Yashyizweho kuri 9 June, 2016 | 08:04

Kwishyura umusanzu w’ubwisungane mu mabanki bwagabanyije inyerezwa ryawo

Kuva aho ikigo cy’ ubwiteganyirize mu Rwanda (RSSB) gifatiye mu nshingano zacyo kwishyuza mitiweli hari byinshi byahindutse. Muri byo, kwishyura binyuze mu bigo by’imari. Ibi byagabanyije ingeso yo kwiba umusanzu. Kuri ubu RSSB irateganya uburyo bwo kwishyura hakoreshejwe telefoni mu rwego rwo gufasha abaturage kudakora ingendo ndende bagana ibigo by’imari.

Ntigurirwa Deogratias ushinzwe ubukangurambaga muri (RSSB) avuga ko kuva aho imicungire y’ imisanzu y’ ubwisungane mu kwivuza yeguriwe RSSB bashyize ingufu mu kunoza uburyo iyi misanzu yishyurwa nta buriganya bujemo.Kuri ubu kwishyura imisanzu y’ ubwisungane mu kwivuza bikorerwa kuri za SACCO ndetse no kuri za banki z’ ubucuruzi.Ngo hari n’ abishyura babinyujije ku dushami duto duto duhagarariye amabanki mu midugudu bakunze kwita aba « agent ».

Kwishyura ubwisungane mu kwivuza kuri ubu buryo , Ntigurirwa avuga ko byakuyeho uburyo iyi misanzu yakirwaga mu ntoki n’ abayobozi mu nzego z’ ibanze ugasanga amafaranga aburiwe irengero.Kugeza ubu hari abayobozi mu nzego zitandukanye kuva kubayobozi b’ uturere ndetse n’ imirenge bakurikiranyweho kunyereza aya mafaranga y’ abaturage.

Ubuyobozi bw’ ikigo cy’ ubwiteganyirize mu Rwanda RSSB buravuga kandi ko burimo gukora ibishoboka byose kugira ngo kwishyura ubwisungane mu kwivuza byorohere abaturage cyane batagombye guca mu nzira nyinshi. Bumwe mu buryo bateganya gushyiraho mu minsi ya vuba buzafasha abaturage , gusa itariki buzatangiriraho ikaba itaramenyekana harimo no gukoresha ikoranabuhanga bakorana n’ amwe mu masosiyete y’ itumanaho , bityo abanyarwanda bakabasha kwishyura ubwisungane mu kwivuza bakoresheje telefoni igendanwa.

Nubwo RSSB ivuga ko yashyizeho izi ngamba hari bamwe mu baturage bavuga ko hakiri bamwe mu bayobozi b’ inzego z’ ibanze bakiza kubaka amafaranga ya mituweli ndetse rimwe na rimwe bakabaca n’ amande igihe abo bayobozi basanze ntayo baratanga.Aha umuyobozi ushinzwe ubukangurambaga muri RSSB aburira abaturage ko nta mande y’ uko utishyuye mituweli acibwa abaturage niba hari abayobozi babikora ngo baba banyuranije n’ amategeko

Kwishyura neza bituma serivisi iba nziza

Inshuro nyinshi abaturage bivuza bakoresheje ubwisungane mu kwivuza bakunze kunenga serivisi bahabwa kwa muganga. Hari abavuga ko bakirwa nabi abandi bakavuga ko bahabwa imiti y’ intica ntikize. Umuyobozi ushinzwe ibikorwa by’ ubuvuzi muri RSSB Madamu Muziganyi Florence avuga ko kimwe mu bibazo RSSB yagerageje gukemura ikimara guhabwa inshingano zo gucunga imisanzu ya mituweli, harimo no kwishyura neza kandi ku gihe ibitaro n’ ibigo nderabuzima bakorana.
Ibi ngo byatumye abaganga n’ abandi bakozi bakora muri ayo mavuriro babasha guhemberwa ku gihe bityo bakarushaho gukora akazi banezerewe.Ikindi kandi ngo byatumye imiti iboneka mu bigo nderabuzima n’ ibitaro, ngo kuko mu busanzwe kugira ngo ikigo nderabuzima gihabwe imiti kiba kigomba kubanza kwishakamo amafaranga yo kwishyura farumasi y’ akarere giherereyemo.

Byongeye kandi kuri ubu umuturage wivuriza k’ubwisungane mu kwivuza yemerewe kwivuriza aho ariho hose mu gihugu ngo kuko hifashishijwe ikoranabuhanga , umuntu ashobora gukoresha numero z’ ikarita ye yo kwivuza cyangwa indangamuntu akabasha kubona niba yarishyuye cyangwa atarishyuye. Umwaka wa mituweli wa 2014-2015 ushojwe ubwitabire buri kuri 81,7% mu gihugu hose .Hari uturere tumwe tuza mu mibare yo hejuru nka Kicukiro, Kamonyi na Gasabo dufite 95% mu gihe hari n’ utundi bigaragara ko tukiri hasi cyane .Utwo ni Rubavu, Nyanza na Nyaruguru turi kuri 60%.

Hari abahuza ubwitabire buke bwa mituweli n’amikoro y’ uturere bashaka kuvuga ko hari uturere dufite abaturage bakennye.Umuyobozi ushinzwe ubukangurambaga Bwana Deogratias Ntigurirwa agira ati « ibyo byo ntibyashoboka kuko bibaye amikoro y’ uturere , Nyamasheke yagombye kuza mu twanyuma mu bwitabire kuko ari ko karere gafite abaturage bakennye cyane kurusha utundi. » Ntigurirwa akomeza agira ati « ikindi twibuke ko abakennye cyane Leta ibishyurira ,abandi rero batishyura babikora kubera impamvu zabo. »

Aba bayobozi ba RSSB bavuga ko zimwe mu mpamvu bakeka ko zishobora kuba zituma abaturage batishyura neza ,ubwisungane biterwa n’ ubukangurambaga bwa bamwe mu bayobozi mu nzego z’ ibanze butaragira ingufu , gusa nanone ngo nta wakwirengagiza amateka y’ imikorere y’ uburyo iyi misanzu yagiye itangwa , ibintu byagize ingaruka kuri serivisi za mituweli, bityo bigatuma bamwe mu baturage bayitera icyizere.

Umuhire Valentin


Tanga igitecyerezo

Who are you?