Yashyizweho kuri 10 December, 2017 | 15:45

Yahagarikiwe ubufasha kuko yanze kongera kuryamana n’uwamuteye inda

Mu mudugudu wa Kabyaza mu karere ka Nyabihu, abana 7 mu ngo 200 batewe inda, barimo Uwineza( izina yahawe), wabyaye afite imyaka 14. Imiryango yamwunze n’umufundi wayimuteye, amugenera ubufasha bw’amafaranga ibihumbi bitatu mu kwezi, ariko buza guhagarara nyuma y’umwaka kuko yanze kongera kuryamana na se w’umwana.

Uwineza ubu afite umwana w’imyaka itatu, nyina umubyara yamusabye kudahirahira avuga ibyabaye. Yahise ahagarika kwiga, iwabo bamubujije kuvuga ndetse ubu yaratereranywe arirwariza muri byose, nyina n’abavandimwe be ntawe umufasha.
Abandi bana b’abakobwa 7 mu mudugudu, bahuye n’ihohoterwa nk’irye baterwa inda ariko biracecekwa. Uwineza abayeho nabi, nyina n’abavandimwe be ntawe umureba. Uwineza avuga uko byamugendekeye, ati" Byatangiye Marume ambwira ko azamfata, nigaga mu mwaka wa gatandatu w’amashuri abanza, byarashyize arabikora, amaze kumfata mbibwira mu rugo maze barambwira ngo niba byarabaye nceceke ntabwo bakwiyandagaza nindeke azamfasha."

Ikibazo cya Uwineza, cyakomeye kurushaho ubwo uyu nyirarume wagiye wamuhaga udufaranga ibihumbi bibiri, igihumbi, Magana atanu se ( y’u Rwanda) yaje gushaka ku mutera indi nda ubwo uwo babyaranye yari agize umwaka n’igice, ngo yaramubwiye ngo umwana arakuze naze bongere amubyaze undi mwana.Uwineza yanze ngo nawe yahise ahagarika ubufasha yamuhaga atangira guhangayika kuko na nyina babana yari amaze kumubwira ko agomba kwimenya, ko ibibazo bye bimureba.

Kanyaburingo Faustin, Umukuru w’umudugudu wa Kabyaza, umurenge wa Mukamira, mu karere ka Nyabihu, avuga ko ko uyu mwana hamwe n’abandi barindwi batewe inda ari bato, ko ari ikibazo gikomeye, gusa avuga ko bane aribo baziterewe muri uyu mudugudu abandi ngo baziterewe hanze yawo.Ku cyakozwe ngo bene gukora aya mahano bakurikiranwe, mudugudu avuga ko ntacyo, ariko ko ngo ubuyobozi bw’akagari ikibazo burakizi, gusa ngo basabye abanyabuzima gufasha aba bana, kubasura no gusaba ibigo nderabuzima kubabonera inkunga z’abana zirimo amata ya Shisha kibondo. Kugeza ubu mudugudu atangaza ko nta nta kindi kirakorerwa aba bana ariko ko babirimo.
Uwineza, niwe wavuzwe cyane muri iyi nkuru ariko muri uyu mudugudu harimo abandi bana b’abakobwa bakorewe ihohoterwa ryo guterwa inda bakiri bato, bari munsi y’imyaka 18 y’amavuko.

Si urw’umwe

Muri uyu mudugudu wa Kabyaza, harimo undi mwana w’umukobwa uhetse umwana w’amezi umunani. Iwabo bahoze batuye I Gisenyi, bahava bajya ku Cyanika, nyuma batura Nteranya, none ubu bari Kabyaza ya Mukamira.
Uku kwimuka kwa hato na hato kwatumye atabasha kwiga, kuko uko yamaraga igihembwe bahitaga bava aho yigaga bakajya ahandi. Avuga ko yatewe inda n’umumotari ukorera I Gisenyi witwa Rafiki Nshutiraguma, utagira icyo afasha umwana na nyina.
Uyu mwana uhetse undi, afite imyaka 15, ntacyo akora yirirwa atembereza urubyaro rwe mu mugongo. Nyina nawe ngo atunzwe n’ibiraka. Avuga ko atabyihereranye, akagira ati, “akimara kuyintera nabivuze mu muryango w’iwabo yandika urupapuro yemera ko umwana ari uwe, kandi ko azajya amufasha umwana.Uyu mwangavu ngo ntiyigeze abimenyesha ubuyobozi, ngo kuko abaturanyi be bamubwiye ko azaba ata igihe, kandi ko bisaba amafaranga menshi. Ati, “barambwiye ngo ubwo afite amafaranga azatanga ruswa mu buyobozi bimfire ubusa”.

Minisiteri y’Uburinganire n’Iterambere ry’Umuryango(Migeprof), yatangaje ko mu 2016, abana b’abakobwa bari hagati y’imyaka 16-19 bagera ku 17500 batewe inda zitateguwe ndetse binabagiraho ingaruka zitandukanye zirimo no kuva mu ishuri. Byumvikane ko ushyizeho abari munsi y’iyo myaka nk’abo twavuze haruguru, abazikurirwamo, n’abandi batamenywa uyu mubare uri hejuru cyane.

Bazubagira Djalia


Tanga igitecyerezo

Who are you?