Yashyizweho kuri 30 November, 2017 | 12:15

Mutendeli: Icyumba cy’umujyanama w’ubuzima cyazamuye ubuzima by’umubyeyi n’umwana

Abatuye Umurenge wa Mutendeli, mu Karere ka Ngoma mu Ntara y’Iburasirazuba banezerewe n’uko abajyanama b’ubuzima bubakiwe buri wese iwe, icyumba cy’isuzuma (consultation), bituma barushaho kwita ku buzima bw’ababyeyi n’abana babo.

Abajyanama b’ubuzima mu Murenge wa Mutendeli bubakiwe, buri wese iwe, icyumba cyo gusuzumiramo abarwayi, hagamije gutanga serivisi nziza no gukurikirana ubuzima bw’umugore utwite no kumukangurira kwita ku buzima bw’umwana atwite, kuva agisama kugeza igihe azabyarira, ndetse bakanamufasha gukurikirana imikurire y’umwana we.

Abaturage bavuga ko ibi byumba byabafashije cyane, kuko batagisuzumirwa mu ruhame mu cyumba by’uruganiriro, aho basibikanaga n’abana ndetse n’abashyitsi mu nzu y’umujyanama w’ubuzima.Mukarwesa Mariya Goreti, umukecuru uri mu kigero cy’imyaka 60 wo mu Kagari ka Mutendeli, yishimira ibi byumba agira ati “Ubu noneho, habonetse n’ibyumba by’abanyabuzima aho bakwitaho nta rwaserera, bakakuvura mu ibanga , bitandukanye na mbere, aho wasangaga umubwira ikibazo cyawe mwicaye mu ruganiriro rw’inzu ye”.

Iragena Anonciata, ni umujyanama w’ubuzima w’umudugudu w’Agatonde. Agaragaza akamaro k’icyumba cy’umujyanama, avuga ko nta mu jyanama w’ubuzima wo muri Mutendeli ukivurira mu ruganiriro rw’inzu ye, ati “Ubu dufite inzu tuvuriramo mu ibanga, tukabikamo n’imiti. Mbese dusigaye tuvura nk’abandi baganga bose”. Akomeza avuga ko mbere, babangamirwaga mu mikorere, ati, “Iyo urebye serivisi yo kuvura ni ibanga. Iyo wabaga uri kuvurira mu bantu, n’abana bahitahita ,wabonaga atari byiza. Ariko ubu turisanzuye”.

Mukamwerekande Savera, nawe, ni umujyanama w’ubuzima. Avuga ko mushingano afite, hari kwita ku buzima by’umugore utwite kugeza abyaye. Ati ʺGuturuka igihe twashoboye kwibonera ibyumba by’isuzuma, natwe twitaye cyane kubatugana, ariko abagore batwite guhera ku mezi atatu, tukabitaho by’umwihariko. Tubakangurira kujya kwisuzumisha kwa muganga kugira ngo bakurikirane ubuzima bwabo n’ubw’abana batwite”.
Mukamwerekande akomeza avuga ko nyuma yo kubyara, bakomeza gukurikirana imikurire y’umwana, ati :“Dusura umubyeyi tukareba uko yita ku mikurire y’umwana n’indyo yuzuye ye, yaza no kutugisha inama, tukamwakirira ahantu hisanzuye tukamugira inama”.

Umuyobozi w’ikigo nderabuzima cya Mutendeli, Kamanzi John nawe yemeza ko icyumba cy’umujyanama w’ubuzima cyagize akamaro cyane ku baturage, ariko by’umwihariko bigafasha abana n’ababyeyi. Uyu muganga ati :“Urabona umubyeyi ufite uruhinja iyo agize ikibazo gituma ajya gufashwa n’umujyanama w’ubuzima, biba byiza iyo amufashirije ahantu hiherereye kuko iyo amufashirije mu ruganiriro rw’inzu ye, bituma atanamwitaho uko bikwiye kubera ubwisanzure buke”.

Umunyamabanga Nshingwabikorwa w’Umurenge wa Mutendeli, Muragijemungu Arcade, yemeza ko icyumba cy’umujyanama w’ubuzima ari umwimerere w’Umurenge wabo. Kuri ubu, kikaba kimaze gukwira mu tundi duce twa Ngoma. Avuga ku ruhare rw’icyo cyumba mu mikurire y’umwana, Muragijemungu yagize ati :“Iki cyumba gifasha abana cyane kuko abo tugenera imfashabere nka ʺshisha kibondoʺ n’ibindi tugenera abafite imikurire mibi, bibikwa hariya, buri gitondo bakaza kubihabahera kuko dutinya ko babijyanye mu ngo zabo, babisaranganya n’abakuru kuko iba ari imiryango ikennye”.

Yongeye avuga ko, uretse kuba icyo cyumba cyakirirwamo abarwayi, kinafatwa nk’ibiro by’umujyanama w’ubuzima abikamo imiti n’ibindi bikoresho bifasha abaturange, bityo ntabivange n’ibyo mu rugo.
Ikigo nderabuzima cya Mutendeli gifasha abaturage 38,340 bo mu Tugari dutanu twa Mutendeli n’abandi bo mu Tugari tubiri tw’Umurenge wa Kazo, kuko uwo Murenge utagira ikigo nderabuzima.

Manzi M. Gerard


Tanga igitecyerezo

Who are you?