Yashyizweho kuri 13 June, 2016 | 10:48

Serivisi za MAJ ntizifasha abaturage uko bikwiye kuko batazizi

Isuzuma ry’uko abaturage babona imiyoborere ibabereye n’imitangirwe ya serivise mu nzego zibegereye (Citizen Report Card/CRC), ryerekanye ko abaturage bishimiye imitangire ya serivisi z’ubutabera ku gipimo cya 76.7%. Mu byifuzo byabo ariko, basabye ko serivisi za MAJ zarushaho gukorerwa ubuvugizi bakazimenya kurushaho.

Mu turere 30 twakozwemo ubushakashatsi, 19 muri two abaturage bagaragaje ko bishimiye serivisi z’ubutabera ku kigero kiri hejuru ya 75%, naho mu turere 11 abaturage bagaragaza ko bishimiye izi serivisi ku rugero ruri hagati ya 50% na 75%.
Abaturage kandi babajijwe uko bishimiye serivisi zitandukanye bahabwa mu butabera zirimo serivisi z’abunzi, serivisi za MAJ, kwihutisha imanza, kurangiza imanza, gukora ubukangurambaga mu kumenyekanisha amategeko n’uburenganzira bwa muntu.

Abakabakaba 75% ntibazi MAJ

MAJ (Maison d’Accès à la Justice) ni urwego rwashyizweho na Minisiteri y’Ubutabera rushinzwe gufasha abaturage batishoboye, rubunganira mu mategeko kugira ngo babashe kubona ubutabera nyabwo nk’abandi banyagihugu.

Mu babajijwe, abagera kuri 74.4% bavuze ko batazi icyo uru rwego rukora. Abashimye MAJ ni 23.4%, naho abarunenze ni 2.2%. Basabye ko uru rwego rwamanuka rukegera abaturage kuko ari bo rushinzwe gufasha.

Hagati aho ariko, abaturage bashimye cyane serivise z’abunzi (79%), kwihutisha imanza (76.6%), kurangiza imanza (74.8%), ubukangurambaga mu kumenyekanisha amategeko n’uburenganzira bwa muntu (64.9%).

Ruswa ntijya icika

Nubwo habaho ibikorwa byinshi byo kurwanya ruswa, gucika si ibya hafi. Mu babajijwe, abagera ku 10.8% bavuze ko bahuye n’ikibazo cya ruswa mu gihe baganaga inzego z’ubutabera. Mu karere ka Nyagatare, abari hejuru ya 25% bavuze ko bahuye n’ikibazo cya ruswa mu gihe basabaga serivisi z’ubutabera. Mu turere umunani (Rubavu, Karongi, Burera, Gicumbi, Rwamgana, Nyanza, Nayamagabe na Nyaruguru), naho abaturage bahuye n’ikibazo cyo gusabwa ruswa ubwo basabaga serivisi z’ubutabera bari ku kigero kiri hagati ya 15 na 20%. Mu gihe cy’amezi 12 gusa, iyi mibare si mito.

Abatangaje ko bahuye n’akandi karengane mu nzego z’ubutabera bo bageraga kuri 19.5%, ikimenyane ku kigero 12.7%, naho abahuye n’ikibazo cy’amacakubiri bo bagera ku kigero cya 7.5%.

Mu matsinda yakozwe mu gihe cy’ubushakashatsi no mu gikorwa cyo kugaragaza ibyavuyemo, abaturage babajijwe bagaragaje ibikwiye kwitabwaho kugira ngo harusheho kunozwa serivise z’ubutabera, birimo kwiga uburyo irangizwa ry’imanza ryakwihuta kurushaho, gukomeza ubukangurambaga ku rwego rwa MAJ no gukomeza ibikorwa byose bigamije guca ruswa n’akarengane bikirangwa mu nzego z’ubutabera.

Ubu bushakashatsi bwakorewe ku ngo zigera ku bihumbi cumi na kimwe na cumi n’eshatu (11.013) mu turere twose uko ari 30, imirenge 326, imidugudu 733.

Higiro Adolphe


Tanga igitecyerezo

Who are you?