Yashyizweho kuri 11 July, 2016 | 07:41

“Ibihazi”: Imitwaro mu kwishyura imisanzu ya mituweli

Mu gihe mu gihugu hose hari igikorwa cyo gutanga imisanzu y’ubwisungane mu kwivuza “mituweli’, bamwe mu bagomba kuyitanga barinubira umutwaro uzanwa no kuba itegeko rya mituweli rishingira ku muryango.Mu bafite inzitizi bakaba barimo imiryango igarararamo ‘ibihazi’ isabwa kubitangira imisanzu kugira ngo yemerwe nk’abanyamuryango ba mituweli.

Ijambo “ibihazi” rikunze gukoreshwa ku bantu bananiranye, batumvira umuryango, barangwa n’ibikorwa bibi nko kunywa ibiyobyabwenge, kugira urugomo, kwiba, gufata abagore n’abana ku ngufu, n’ibindi. Kenshi aba bantu bakunze kuba ari ingaragu, bagitaha mu nzu z’iwabo ariko ababyeyi babo batavuga. Akenshi imiryango ifite ibihazi iba yarakubititse. Ngaho kwishyura ibyo byibye cyangwa byangije, ngaho gukinguzwa amajoro, ngaho gukubitwa n’ibindi.Iyi miryango ikaba ibabazwa n’uko itegeko rya mituweli riyihatira gutangira imisanzu abana nk’abo badafite icyo babamariye.

Kamanzi Yudita ni umuturage wo mu kagali ka Mbare, umurenge wa Shyogwe akarere ka Muhanga. Ni umupfakazi. Afite abana bane, abahungu batatu n’umukobwa umwe. Umukobwa amaze kubyarira mu rugo incuro ebyiri. Umuto mu bahungu be afite imyaka 25.Bose uko ari batatu birirwa mu gasozi, bakorera amafaranga ,bayabona bakajya kwiyahuza ibiyobyabwenge, bagataha igicuku kinishye. Avuga ko nta kintu na kimwe bamumariye. Ati “ubu naragowe,ubwo baraza muri icyo gicuku bakankinguza, natinda bagashaka guca inzugi n’amadirishya.Bakorera amafaranga bagahorobya. Ariko ikimbabaza cyane ni uko kuba mbafite bimbuza kujya muri mituweli kuko bambwira ko batanyakira na bo ntabatangiye imisanzu, kandi kuyitangira ntibabikozwa.” Ikibazo nk’iki cyakunze kugarukwaho n’abaturage mu mirenge itandukanye y’akarere ka Muhanga ubwo basurwaga n’abadepite kuva ku wa 26 kugera ku wa 29 Kamena 2016.Hakaba ndetse n’abagaragazaga ko basabwa gutangira mituweli abana babo bigize ibihazi, batazi n’iyo baba, niba barapfuye cyangwa bakiriho.

Umutwaro ku muryango

Uwamariya Beatrice, umuyobozi w’akarere ka Muhanga na we asanga ibihazi ari umutwaro ku miryango yabyo kuko isabwa kubitangira imisanzu y’ubwisungane mu kwivuza. Ati “ugasanga nk’umusaza n’umukecuru barikokoye babonye ibihumbi bitandatu byabo, ariko mituweli ikanga kubyakira ngo keretse n’ibyo bihazi, bitanafite icyo byitayeho, bitangiwe imisanzu, wenda batazi n’iyo biba,”. Akomeza avuga ko abashyiraho amategeko bakagombye gutekereza kuri icyo kintu byanashoboka bakareba niba nk’umwana wese ugejeje ku myaka 21 atakurwa ku babyeyi be akabarwa wenyine.Akaba asanga hakwiye gukorwa ubuvugizi kuri iki kintu abantu bagatabara bariya babyeyi bafite ikibazo cy’abana bigize ibihazi byanashoboka bikaba byakorwa mu buryo bw’amategeko.

Mu kiganiro n’abanyamakuru cyabaye ku wa 29/06/2016 ku biro by’akarere ka Muhanga, Depite Nyirarukundo Ignacienne yagize icyo abivugaho. Kuri we, intego ya leta y’u Rwanda ni uko buri munyarwanda wese agira ubwishingizi bw’indwara. Ati “abo batagize ubwishingizi bw’indwara bashobora kuba umutwaro ku muryango nyarwanda kuko nta we usezerana n’iminsi.” Yasobanuye ko mituweli ari ubwisungane bw’imiryango, nubwo hari imwe iba ifite ibibazo nko kwigiramo ibihazi, abana babyaye ibinyendaro n’ibindi nk’ibyo. Akaba yaravuze ko haramutse habayeho itegeko rivuga ko buri muntu yajya yitangira imisanzu ku guti cye byatesha agaciro bwa bwisungane bw’imiryango. Ati “ushobora gusanga nko mu rugo bafashe abantu bazi ko bakunda kurwara akaba ari bo gusa batangira imisanzu, abandi bakabareka.”Cyakora na we asanga itegeko ritoroheye imiryango ifite abana bakuru bayinaniye.

Abandi ngo bigora ni nk’abashakanye batandukanye ariko batarabona gatanya, abasore babyariye abakobwa bakemera abana gusa. Nubwo aba banyuma basabwa kuzana ibyemezo byo mu nzego z’ibanze hari abo bigora bitewe n’imikorere y’abayobozi babo.

Kuri depite Nyirarukundo Ignacienne, ikibazo kirahari ariko nticyahita gikemurwa ubu kuko byaba ari ugusenya umurongo mituweli yubakiyeho.Ati “koko natwe turabona ko imiryango ifite ibihazi yikoreye umutwaro uremeye, ariko nibihangane nta kundi, abantu bazakomeza kubiganiraho barebe niba hari icyahinduka, mu gihe mituweli yabaye imaze gushinga imizi neza.”
Ingingo ya 7 y’itegeko n° 03/2015 ryo ku wa 02/03/2015 rigenga imitunganyirize y’ubwisungane mu kwivuza, ivuga ko urugo rwishingirwa ari uko abarugize bose bamaze gutanga imisanzu mu bwisungane mu kwivuza. Iyo mu rugo hari umuntu ufite ubundi bwishingizi akaba agomba kubugaragaza muri mituweli.

Kaberuka Telesphore


Tanga igitecyerezo

Who are you?