Yashyizweho kuri 21 September, 2017 | 11:03

Kuboneza urubyaro ku mugabo nta ngaruka nta n’ikinegu kirimo

Nubwo atemeranya na bamwe mu bagabo n’abagore bavuga ko kwifungisha burundu ku mugabo ari ukwikona, Kamuhanda Jean Bosco avuga ko ari icyemezo yafashe ku nyungu z’umuryango. Gusa kuba ubu buryo butazwi cyane butuma hari n’ababutinya kuko babufiteho amakuru make.

Kamuhanda Jean Bosco imbere y’imbaga y’abaturage b’umurenge wa Muhororo, akarere ka Ngororero atanga ubuhamya, akanyuzamo agakangara abamuseka nabo abakangurira kwifungisha. Mu ishati y’amabara y’umweru wijimye n’umukara, n’icyizere cyinshi avuga ko ajya gufata umwanzuro wo kwifungisha ubwe, ari uko yari amaze kugira abana 7 kandi ubushobozi bwe agasanga butazamwemerera kubatunga. Umugore we yafataga imiti yo kuboneza urubyaro akazengerezwa, bityo afata umwanzuro ko agomba kwifungisha kandi ngo kuri we ubu nta kibazo na kimwe afite mu rugo. Ati “kuba bizwi ko nifungishije nta makimbirane nshobora kugirana n’abantu bashobora kuvuga ko hari ahandi nabyaye umwana. Nyuma yo kwifungisha byatumye iwanjye hahora umutekano ndetse ubu nteganyiriza abo nabyaye dore ko n’ubushobozi bwanjye budahagije.”

Icyemezo cy’umuryango

Uretse ko hari n’abatarumva akamaro ko kuboneza urubyaro, mu muryango n’aho atuye hari abumva ko uyu mugabo ntacyo ari cyo, ko aba yarataye umwimerere w’ubugabo cyane cyane bagatekereza ko ashobora kuba atagira ingufu mu kuryamana n’umugore we. Nka Ndikubwimana Pascal, umugabo w’abana 6, umukuru muri bo afite imyaka 14 agira ati “njye sinakwifungisha cyane cyane kubera imyemerere yanjye, ariko nanone nzi ko umugabo ari ubyara. Imfizi ntiyimirwa, njye mfite amikoro abo nzabyara bose mfite ubushobozi bwo kubarera, nta mpamvu rero yo kwifungisha dore ko n’Imana yavuze ngo twororoke...” Dr Rushanika Christophe, inzobere mu gufunga abagabo burundu (vasectomy) amara impungenge abagabo bifuza kuboneza urubyaro mu buryo bwa burundu. Ati ,”ntacyo bihungabanya ku bushobozi bwo gukora imibonano mpuzabitsina.”

Kamuhanda Jean Bosco ayo magambo y’abantu ngo ntacyo amubwiye. Icyo areba cyane ni umuryango we ngo kuko kuva yafata iki cyemezo ntacyo birahungabanya mu mibanire ye na wo. Umuyobozi ushinzwe irangamimerere mu murenge wa Muhororo, Uwiragiye Julienne avuga ko bashimira abagabo bamaze kwifungisha bakava mu bujiji buterwa cyane n’imyumvire, bakifungisha cyane ko muri aka gace habarirwa abagabo basaga makumyabiri na batandatu (26) bamaze kwifungisha. Ati “ kwifungisha ni ubushake ariko nanone ni inyungu z’igihugu ndetse n’iz’ubikoze, kuko bigabanya ubukene ndetse n’amakimbirane mu miryango. Turasaba rwose abagabo kumva ko nabo bibareba kandi ko nta ngaruka na mba bigira uretse ababa bashaka kubasebya.”

Uretse Kamuhanda n’abo bagabo makumyabiri na batandatu, mu karere ka Rulindo mu ntara y’amajyaruguru abagabo magana abiri mirongo inani na babiri (282) bamaze kwitabira uburyo bwo kwifungisha burundu, nka bumwe mu bufasha abagabo kuboneza urubyaro nk’uko urubuga www.igihe.com rubigaragaza. Umuyobozi w’Akarere wungirije ushinzwe imibereho myiza y’abaturage, Gasanganwa Marie Claire avuga ko koko hari umubare w’abagabo bitabiriye kwifungisha burundu. Ati “ku bwumvikane n’imiryango yabo bahisemo kwifungisha urubyaro burundu.” Agaruka ku bihuha bikwirakwizwa kuri ubu buryo bwo kwifungisha urubyaro burundu ku bagabo, akavuga ko ababukoresheje bahamya ko ntacyo bihindura mu myitwarire yabo mu gutera akabariro.

Uburyo bumwe bufasha ubundi buriho

Ubu buryo ntibubuza umugabo gukora imibonano mpuzabitsina kuko anasohora nk’uko bisanzwe. Ikiba cyabaye ni uko imirerantanga itanga intanga zitwarwa n’amasohoro iba itakizigeza mu masohoro ngo zihure n’intanga ngore zibe zatanga igi rivamo umwana. Dr. Mbonimpa Anicet umukozi muri Minisiteri y’ubuzima mu ishami ryo kuboneza urubyaro, nawe avuga ko ntacyo bitwara umugabo wifungishije mu byerekeranye no gutera akabariro, kuko nta kintu byangiza uretse agatsi gato kajyana intanga bakata bityo ntizongere kugenda. Ati “turacyareba ko hari uburyo bwashoboka ko n’abagabo bakwifungisha mu gihe runaka. ”

Umudamu utaramara igihe kinini ashatse Uwingabire Liliane kuri we ngo imyumvire y’abagabo ikwiye guhinduka kuri iyi ngingo kuko ngo bireba abantu babiri, bityo ngo bishobora gukorwa n’umugabo cyangwa umugore. Ikizima ngo ni uko babyumvikanaho k’uwabikora hagati yabo.

Uburyo bwo gufungisha urubyaro ku bagabo bwatangiye gukoreshwa mu Rwanda muri 2008. Bufite amabwiriza yihariye kuko ushaka kwifungisha bisaba ko umugore n’umugabo bajyana kwa muganga ndetse bakitwaza ibyangombwa bisinyeho n’abayobozi bo ku nzego z’ibanze ndetse n’abo mu muryango w’abagiye gufungisha urubyaro mu buryo bwa burundu. Ibi bikorwa kugira ngo ejo hatazavuka ikibazo umwe muri bo agashaka kujya kurega mu nkiko.

Hirya y’ubu buryo hari n’ubundi bukoreshwa burimo gukoresha agakingirizo kaba ak’abagabo cyangwa ak’abagore, uburyo bubuza igi guhisha,gukoresha inshinge, gukoresha agapira gashyirwa munsi y’uruhu rw’akaboko k’umugore, n’uburyo bubuza igi gufata kuri nyababyeyi...

Ubushakashatsi bwakozwe mu 2014-2015 n’Ikigo cy’Igihugu cy’Ubuzima (RBC) ku myororokere y’Abanyarwanda, bugaragaza ko buri mwaka mu Rwanda havuka abana ibihumbi 300, ni ukuvuga abana bashobora kuzura akarere kamwe k’u Rwanda.

Imibare iva muri Ministeri y’ubuzima igaragaza ko mu Rwanda ubu hamaze kwifungisha abarenga 3.500. Akarere kaza imbere mu gukoresha ubu buryo ni Nyabihu ifite abasaga 400, hakaza Gatsibo na Muhanga.

Niyonagize Fulgence


Tanga igitecyerezo

Who are you?