Yashyizweho kuri 26 July, 2017 | 11:08

Kutamenya ibyiciro by’ ubudehe barimo birabangamira kwishyura mitiweri

Abatazi ibyiciro by’ubudehe barimo bagowe no kwishyura mitiweli. Bamwe muri bo batuye kure. Nyamara bagomba kujyayo iwabo kureba ibyiciro barimo mbere y’uko bishyura.

Hasigaye iminsi mike cyane ngo umuntu uzaba atarishyura amafaranga y’ ubwisungane mu kwivuza (mutuelle de santé ) ntazabashe kwivuza mu kwezi kwa munani kugeza kurangiye. Amategeko ya mitiweri avuga ko umwaka wa mitiweri urangirana n’ ukwezi kwa gatandatu , undi ugatangirana n’ ukwezi kwa karindwi ari nako bakunda kwita ukwezi kwa mitiweri.Muri uku kwezi nubwo bamwe mu baturage baba batarishyura , bemererwa kwivuza kugeza ku itariki ya 31 Nyakanga . Ariko iyo bigeze ku itariki ya mbere Kanama batarishyura icyo gihe kwivuza birahagarara kugeza igihe bishyuriye.

Muri iyi minsi ku biro by’ utugari n’ imidugudu urahasanga imirongo minini, abaturage banyuranamo bose baje gushaka uburyo bakwishyura amafaranga ya mitiweri.Baranyuranamo ari uruvunganzoka kuko bamwe bakerewe kwishyura bityo bakaba bari gusiganwa n’iminsi kugira ngo batazangirwa kwivuza .Nyamara kwishyura nabyo ntibiboroheye kuko kuri ubu basabwa kwishyura bakoresheje ibyiciro bishya by’ ubudehe , aho usanga hari bamwe batanabigaragaraho cyangwa se bavuga ko bashyizwe mu byiciro badakwiye , ibyo bigatuma babanza gukemura ikibazo cy’ibyiciro kugira ngo bemererwe kujya kwishyura ubwisungane mu kwivuza.

Kwishyurira aho wibaruje ni itegeko

Umuyobozi w’ umudugudu wa Biryogo Bwana Kanyamanza avuga ko kuba abaturage ari benshi baka serivisi za mitiweri ngo biraterwa nuko benshi baba bataratekereje kwishyura mbere iminsi yagewe itarabarangirana . Ibyo kandi ngo biriyongeraho ko buri wese agomba kwishyura ubwisungane akoresheje ibyiciro bishya by’ ubudehe nkuko amabwiriza mashya avuga ko “buri muntu wese ushaka kwishyura mitiweri agomba kubikorera aho yibarurije mu byiciro by’ ubudehe cyangwa se akishyurira aho atuye ubu ariko inyemezabwishyu akayijyana aho yibarurije.”

Madamu Mukandamutsa Colette ushinzwe ubudehe mu mudugudu wa Biryogo avuga ko icyo cyemezo cyafashwe mu rwego rwo kwanga ko hari abantu baza bakeneye mitiweri bakabeshya ko batasohotse k’ urutonde rw’ ibyiciro by’ ubudehe nyamara baribaruje ahandi.Icyo gihe ngo haba hari impungenge z’ uko bashobora ku mubarura incuro ebyiri ariyo mpamvu bamwohereza aho yibaruje.

Ntibyoroheye buri wese gusubira aho yibaruje

Umwe mubaturage bari gushaka mitiweri witwa Niyomwungeri Paul avuga ko iwabo ari mu karere ka Nyaruguru mu murenge wa Ruheru.ngo kugera iwabo aturutse i Kigali ni urugendo rw’ amafaranga akabakaba ibihumbi icumi kugenda no kugaruka .avuga ko bitamworohera kubona ayo mafaranga mu gihe yaje I Kigali aje gupagasa kandi kugeza nubu akaba atarahembwa .Niyomwungeri avuga ko afite impungenge zo kubaho nta mitiweri afite nyamara yari yagerageje kubona amafaranga ibihumbi bitatu byo kwiyishyurira.Byongeye kandi ngo nubwo yajya Nyaruguru cyangwa se akoherezayo ayo mafaranga ubuyobozi bwamubwiye ko agomba kubona ikarita ya mitiweri ari uko abo mu muryango we bose (mama we na barumuna be bane ) bamaze kwishyura.Kuri we ngo asanga iki ari ikibazo kimukomereye agasaba inzego zibishinzwe kwiga uburyo abaturage bakoroherezwa kubona amakarita ya mitiweri nta yandi mananiza ajemo.

Umuyobozi w’ ishami rya mitiweri mu kigo cy’ ubwiteganyirize cy’ u Rwanda(RSSB) Bwana Rulisa Alexis avuga ko nubwo hari abaturage bagaragaza impungenge ko kujya iwabo aho bibaruje kugira ngo babashe kwishyura mitiweri bibagora ari bumwe mu buryo basanze bwafasha kuzamura umubare w’ abitabira mitiweri.Ibi kandi ngo binafasha kuba umuntu umwe atakwishyura wenyine asize umuryango we nyamara itegeko rivuga ko urugo rugomba kwivuza aruko abarugize bose bamaze kwishyura.

Bwana Rulisa kandi avuga ko abantu bakwiye kujya bafata ingamba zo kwishyura mbere mu rwego rwo kwirinda ko bashobora kwangirwa gukomeza kwivuza.Ibi kandi binareba abaturage bagiye gukoresha mitiweri bwa mbere , kuko bo itegeko ribasaba kuba barishyuye mbere y’ itariki ya 30 Kamena .Bitabaye ibyo ngo nabo baba bagomba gutegereza ukwezi.

Kuri ubu kuva aho imicungire y’ ubwisungane mu kwivuza yeguriwe ikigo cy’ ubwiteganyirize cy’ u Rwanda kwishyura mitiweri birakorerwa ku mirenge sacco ndetse no kubakora serivisi zo gutanga amafaranga bakorana na Equity Bank abo bakunze kwita “agent” aho bari hirya no hino mu gihugu.

Musonera Sosthène


Tanga igitecyerezo

Who are you?