Yashyizweho kuri 25 May, 2018 | 07:38

Umuhungu wa Tito Barahira arahamya ko se nta Jenoside yakoze

Patrick Barahira ni umuhungu wa Tito Barahira wahoze ari burugumesitiri wa Komini Kabarondo muri perefegitura ya Kibungo mu gihe cya Jenoside yakorewe abatutsi mu w’ 1994 ; kuri ubu akaba akurikiranyweho icyaha cya jenoside yakorewe abatutsi.

Ni umuhungu mukuru w’imyaka hafi 40 ,avuga make nka se nkuko tubikesha Sehene Ruvugiro Emmanuel ,umunyamakuru ukorana na PAXPRESS uri i Paris aho akurikirana urubanza rwa Tito Barahira na Octavien Ngenzi bombi basimburanywe mu kuyobora Komini Kabarondo kuva muri 1977 kugeza muri 1994 ubwo habaga Jenoside yakorewe abatutsi.
Uyu muhungu wa Barahira nk’ uko amakuru aturuka i Paris abivuga ngo ni nawe wenyine wo mu muryango we umusura muri gereza dore ko nyina Jeane Murekatete yahise atandukana na se Barahira Tito nyuma ya jenoside yakorewe abatutsi.

Mu buhamya bwe Patrick BARAHIRA yatangiye aciye bugufi cyane kandi agaragaza akababaro k’ubwicanyi bwabaye mu Rwanda we avuga ko bwakorewe abatutsi, abahutu ndetse n’ abatwa .avuga ko yemenye ijambo Jenoside ari mu nkambi ya Benako muri Tanzaniya aho yari yarahunganye na se dore ko muri icyo gihe bahungaga umuryango wabo watatanye agahungana na se bonyine .
Yasabye ubutabera bw’ u Bufaransa ko uru rubanza rwacibwa mu buryo butabogamye aho kuri we yifuza ko ubu butabera bwaburanisha abakoze ibyaha « ibyaha byakorewe abatutsi , ibyaha byakorewe abahutu ndetse n’ ibyaha byakorewe abatwa . »

Ku birebana n’urubanza rwa Se , Patrick Barahira yabwiye urukiko ko akimara kumva ko Se akurikiranyweho icyaha cya Jenoside yakorewe abatutsi yabaye nk’ukubiswe n’ inkuba « sinashoboye kwiyumvisha ko uwo bavuga ari Papa, sinumvaga ko uwo bavuga ari we papa nzi kuko nziz neza ko ntarwango yigeze yerekana ku batutsi. »

Perezidante w’urukiko yabajije Madamu Simeoni yabajije Patrick Barahira niba yibuka uburyo bavuye mu Rwanda bahungira muri Tanzania mu nkambi ya Benaco.Mukumusubiza yagize ati « nt kiazo twigeze duhura nacyo duhunga. »,Yogeraho ko Se Barahira nta ntwaro nimwe yigeze atunga , yemwe n’umuhoro yabonaga ari uwo bakoreshaga mu kazi gasanzwe ko mu rugo.

Umwe mu banyamategeko bari muri urwo rubanza Madamu Aurélie BELLIOT, yabajije Patrick Barahira niba hari icyo azi kumyitwarire ya Se mu gihe cya Jenoside yakorewe abatutsi ,avuga ko nta byinshi yabivugaho cyane ko ngo yabonaga papa we hari iminsi yabaga atari mu rugo ariko akenshi ngo yabaga yagiye guhahira urugo ndeste no gukurikirana iby’imitungo ye n’umuryango .Abajjwe ishusho yumva yibuka kuri se yagize ati « Yari umuntu witaga ku muryango wacu cyane kuko yahoraga ahangayikishijwe n’ imibereho yawo ».Yongeraho ko se yabaye umuyobozi ukunzwe n’ abaturage kandi wubashywe .Agira ati « abantu bazaga kudusura iwacu mu rugo ariko nta na rimwe yigeze na rimwe ashaka kudushishikariza ibya politiki »Patrick Barahira avuga ko bahunze kuko FPR yari irimo isatira Kabarondo gusa ngo ntiyigeze abona umusirikare na rimwe ahubwo yumvaga urusaku rw’ imbunda .

