Yashyizweho kuri 23 May, 2017 | 13:05

Nyagatare -Gatsibo: Bakoresha amazi yanduye kubera kubura ameza

Indamukanyo I Gatsibo na Nyagatare ni uko bakeneye amazi meza. Ikibazo kimaze igihe kikagira n’ingaruka ku bahatuye dore ko hagaragara indwara nyinshi ziterwa n’umwanda. Gusa ubuyobozi buragaragaza ingamba zirambye zishaka igisubizo gihamye zamaze no gushyirwa mu bikorwa.

Bamwe mu baturage batuye mu karere ka Nyagatare, bavuga ko bahangayikishijwe no kutagira amazi meza. Bituma bavoma amazi y’umugezi w’umuvumba, abandi bakavoma areka mu bizenga hirya no hino (y’imvura) cyangwa se bakavoma amazi ay’ibidamu ubusanzwe aba yaragenewe kuhirwaho inka. Manigabe Peter ,umwe mu bahatuye ,avuga ko kubaho batagira amazi meza ari ubuzima bamenyereye, kuko nubwo bwose aya mazi aba asa nabi, ari ibyondo gusa ndetse arimo n’imyanda itandukanye, bo bayanywa, bakayatekesha, bakayameshesha, bakayakaraba.

Mujawiyera Tereza, nawe uhatuye we avuga ko mbere yo kubanza kuyakoresha, babanza kuyateka, akabira hanyuma bakayayungurura, nyuma bagahindukira bakayakoresha icyo bashakaga, gusa ibi ntabwo ariko abantu bose babigenza kuko no kubona ibicanwa muri aka gace bitoroshye, dore ko umufuka w’amakara ugura 10 500,naho kubona inkwi zisanzwe nabyo ni ihurizo. Mujawiyera avuga ko abenshi bayanywera aho batitaye ku ngaruka yabatera. Iki kibazo kandi cyo kutagira amazi meza ,ntikibangamiye abatuye Nyagatare gusa,kuko n’abatuye mu karere ka Gatsibo nabo bataka kutagira amazi meza,aho usanga nko mubatuye mu bice byegereye ikiyaga cya Muhazi, bavoma amazi y’ikiyaga bavuga ko aba yanduye ndetse ugasanga bahorana indwara z’inzoka zidashira,bitewe no kunywa amazi yanduye.

Iki kibazo kuba kibangamiye ubuzima bw’abaturage, binavugwa na Rurangirwa Jean Damascène umuyobozi w’ikigo nderabuzima cya Tabagwe, muri Nyagatare,uvuga ko mu ndwara nyinshi bakunze kwakira kwa muganga, ari iziterwa n’umwanda, nk’inzoka ndetse n’izifata imyanya y’ubuhemekero nk’inkorora, ibicurane, Asima…izi ngo ziri ku kigereranyo cya 64%,mu gihe malariya yo ifite 8,7%.

Naho mu karere ka Gatsibo,Musengimana Dorothée umuforomokazi kuri poste de santé ya Gakoni,mu murenge wa Kiramuruzi,nawe avuga ko kubera kunywa amazi ya Muhazi,nibura mu bantu 120 yakira ku munsi ,40 muri bo baba barwaye inzoka.
Aba baganga bose bahuriza kukuba izi ndwara ziterwa no kunywa amazi mabi, gusa ariko ngo bakomeza gukora ubuvugizi ku buyobozi ngo iki kibazo gikemuke, ndetse bakanakangurira abaturage kuyakoresha bamaze kuyateka,banarushaho kugira isuku,no gukoresha imiti isukura amazi.

Ingamba zirambye

Byinshi Franҫois umukozi ushinzwe igenamigambi mu karere ka Nyagatare, avuga ko ikibazo cy’amazi cyahagurukiwe, kuko ubu bageze ku kigereranyo cya 64% bazana amazi meza mu baturage, gusa ariko avuga ko iki kigereranyo kidashimishije. Gasana Richard umuyobozi w’akarere ka Gatsibo we, avuga ko muri aka karere bari ku kigereranyo cya 65%, bazana amazi meza, ariko ngo bitewe n’aho bavuye aha naho barahishimira, gusa uyu muyobozi avuga ko bifuza ko nibura mu mwaka w’ingengo y’imari wa 2017-2018, bazaba bageze ku kigereranyo cya 90% cyangwa bakanakirenza bakageza 100%.

Mu gukemura iki kibazo cy’amazi kandi avuga ko mu mujyi wa Nyagatare hubatswe uruganda muri uyu mwaka rutunganya amazi y’umuvumba, bityo bikazakemura ikibazo cy’abatuye mu mujyi wa Nyagatare, Naho imirenge ya Rwimiyaga, Musheri,Karangazi na Matimba itarageramo amazi meza, ngo byatewe nuko ari imirenge ituwemo vuba, itari isanzwe ituwe.

Byinshi akavuga ko nabo bamaze gukorana amasezerano n’ababishinzwe nabo ngo babagezeho amazi, aho bakura amazi mu murenge wa Kiyombe, bayakwirakwiza muri iyi mirenge ituwe vuba, Uyu mushinga wo kugeza amazi meza mu karere ka Nyagatare, ukazarangira utwaye amafaranga angana na miliyari imwe na miliyoni 100.

Gasana Richard ariko avuga ko barimo gukora umuyoboro wa Gihengeli uvana amazi mu karere ka Gicumbi,uyu muyoboro ngo ukaba ufite amazi menshi,ukazakemura ibura ry’amazi rya hato na hato mu mirenge ya Kiramuruzi, Kabarore, Gitoki, Rwimbogo na Nyagihanga.

Uwambayinema Marie Jeanne


Tanga igitecyerezo

Who are you?