Yashyizweho kuri 13 June, 2019 | 12:03

NYAGISOZI: Kutagira ikigonderabuzima hafi bituma batabonera ubuvuzi igihe

Abaturage bo mu Murenge wa Nyagisozi mu Karere ka Nyaruguru bavuga ko kwivuriza mu Kigo Nderabuzima kiri hanze y’Umurenge wabo, bibagiraho ingaruka nyinshi. Mu byo bagarutseho baganira n’itangazamakuru ku wa 11 Kamena 2019, bagaragaje ko bakererwa kubona ubuvuzi igihe barwaye kubera urugendo rurerure bakora bagana kwa muganga.

Eric, umwana w’imyaka 15 twahuye ava kwiteza urushinge ku Kigo Nderabuzima cya Cyahinda ,yatubwiye ku ngaruka abona mu kuba yagiye kwivuriza mu wundi murenge: Yagize ati “Njye ndi umunyeshuri mu mwaka wa gatandatu w’amashuri abanza, buriya twahuye mva kwiteza urushinge I Cyahinda kuko ngomba kuzakebwa (gusiramurwa) nk’uko babidukanguriye kw’ishuri. Ntabwo biba byanyoroheye kuko urugendo ni rurerure mu gihe nagombaga no kuba ndi kwiga, buriya niyemeje gusiba ikigoroba kugira ngo byibura n’iyo gahunda nyubahirize.”

Usibye no kuba yasibye ishuri hari impungenge yo kutazakomeza gutsinda neza mu masomo ye, kuko ngo azakomeza kwitoneka igikomere bikamuviramo kudakira vuba. Ari nako azaba akomeza gusiba ishuri kenshi. Ati “Nk’ubu nzakora ikizamini cya Leta gisoza amashuri abanza kandi ngomba gukebwa kuko nasobanuriwe ibyiza byabyo, kandi nkaba mbona ari cyo gihe. Gusa ndumva bitazanyorohera ahubwo bishobora kuzantera gutsindwa kubera igihe nzamara nsubira kwa muganga ntiga, ari nako nitoneka muri uru rugendo rurerure.”

Si uyu mwana wenyine urugendo rwo kugera ku Kigo Nderabuzima rugora, kuko no mu bakuru ngo bibasaba kugenda amajoro waba ufite umurwayi udashobora kwigenza bikamuviramo kuba yarembera mu rugo. Mukamuzima Clarisse ni umubyeyi ufite uruhinja rw’amezi 8. Yagize ati “Kuba twivuriza kure rwose bidukerereza muri gahunda nyinshi zo kwa muganga. Urugero nkanjye ntwite uyu mwana hari gahunda zo kwipimisha ntagiye nubahiriza ku gihe, ugasanga abaganga bantonganya ngo ndi indangare nyamara atari uko nyobewe akamaro bimfitiye n’umwana. Ahubwo ntako nabaga ntagize namwe muzi intege z’umugore utwite, hari ubwo nazindukaga ariko nkagenda nicara mu nzira nkazagera kwa muganga amasaha yarenze.”

Yakomeje avuga ko atari buri wese ubasha kugerera igihe kwa muganga, bikaba biteye impungenge ku buzima bw’abatuye Nyagisozi.
Ati “Duhitamo kujya kwivuriza I Cyahinda mu Murenge utari n’uwacu kuko ari ho hajya kuba hafi, n’iyo ufite ubushobozi bwo kuba wafata ikinyabiziga ngo wihute niho ibiciro bitworohera. Kujya I Cyahinda ushobora kubona imodoka n’ubwo zitinda ariko ku muntu ujya kwivuriza I Maraba (Muri centre de santé yo muri uyu murenge wa Nyagisozi itari hafi y’abaturage benshi) , ho ni harehare cyane kandi akenshi hagendwa na moto.”

Ubushobozi buke bwa Poste de Santé

Umurenge wa Nyagisozi ubu ufite Ikigo Nderabuzima nubwo kidafasha abawutuye, kuko aho giherereye I Maraba harimo urugendo rurerure. Impamvu usanga ibatera kwivuriza I Cyahinda akenshi, kuko na Poste de Santé bahawe itaragira ubushobozi buhagije mu kwakira abayigana bose.

Ikibazo ngo akenshi ugisanga ku baganga badahagije ndetse n’ibikoresho bikenerwa, ibyinshi muri byo bikaba bitarahagezwa nk’uko umunyamabanga nshingwabikorwa w’Akagali ka Nkakwa, Mukashema Claudine yabisobanuye; Ati “I Nkakwa ubu dufite Poste de Sante ariko nayo hari ibyo itaragiraho ubushobozi bwo kuba yakwakira umurwayi, bitewe n’uko igihe hari ibizamini bikeneye gupimwa byoherezwa ku Kigo Nderabuzima. Umuturage waje kwivuza we aba abona ko ahakerererwa kandi hari umuriro wakifashishijwe, ariko biterwa no gusaranganya abaganga aho baba bakenerwa hose kuko bigaragara ko nabo bakiri bake.”
Nyagisozi ni umwe mu Mirenge 14 (cumi n’ine) igize Akarere ka Nyaruguru, ukaba ufite Ikigo Nderabuzima kimwe giherereye I Maraba. Habera kure abarwayi baturuka I Nyagisozi bagahitamo kujya kwivuriza ku Kigo Nderabuzima cya Cyahinda, kibarizwa mu gace k’Akarere ka Huye.

Umubyeyi Nadine Evelyne


Tanga igitecyerezo

Who are you?