Humviswe n’umuvandimwe we MUTABAZI

Ubuhamya bw’umuhungu wa Barahira bwakurikiwe n’ ubw’umuvandimwe we witwa Mutabazi watanze ubuhamya hifashishijwe ikoranabuhanga rya Video conference ari I Kigali. Mutabazi watangiranye no gusubiza ibibazo by’ ukuriye iburanisha Madame Simeoni , yabwiye urukiko ko atazi impamvu zavanye mukuru we k’ubutegetsi bwa Komini Kabarondo akagira ati « bishobora kuba bayarabayeho ku bushake bwe ».Uyu muvandimwe wa Barahira utuye i Kabarondo nanubu avuga ko nubwo yari atuye I Rugazi hafi na Cyinzovu ari naho Barahira yari atuye ,yabonaga mukuru we aho iwabo ariko ngo ntiyakundaga gukurikirana ibirebana n’ imirimo ye ya politiki.
Ku mpamvu ki we atahunze nk’umuryango wa Barahira kandi bari baturanye , Mutabazi avuga ko byatewe nuko yari arwaye muri icyo gihe .Iyo ngo ni nayo mpamvu yatumye atanitabira inama yabereye ku kibuga cy’ umupira cya Cyinzovu ndetse ko atazi uwari watumije iyo nama .Uyu muvandimwe wa Barahira kandi avuga ko nta wigeze amutera ubwoba cyangwa ngo amukomeretse mu gihe cyose yari i Rugazi kandi ko nta bwicanyi na bumwe yigeze agaragaramo ; ati « niberaga iwanjye mu rugo ».
Ku birebana n’ ubwicanyi bwakorewe muri Kiliziya ya Kabarondo Mutabazi avuga ko nawe yumvise bivugwa arikonyuma y’ igihe kirekire .
Avuga ko atibuka neza abaturage bari batuye ku musozi wa Rugazi kuko atashoboraga kubabara , gusa agashimangira ko nta bantu bishwe kuri uwo musozi wa Rugazi .
Gusa nyuma y’ ubu buhamya yibukijwe ko ibyo ari kuvuga byose abwira urukiko, ari naho yavuze ko atari azi ko urubanza ruri kuburanishwa dore ko asoza ubuhamya bwe yanasuhuje umuvndimwe we Tito Barahira baherukana mu w’1994 nkuko abisobanura .
Ku bibazo birebana n’amakuru avugwa ku mitungo ya Barahira , umutangabuhamya yabwiye urukiko ko Barahira yari afite amazu ndetse n’ ishyamba kandi ko ubu byose biri mu maboko y’ umuryango we ndetse bicunzwe na mwishywa we witwa Nsengimana utuye I Kabarondo .

Mutabazi avuga ko amakuru yuko umuvandimwe we yafashwe yayamenye mu gihe cya gacaca, yemwe ngo ni nabwo yamenye ko umwe muri bashiki be Juliette Tabita nawe yatawe muri yombi ariko ko atari azi impamvu.

Tito BARAHIRA aregwa mu rubanza rumwe na Octavien Ngenzi .
Urukiko rw’ I Paris mu Bufaransa rwari rwabakatiye igifungo cya burundu mu kwezi kwa karindwi kwa 2016 bahita bajuririra iki cyemezo cy’urukiko ari narwo rubanza rwatangiye kuburanwa kuva tariki ya 02 Gicurasi kugeza tariki ya 06 Nyakanga 2018.

Umuhire Valentin


Inkuru ku rubanza mu bujurire rwa Tito Barahira na Octavien Ngenzi, PAX PRESS, Umuryango nyarwanda w’abanyamakuru baharanira amahoro urarukurikirana umunsi ku munsi, binyuze ku munyamakuru ukorana na PAX PRESS, SEHENE Ruvugiro Emmanuel, uri I Paris mu Bufaransa.


Tanga igitecyerezo

Who are you?