Musengeyezu Mediatrice niwe mugore washakanye na Muhayimana Claude , bashakanye mu 1991, kuri uyu wakabiri tariki ya 7 Ukuboza 2021 yatanze ubuhamya mu rubanza rurimo kubera i Paris mu Bufaransa, kubyo azi ku mugabo we kuri ubu urimo kuburanishwa ku byaha akekwaho.
Uyu mugore yavuze ko yamenyanye na Muhayimana Claude mu 1987, maze baza kubana mu 1991. Abajijwe n’urukiko niba hari ubwo Muhayimana yigeze agira ibibazo nko kumufunga bamwita icyitso cy’inkotanyi ,yasubije ko kuva yamumenya atigeze afungwa.
Urukiko rwongeye kumubaza niba hari icyo azi ku muryango wa Claude , niba bari abahutu cyangwa abatutsi , niba barihanganiraga abantu bose. Uyu mugore yavuze ko nyina wa Claude yari afite ubumuntu.
Icyakora ngo nubwo atamubajije ubwoko bw’ababyeyi be, avuga ko nyina wa Muhayimana yari umuhutu , mushiki we witwa Gaudence Mujawimana yanze kubatahira ubukwe, kuko ngo yashatse umututsikazi.
Muhayimana mu gihe cya Jenoside
Claude Muhayimana yakoraga muri Guest House yari iya ORTPN aho yari umushoferi atwara imodoka itukura. Urukiko rwamubajije niba yarakomeje akazi ke , yasubije ko hari igihe babujije abantu gukomeza gukora ariko abo mu mahoteli barakomeza barakora.
Umucamanza yongeye kumubaza niba Muhayimana yaragiye mu Ruhengeri yavayo akarwara, ntiyongere kuva mu rugo, maze asubiza agira ati “Mu Ruhengeri byo ndabizi yagiyeyo ngo ajyanye umurambo w’umujandarume waguyeyo”.
Urukiko rwakomeje kumubaza niba yaratwaye abantu i Karongi ,ati “simbizi kuko inzira ijyayo ntica aho twari dutuye”. Umucamanza ati “ Waba uzi igihe yamaze mu Ruhengeri ? Asubiza agira ati” Yamaze nk’icyumweru”. Umucamanza ati”Yamaze icyumweru cyangwa iminsi”? mu gusubiza ati “Icyumweru kuko yagiye hari Abatutsi bakiri mu ngo zabo, ariko hari abamaze kugera muri stade,abantu bo ku kiliziya no kuri stade babishe Claude ataragaruka “.
Umucamanza yongeye kumubaza amatariki ibi byabereyeho , maze aramusubiza ati “ Ndirinda kuvuga amatariki kuko ntayibuka,kuko imbere yanjye haguye abantu barenga ibihumbi icumi, bari muri stade bavanze n’amatungo . Kandi ababicaga babatera grenade banabarasa bari bahagaze mu busitani bwacu(jardin), babishe bamaze nk’icyumweru muri stade”.
Musengeyezu Mediatrice washakanye na Muhayimana Claude, nawe ubu aba mu Gihugu cy’u Bufaransa, icyakora bakaba bari baratandukanye , kuko uyu mugore yamaze gushaka undi mugabo.
Muhayimana Claude ni umunyarwanda ufite ubwenegihugu bw’ubufaransa arimo kuburanishwa n’ubutabera bw’u Bufaransa, kuva ku itariki 21 Ugushyingo 2021 , biteganyijwe ko ruzasozwa tariki ya 17Ukuboza 2021.
UWAMBAYINEMA Marie Jeanne
