Yashyizweho kuri 13 June, 2016 | 10:56

Isuku n’isukura biracyahangayikishije inzego z’ubuzima

Leta iratangaza ko hakiri byinshi bigomba gukorwa mu bijyanye n’isuku n’isukura mu nzego zitandukanye. Mu bushakashatsi bwakozwe na RGB, abaturage basaga gato 60% ni bo batangaje ko bishimiye serivisi z’isuku n’isukura. Mu tubari n’amaresitora isuku irakemangwa , mu bitaro irishimiwe.

Hashize igihe inzego za Leta zitandukanye zigenzura isuku hirya no hino, gusa hari aho zigikemangwa kubera umwanda uhagaragara. Mu isuzuma ry’uko abaturage babona imiyoborere ibabereye n’imitangirwe ya serivise mu nzego zibegereye (Citizen Report Card/CRC), rikorwa n’Ikigo gishinzwe Imiyoborere (RGB), abaturage bashimye serivisi z’isuku n’isukura ku gipimo kingana na 64.8%.

Mu turere tune ari two Gasabo, Nyanza, Nyamagabe na Karongi, abaturage bagaragaje ko bishimiye serivisi z’isuku n’isukura ku gipimo kiri hejuru ya 75%. Hagati aho ariko, mu karere ka Bugesera abaturage bagaragaje ko bishimiye izo serivisi ku gipimo kiri munsi ya 50%. Mu tundi turere dusigaye, abaturage bagaragaje ko bishimiye izo serivisi ku gipimo kiri hagati ya 50 na 75%. Mu binengwa byose, utubari na resitora biza ku isonga.

Utubari na resitora biteye impungenge

Nubwo amabwiriza y’inzego z’ibanze hirya no hino ategeka utubari na za resitora uburyo bigomba kuba bimeze, hari aho isuku nke yabyokamye ku buryo ubashije kubona aho bategurira amafunguro agirira impuhwe abahafungurira.

Mu bushakashatsi twavuze haruguru bwakozwe na RGB, abaturage bavuze ko bishimiye isuku yo mu maresitora n’utubari ku gipimo cya 32.6%. Ibyo akenshi ngo biterwa n’umwanda uharangwa ku buryo bukabije.

Mu nzego zitandukanye z’ubuyobozi bagiye bashyiraho amabwiriza atandukanye arebana n’isuku mu tubari na resitora, n’ubwo hamwe na hamwe atubahirizwa.

Nko mu mujyi wa Kigali, Inama Njyanama y’Umujyi yo ku wa 02 Nyakanga 2006 yemeje kandi itegeka amabwiriza agenda isuku mu tubari na resitora. Muri yo, harimo kuba inzu zikorerwamo ubwo bucuruzi zigomba kuba zidatuwemo, ziri kure y’imyanda, zitaruye amazu atuwemo, zifite igikoni cyubakishije amakaro ku nkuta, ibyuma bizimya umuriro, ubwiherero n’ibindi.

Isuku yo mu bitaro irashimwa

Isuku yo mu mavuriro ni yo yashimwe ku kigero cyo hejuru, 92.6%. Ahandi ni mu biro by’inzego z’ibanze ku gipimo kingana na 89.6%, mu masoko ku gipimo cya 61%, naho mu ngo z’abaturage no ku mubiri ku gipimo kingana na 48.4%.

Bamwe bavuga ko impamvu isuku mu bigo bya Leta iri ku gipimo gishimishije ari uko isuku yaho akenshi ikorwa n’amasosiyete yigenga yatsindiye iryo soko, ariko mu maresitora n’utubari bigakorwa na ba nyira byo kandi akenshi bakabikora nabi kubera ubumenyi bucye.

Ubu bushakashatsi bwakorewe ku ngo zigera ku bihumbi cumi na kimwe na cumi n’eshatu (11.013) mu turere twose uko ari 30, imirenge 326, imidugudu 733. Habajijwe abakuru b’ingo cyangwa abandi baba mu rugo bafite hejuru y’imyaka 18, nyuma hakorwa ibiganiro mu matsinda y’abagize JADF (Abafatanyabikorwa mu iterambere) n’abakuru ba serivisi zikorerwaho ubushakashatsi hagamijwe kurebera hamwe uko ibitanoze byanozwa.

Higiro Adolphe


Tanga igitecyerezo

Who are you?