituranyi bya Niger, ari byo Mali na Burkina Faso, byabayemo ihirikwa ry’ubutegetsi, intandaro iba kuba ababuhiritse muri ibyo bihugu barashinje ubutegetsi kunanirwa guhashya intagondwa.
Muri ibyo bihugu byombi, Mali na Burkinafaso, abategetsi bashya ba gisirikare bacanye umubano n’u Bufaransa bwahoze bubikoloniza, ari na bwo bwahoze bukoloniza Niger.
Abasirikare bahiritse ubutegetsi muri Niger (Ifoto: Interineti)
Mu itangazo ryanyuze kuri televiziyo y’igihugu, ku wa gatatu tariki ya 26 Nyakanga 2023, Koloneli Majoro (Col Maj) Amadou Abdramane, ari kumwe n’abandi basirikare icyenda bambaye gisirikare bamuri inyuma, yagize ati “Twebwe, abasirikare n’abashinzwe umutekano, twafashe icyemezo cyo gushyira iherezo ku butegetsi. Ibi bikurikiye gukomeza kuzahara kw’umutekano, ndetse n’ubukungu buhagaze nabi n’imiyoborere mibi“.
Yanavuze ko inzego zose za leta zahagaritswe kandi ko abakuriye za minisiteri bazita ku mikorere ya buri munsi. Yakomeje agira ati “Abafatanyabikorwa bo hanze bose basabwe kutivanga. Imipaka yo ku butaka no mu kirere irafunze kugeza ibintu bisubiye mu buryo“.
Yongeyeho ko hashyizweho umukwabu wa nijoro (igihe abaturage basabwe kuba bari mu ngo) guhera saa yine z’ijoro (22:00) ku isaha yaho kugeza saa kumi n’imwe za mu gitondo (5:00), kugeza igihe hazatangwa andi mabwiriza.
Col Maj Abdramane yavuze ko abasirikare barimo kubikora mu izina ry’Inama Nkuru yo kurinda Igihugu-Conseil National pour la Sauvegarde de la Patrie (CNSP).
Abashyigikiye Perezida Bazoum i Niamey (Ifoto: Interineti)
Nyuma y’itangazo ry’abo basirikare kuri televiziyo, Minisitiri Blinken yasabye ko Perezida Bazoum arekurwa. Mu kiganiro n’abanyamakuru muri New Zealand (Nouvelle-Zélande), Blinken yavuze ko “ikiboneka neza ni uko ari umuhate wo gufata ubutegetsi ku ngufu no guhungabanya itegekonshinga“.
Muri Mali ituranye na Niger, abacanshuro b’Abarusiya bafite intwaro nyinshi bo mu itsinda Wagner, barimo gufasha ubutegetsi bwaho kurwanya intagondwa ziyitirira Islam. Imvururu muri Niger ziyongereye ku mpungenge zisanzweho z’uburengerazuba ku bikorwa bya Wagner no ku mutekano mucye mu karere ka Sahel.
Umuryango w’ubukungu w’ibihugu byo muri Afurika y’uburengerazuba (CEDEAO/ECOWAS) wavuze ko “wamaganye igerageza ryo gufata ubutegetsi ku ngufu“. Mu izina rya CEDEAO, Perezida wa Bénin Patrice Talon yageze mu murwa mukuru Niamey wa Niger mu butumwa bw’ubuhuza.
Talon yavuze ko “uburyo bwose” buzakoreshwa, nibiba ngombwa, mu gusubizaho iyubahirizwa ry’itegekonshinga, “ariko icyifuzwa ni uko buri kintu cyose gikorwa mu mahoro no mu bwumvikane“.
Imbaga y’abantu yiraye mu mihanda y’i Niamey mu gushyigikira Bazoum. Umunyamakuru wa BBC na we yabonye abasirikare bafite intwaro nyinshi bashyigikiye Perezida bari mu bice bikikije radiyo na televiziyo by’igihugu.
Uwo mujyi ahanini urimo amahoro, nubwo abasirikare bari inyuma y’iri gerageza ryo guhirika ubutegetsi barashe amasasu yo gutatanya abigaragambya.
Niger irimo guhangana n’intagondwa ziri mu bice bibiri – zimwe mu majyepfo ashyira uburengerazuba, zahageze zivuye muri Mali mu 2015, n’izindi ntagondwa ziri mu majyepfo ashyira uburasirazuba, zirimo n’izifite icyicaro mu majyaruguru ashyira uburasirazuba bwa Nigeria. Imitwe y’intagondwa, ikorana n’imitwe ya al-Qaeda n’umutwe wiyita Leta ya Kisilamu, ikorera muri Niger.
Perezida Bazoum, w’imyaka 63, watowe binyuze muri demokarasi mu mwaka wa 2021, akaba ari inshuti ikomeye y’u Bufaransa, n’ibindi bihugu byo mu burengerazuba.
Niger yabayemo guhirika ubutegetsi inshuro enye kuva yabona ubwigenge mu 1960 yigobotoye ubukoloni bw’u Bufaransa, ndetse yabayeho amagerageza menshi yo guhirika ubutegetsi.
HIGIRO Adolphe
