Yashyizweho kuri 25 September, 2019 | 08:47

Musha: Inshuti z’umuryango zifasha imiryango ibanye nabi kubana neza

Bamwe mu batuye mu murenge wa Musha mu karere ka Gisagara ,bavuga ko bashima uruhare rw’incuti z’umuryango mu kurwanya no gucyemura amakimbirane yo mu muryango no kurwanya ihohoterwa rikorerwa mu muryango , kuko hari imiryango yari yarananiranye ariko ubu ngo ikaba yarahindutse kubara ibiganiro bagiye bahabwa n’iz’inshuti z’umuryango.

Mukeshimana Anonciata utuye mu kari ka Kimana muri uyu murenge avuga ko inshuti z’umuryango zamukemuriye ikibazo yari afitanye n’umugabo we kuko ubwo yamutaga agashaka undi mugore ,ngo yashatse no kumusohora mu nzu no kumwambura imitungo yose ariko izi nshuti z’umuryango ngo zamufashije kuguma mu mitungo ye ndetse ubwo yahohoterwaga n’uyu mugabo we amukubise umuhini agatoroka ngo zamufashije kwivuza. Agira ati « baramfashije baraza babwira umugabo ngo niba yaranyanze akaba atagishaka kubana nanjye nagende yiyubakire indi nzu abanemo n’uwo mugore njyewe andekere mu nzu twarimo n’umwana wanjye ,ubu ndatekanye nta kibazo mfite ndetse yashatse no kujya aza kumpohotera twahura agashaka kunkubita baramwiyama ngo niba yaranyanze nareke kumpohotera ntabwo yongeye».

Uyu mubyeyi akomeza avuga ko iyo batamufasha ngo agume mu nzu we n’umwana bari barabyaranye ubu aba yangara , atagira aho arambika umusaya ariko ubu ngo abayeho neza mu mahoro no mu mutuzo ashimira kandi zamufashije akaba atagihohoterwa n’umugabo we kuko yahoraga afite ubwoba ko azamusanga mu nzu akamwiciramo nubwo batakibana. Sendegeya Jean Nepomscène umwe mu nshuti z’umuryango utuye mu mudugudu wa Nyabiduha mu kagari ka Kimana ,avuga ko mu bibazo bakunze kwakira bakanacyemura ahanini ngo ni irishingiye ku mitungo aho umugabo ashaka kwikubira umutungo wose w’urugo .

Sendegeya avuga ko kubera ko baba baturanye nabo bamenya byihuse ibibera mu ngo zo mu mudugudu wabo ,bakihutira kubicyemura ababananiye ngo babakorera raporo bakabimenyesha ubuyobozi bw’akagali nabwo bukabafasha. Agira ati «hari ubwo umwe mu bashakanye adusanga akatugezaho ikibazo afite tugahita tubasanga tukabaganiriza abadukundiye bakatwakira bakatwumva tuhava ikibazo cyabo gicyemutse ariko hari n’abanga kutwakira icyo gihe ibibazo byabo tubishyikiriza akagari ,ariko abenshi baratwakira nkanjye mu mudugudu ntuyemo twari dufite imiryango itanu ibanye nabi ,ine yemeye guhinduka ubu ibanye neza naho umwe wo waratunaniye bitabaza inkiko birangira banatandukanye».

Icyizere

Niyonizeye Francine nawe ni umwe mu ncuti z’umuryango muri aka kagari avuga ko abaturage bamaze kubagirira icyizere kuko abafite ibibazo baza kubishakira mu rugo ngo baze babasure bumve ikibazo cyabo. Agira ati « akenshi usanga abagabo ari bo bafite amakosa aho usanga imitungo bayisahuura bayijyana mu buraya , ugasanga abana babayeho nabi umugore akaza kuduhamagara tukabafasha tuka wereka icyo amategeko avuga ku mitungo y’abashakanye ,ubundi urebye ihohoterwa ryiganje hano ni irishingiye ku micungire y’umutungo hagati y’abashakanye».
Tumusifu Jerome umunyamabanga nshingwabikorwa w’umurenge wa Musha muri aka karere avuga ko Inshuti z’umuryango zagize uruhare runini mu kugabanya ihohoterwa rikorerwa mu ngo kuva aho zigiriyeho.

Kuko akenshi amakimbirane ya hato na hato yabonekaga mu miryango , yabaga ashingiye ku busa ,ariko binyuze mu biganiro bagirana n’imiryango irimo amakimbirane ari nayo abyara ihohoterwa byagize umumaro munini kuko byatumye umubare w’ingo zari zibanye nabi ugabanuka bigatuma umuryango uba mwiza binyuze no muri gahunda z’umugoroba w’ababyeyi banagiramo uruhare. Ati « dufite imidugudu 42 dufite inshuti z’umuryango 84, tujya gutangira uyu mwaka ushize w’imihigo muri raporo twari dufite imiryango 214 ibanye nabi uyu munsi izamaze guhinduka ubu zibanye neza mu by’ukuri ni imiryango 81 , abandi haba harimo abo byanze tukabagira inama yo kugana inkiko ariko izi nshuti z’umuryango zifite akamaro kanini kandi gakomeye mu kubaka umuryango.»

Inshuti z’umuryango ni urwego rwashyizweho muri 2015 na Minisiteri y’uburinganire n’iterambere ry’umuryango ifatanije na komisiyo y’Igihugu y’abana mu rwego rwo gufaha umuryango gutera imbere ,no kwimakaza uburere bwiza bw’abana n’umuco wo kuganira mu muryango. Ni abakorerabushake bashinzwe kurengera umuryango bakaba bakorera mu midugudu yose y’igihugu kugira ngo barinde abagize umuryango bose bibanda ku mibereho myiza y’umwana.

Bagira kandi inama imiryango muri gahunda zitandukanye zirimo iz’iterambere, kwita ku burere bwiza bw’abana babo, kwirinda amakimbirane, gukumira ihohoterwa rishingiye ku gitsina…

Kugeza ubu mu Rwanda hose harabarurwa inshuti zumuryango zigera ku bihumbi 30 batoranyijwe mu bandi baturage.

Uwambayinema Marie Jeanne


Tanga igitecyerezo

Who are you?