Yashyizweho kuri 6 September, 2017 | 11:03

Gikondo: Bishyuzwa ubwiherero bw’ikigo nderabuzima

Abagana ikigo nderabuzima cya Gikondo baratangaza ko ku mafaranga bitwaza bagiye kwivuza bongeraho ayo kwishyura ubwiherero mu gihe babukeneye. Ibi basanga ari akarengane kuko ubusanzwe ivuriro ryagombye kutabwishyuza.

Ugitunguka mu marembo y’ikigo nderabuzima cya Gikondo, giherereye mu Karere ka Kicukiro, mu murenge wa Gikondo, uhita ubona aho ubwo bwiheherero buherereye. Abarwayi bahivuriza, ubona ko ari benshi, batangaza ko batanga amafaranga asanzwe yo kwivuza, ariko bagasabwa n’igiceri cy’ijana (100 Rwf) ku ruhande kugira ngo ushaka kubukoresha aze kubyemererwa. Bavuga kandi ko utayafite atagirirwa impuhwe, yewe akaba yakorera ahadakwiye ibikorerwa mu bwiherero, cyangwa akaba yabangamirwa mu rwego rwo kwanga gukwirakwiza umwanda hirya no hino.

Uwungirije Umuyobozi w’ikigo nderabuzima Madamu Uwamahoro Marceline yatangaje ko icyabateye gufata uwo mwanzuro ari uko mbere yo gutangira iyo gahunda bari bafite ubwiherero butajyanye n’igihe, kandi budafite isuku ihagije. Yagize ati ‘’Twafashe umwanzuro wo kujya twishyuza igiceri cy’ijana. Ni mu rwego rwo kugira ngo turusheho kunoza isuku.’’

Uwamahoro yongeraho ko ayo mafaranga abafasha kugura impapuro z’isuku, gutunganya amazi meza akoreshwa igihe uvuye mu bwiherero, ndetse akishyura n’umukozi ukoramo isuku kugira ngo hahorane isuku.

Ingengo y’imari idahagije

Ubuyobozi bw’ikigo nderabuzima buvuga ko guca ayo mafaranga atari ukutita ku barwayi bahabwa serivisi mbi, ahubwo ari amikoro adafashije y’ikigo. Uwamahoro agira ati ‘’Impamvu yabiduteye ni uko ingengo y’imari y’ikigo nderabuzima itabikora byose ngo ibirangize. Natwe abagenerwa bikorwa, tugomba gushyiraho akacu mu tuntu tworoheje .’’ Hagati aho ariko, hari abarwayi batabyishimira kubera ubushobozi buke, bakavuga ko byatuma bakora amakosa yo gukwirakwiza umwanda kubera nta mikoro.
Gusa ngo umurwaza cyangwa umurwayi, bitewe n’uwagiye mu bwiherero bwa mbere, agendera ku gatike kahawe umwe muri bo mbere (Ugiyeyo ahabwa agatike kugira ngo atishyuzwa uko asubiyeyo).

Nubwo binubira gucibwa ayo amafaranga, uwungirije Umuyobozi mukuru w’ikigo nderabuzima atangaza ko ibyo bitari muri gahunda ya Minisiteri y’Ubuzima, ahubwo ari agashya bihangiye ku kigo nderabuzima cyabo kugira ngo barusheho kunoza isuku. Agira ati “Nubwo benshi babyinubira kubera ubushobozi wenda buke, bazabona akamaro kabyo kandi nkeka ko batangiye no kubibona kuko iyo ubona ujya mu bwiherero ukagira ngo ni wowe ububanjemo kuva bwatangira gukoreshwa, bigaragaza impinduka nziza.”

Yongeyeho ko ikigo nderabuzima cya Gikondo, gikikijwe n’uduce dutuwe cyane bigatuma hivuriza umubare munini w’abarwayi.

Ndayisenga Clarisse


Tanga igitecyerezo

Who are you?