Yashyizweho kuri 24 July, 2017 | 09:47

Uko kwiyamamaza kurimbanije ni nako ubwitabire bw’abumva imigabo n’imigambi y’abakandida bwiyongera

Uko igihe cyo kwiyamamza kigenda gisatira umusozo ni nako umubare w’abitabira kwamamaza, kumva imigabo n’imigambi by’abakandida bagenda biyongera. abamamaza kandida Kagame wa FPR bahora ari benshi. Nyamara mu minsi ya mbere abakandida Mpayimana Philippe na Habineza Frank ntibabonaga abitabira ukwiyamamza kwabo bahagaije. Bamwe bavugaga ko hamwe na hamwe abayobozi b’inzego z’ibanze babangamira ibikorwa byabo. Ubu aho icyo kibazo gihagurukiwe abaza kubumva bariyongera.

Biragoye kuvuga umubare nyakuri w’abaza kwitabira aho FPR yaje kwamamaza umukandida wayo Kagame Paul. Abantu aba ari benshi cyane, imyiteguro ikorwa kare ndetse n’abantu bakazinduka bajya kumwitegura cyane ko gahunda z’abiyamamaza ziba zizwi.

Nyamara mu ntangiriro, abandi bahanganye nawe bavugaga ko bo ubwitabire bw’abaza kumva imigabo n’imigambi buri hasi, ndetse rimwe na rimwe gahunda za bamwe zigakorwa mu nkokora no kujirajizwa, ntibakorere aho bari bateganije gukorera mbere. Bikagaragara nko kubakoma mu nkokora kuri gahunda bari barapanze nk’uko Habineza Frank wa Green Party yabitangarije itangazamakuru ubwo bamwe mu bamotari bamwitambikaga i Nyagatare, ndetse agashyirwa n’ahandi hatari aho yari yateganirijwe kwiyamamariza.

Mu kiganiro yagiranye n’abayobozi b’intara, uturere twose tw’igihugu n’Umujyi wa Kigali ku wa 20 Nyakanga 2017, hifashishijwe ikoranabuhanga rya ‘video conference’, Minisitiri w’ubutegetsi bw’igihugu Kaboneka Francis yabasabye gukora uko bashoboye ku buryo abiyamamaza bahabwa amahirwe angana, abaturage bakazihitiramo ubabereye. Yagize ati “Abayobozi bareke abaturage bumve ibitekerezo by’abakandida batandukanye kugira ngo bagire amahirwe yo guhitamo icyo bifuza, uwo bazatora bashingiye ku bitekerezo bye. Nkaba naboneraho umwanya wo gusaba inzego z’ibanze, ababikoraga mbasabe ko babihagarika, ariko nanasabe inzego zibishinzwe ko aho byagaragaye bakora iperereza, uwo bigaragayeho abe yabihanirwa.”

Nyuma y’aya magambo, Sinamenye Jeremie, umuyobozi w’akarere ka Rubavu n’umunyamabanga nshingwabikorwa w’umurenge wa Busanze muri Nyaruguru batawe muri yombi na Polisi y’u Rwanda kuri uyu wa gatanu tariki 21 Nyakanga 2017 nk’uko byatangajwe n’ Umuvugizi wa Polisi y’u Rwanda , ACP Theos Badege, abinyujije ku rukuta rwayo rwa Twitter. Kuri uru rubuga kandi umuvugizi wa Polisi, ACP Theos Badege yibukije ko abakandida bose bafite uburenganzira bungana imbere y’amategeko kandi ko bose bakwiye kubahwa.

Ibi kubakurikirana amatora bavuga ko ari byiza kuko naho umwenegihugu yaba afite uwo ashyigikiye ariko bitamubuza kuba yakumva imigabo n’imigambi y’abandi bakandida kuko buri wese agira agashya ke. Nyuma y’izi ngamba, amafoto agaragazwa na bimwe mu bitangazamakuru byo mu Rwanda bikurikirana ukwiyamamza kw’abakandida aragenda agaragaza ubwitabire butandukanye n’ubwa mbere ku bakandida Mpayimana na Habineza dore ko kuri kandida kagame ho umubare w’abitabira atari ikibazo.

Ibikorwa byo kwiyamamaza ku bakandida batatu bemewe n’amategeko byatangiye ku wa 14 Nyakanga 2017, bikazarangira ku wa 3 Kanama bucya haba amatora. Abiyamamaza ni o ni Mpayimana Philippe wigenga, Dr Frank Habineza watanzwe n’Ishyaka Democratic Green Party of Rwanda na Paul Kagame watanzwe na FPR inkotanyi.

Amatora ateganyijwe ku wa 3 Kanama 2017 ku Banyarwanda baba mu mahanga no ku wa 4 Kanama 2017 mu Rwanda.

Pax Press


Tanga igitecyerezo

Who are you?