Nkunduwimye Emmanuel uzwi ku kazina ka Bomboko yakatiwe igifungo cy’imyaka 25 n’Urukiko rwa rubanda ruherereye i Buruseli mu Bubiligi. Ni mu rubanza rwasomwe uyu munsi tariki ya 10 Kamena 2024, nyuma yo kumuhamya ibyaha bya jenoside n’iby’intambara.
Nkunduwimye wari umaze amezi 2 aburanira mu Bubiligi, ni ho atuye. Ibyaha yashinjwaga ni ibyakorewe mu mujyi wa Kigali, by’umwihariko mu igaraji rya AMGAR yari afite mu murenge wa Gitega. Aha yari ahafite igaraje.
Abatangabuhamya babwiye urukiko ko Bomboko yagize uruhare mu bwicanyi bwakorewe mu Gakinjiro, akaba kandi yarafatanyije na bamwe mu bari abayobozi b’Interahamwe barimo Robert Kajuga wari Perezida w’uyu mutwe na Rutaganda George wari Visi-Perezida wawo.
Urukiko rwa rubanda rw’i Buruseli, tariki ya 7 Kamena 2024, rwamuhamije ibi byaha byose nyuma y’umwiherero w’abacamanza. Ni nyuma yo gusuzuma ibimenyetso n’ubuhamya byatanzwe n’uruhande rw’ushinjwa n’urushinja.
Kugeza urubanza rusomwa, Nkunduwimye yahakanaga ko nta ruhare yigeze agira mu bwicanyi bwakorewe muri Kigali cyangwa ngo agire uwo asambanya ku gahato, ahubwo ngo hari abo yafashije guhunga.
Muri urubanza hatanzwe ubuhamya bw’abagera kuri 90, rukaba rwaratangiye tariki ya 8 Mata 2024 rusozwa tariki ya 10 kamena 2024. Mu batanze ubuhamya harimo abatangabuhamya biboneye ibyabaye, n’inzobere mu buzima bwo mu mutwe, abazi imyitwarire ya Nkunduwimye n’inzobere mu mateka.
