Yashyizweho kuri 29 April, 2016 | 10:36

Hakenewe ingamba z’akarere mu guhangana n’ubwiyongere bwa malariya

Kurwanya malariya si ikibazo cy’igihugu cyane ko umubu utera malaria utagira ubwenegihugu. Akarere kose karasabwa gufata ingamba kuko kugabanya ubwiyongere bwayo bikozwe n’igihugu kimwe, bidakemura ikibazo kubera imiterere y’ibihugu n’iy’umubu by’umwihariko.

U Rwanda ruravuga ko rudashobora kurwanya indwara ya Malariya ngo icike burundu mu gihe icyiyongera mu bihugu birukikije byo mu Karere no muri Afurika yose muri rusange. Mu bushakashatsi bwamuritswe ku wa 22 Mata 2016, muri Kigali Serena Hotel, hagaragajwe ko Malariya mu 2015 itiyongereye gusa mu Rwanda, ahubwo ko yaniyongereye hose mu Karere, no ku mugabane.

Ubushakashatsi bwerekana byatewe n’imihindagurikire y’ikirere iturutse ku bwiyongere bw’ubushyuhe bwo ku Isi, gutemwa kw’ibiti, kwiyongera kw’inganda zihumanya ikirere n’ibindi. Amaze kumurikirwa ubwo bushakashatsi, Minisitiri w’Ubuzima Dr Agnes Binagwaho yavuze ko ibi biteye impungenge cyane, kuko Malariya iterwa n’umubu, kandi umubu uguruka ibirometero byinshi ku munsi ukajya aho ushaka. Yagize ati “Mwaba muzi ibirometero umubu ushobora gukora? Ushobora kuva kuri bine (4Km) kugeza kuri makumyabiri na bibiri (22 Km) ku munsi.” Aha Minisitiri yasobanuye ko umubu uba ushobora no gutera amagi arenga 200 mu gihe kiri munsi y’ukwezi, bityo Malaria ikongera ikabyuka aho bawuciye.

Lt Col Dr Jules Kabahizi, ushinzwe indwara z’imbere mu bitaro bya Kanombe harimo na Malaria, yabwiye Itangazamakuru ati “Umwaka wa 2015 twabonye ko Malariya yiyongereye cyane, yongera impfu, hiyongera abantu benshi barara mu bitaro ku buryo byabaye ikibazo kuko twifuzaga ko Malariya yaba zero mu gihugu cyose.”
Lt Col Dr Jules Kabahizi nawe ashimangira ko biruhije kumenya aho ubwiyongere bwa Malaria mu gihe hatigiwe hamwe icyakorwa ngo hafatwe ingamba rusange zo guca Malariya mu Rwanda no mu bihugu by’Akarere k’ibiyaga bigari. Yagize ati “Malariya ntishobora kuba zero mu gihugu itari zero mu bihugu duturanye no mu bindi bihugu kuko hari ubwo Malariya umuntu ayitwara ari ku rugendo rurerure, hari n’imibu rimwe na rimwe basanga yaba iri mu ndege, mu mato no mu mamodoka n’imibu ubwayo iragenda.”

Uyu muyobozi avuga ko ibi bitaro bya Kanombe byahangayikishijwe n’uko Malariya yongeye kwiyongera, biturutse ahanini n’ubwiyongere bwayo mu karere ka Afurika y’i Burasirazuba. Ku bwa Minisitiri w’Ubuzima, Dr Binagwaho yavuze ko iyi nama bayitezeho kwiga icyakorwa, Malariya ntiyongere kuba ikibazo ku buzima bw’abatuye Isi by’umwihariko u Rwanda.

PAX PRESS


Tanga igitecyerezo

Who are you?