Yashyizweho kuri 3 October, 2019 | 07:22

Twara urumuri: Ubutumwa bwahawe urubyiruko mu kwizihiza umunsi mpuzamahanga w’amahoro

Gutwara urumuri rumurikira abandi. Ngiyo insanganyamatsiko urubyiruko rwahawe kugira ngo rurenge amateka mabi yaranze u Rwanda rube umucyo w’abariho n’abazaza. Ubuhamya bwatanzwe n’impanuro byose byongeye kwibutsa urubyiruko uruhare rufite mu kubaka u Rwada rw’ejo.

Ni umunsi wizihizwa ubusanzwe ku wa 21 Nzeri buri mwaka, kw’Isi hose; mu Rwanda ukaba warizihijwe ku wa 27 Nzeri, 2019 ufite insanganyamatsiko igira iti: “Twara urumuri”. Urubyiruko rwawitabiriye mu Ngoro y’Inteko Ishingamategeko, rwahawe ubutumwa bwo gutwara urumuri rugakomeza igihango cy’ubunyarwanda.
Urumuri abanyarwanda bakongeje mu gihe cyatambutse, nirwo abariho ubu by’umwihariko urubyiruko rukwiye gutwara nk’umurage ukazashyikirizwa n’abazabakomokaho. Ibi ngo urubyiruko ruzabifashwamo n’abamaze gusobanukirwa agaciro k’ubumwe bw’Abanyarwanda, ndetse na buri wese wiyumvamo indangagaciro yo kuba yabiharanira. ‘Abarinzi b’igihango’ ni abaza kw’isonga mu kuberekera uburyo bishoboka, nk’uko byagarutsweho n’umwe muri bo.

MUDENGE Boniface yagize ati “Ubumwe bwacu buraharanirwa kandi burashoboka hamwe no kwambara ubumuntu, by’umwihariko ubunyarwanda. Bidufasha kurenga ibikomere by’amateka tugashyikira ubumwe n’ubwiyunge.” Yakomeje asaba urubyiruko nk’abagize umubare munini w’abanyarwanda, kuba ‘abatwararumuri’ birinda mu mibereho yabo ya buri munsi kuvuga indimi ebyiri. Ati “Mureke ‘Ndi Umunyarwanda’ ibe mu mitima yacu, bizadufasha kwema bityo tubashe gufasha n’abandi kwigobotora amateka mabi.”

Gukomeza kubaka ubumwe bw’Abanyarwanda byashimangiwe ndetse n’abitabiriye kwizihiza Umunsi Mpuzamahanga w’Amahoro, bahagarariye imiryango itegamiye kuri Leta. Padiri IYAKAREMYE Theogene, uhagarariye AJECL (Umuryango w’urubyiruko rwisunze Mutagatifu Karoli Lwanga); yagize ati “Icyo nisabira urubyiruko ni ukugira umutima ufunguriye abanyarwanda, cyane cyane abarimo kubyirukira hanze. Umutima uzatuma twongera amahirwe yo kugira amahoro arambye, bityo ubuvandimwe bukazongera bukabaho.”

Ibi yabisobanuye nko kwizitura ku mateka ahanini yafungaga ibitekerezo bya bamwe kubw’uburere bwahawe urubyiruko, ubu bikaba bikwiye ko ahubwo rugira ubwisanzure mu kwihitiramo amateka ababereye atandukanye n’amabi yaranze ikinyejana cya 20; bakabasha ndetse kuyasangiza abandi mu kinyejana cya 21 cyose.

Gukomeza gusigasira ibyagezweho

Kwizihiza Umunsi Mpuzamahanga w’Amahoro byahuriranye n’igihe cy’imyaka 25 Abayarwanda bamaze mu rugendo rw’ubumwe n’ubwiyunge, nyuma ya jenoside yakorewe abatutsi mu mwaka wa 1994.

UWASHEMA Anet, umwe mu rubyiruko rwitabiriye uyu munsi, yagaragaje ko gusigasira ibyagezweho ari umukoro batahanye nk’abafite imbaraga zo gukomeza kubaka u Rwanda. Ati “Nitwe bireba koko kandi tuzanabishobora hamwe n’imbaraga zubaka urubyiruko tuzakomeza kwigiramo, ndetse biri mu myanzuro twafatiye mu kwizihiza uyu munsi twemera ko izagerwaho.” Agaragaza ibyo U Rwanda rwagezeho muri iyo myaka yatambutse, Perezida wa Komisiyo y’Igihugu y’Ubumwe n’Ubwiyunge, Musenyeri John Rucyahana yasobanuye ko byose Igihugu kibikesha kwimakaza ubunyarwanda.Yagize ati “Byinshi byagezweho muri iyi myaka bishingiye ku kwimakaza ubunyarwanda, no komora ibikomere by’amateka mabi y’amacakubiri yagejeje u Rwanda ku icuraburindi rya jenoside yakorewe abatutsi mu mwaka wa 1994.”

Urubyiruko kandi rwibukijwe kugira ubuhanga, ubushishozi no gucukumbura kugira ngo amahoro n’agaciro k’Abanyarwanda bitazahungabana. Ahubwo bagatwara urumuri biziguye baharanira amahoro kubw’ahazaza habo heza.

Umunsi Mpuzamahanga w’Amahoro wizihijwe ku rwego rw’Isi ku wa 21 Nzeri, 2019 wibanda ku mihindagurikire y’ikirere igamije amahoro. U Rwanda rukaba rwawizihije ku nshuro ya cyenda, nk’uko watangiye kwizihizwa mu mwaka wa 2011; bitangijwe na Komisiyo y’Igihugu y’Ubumwe n’Ubwiyunge.

Umubyeyi Nadine Evelyne


Tanga igitecyerezo

Who are you?