Yashyizweho kuri 22 September, 2016 | 16:00

Rwaniro: Bamwe mu bunzi bashinjwa kubogamira ku bifite iyo bakemura ibibazo

Bamwe mu baturage batuye mu murenge wa Rwaniro, akarere ka Huye mu ntara y’Amajyepfo bavuga ko uburyo bamwe mu bunzi bakemuramo ibibazo butuma bashidikanya ku butabera babaha, kuko ngo “utifite” ashobora kurenganywa kandi ari mu kuri. Gukora badahembwa biratungwa urutoki.

Kabayiza Joseph ni umugabo utuye mu kagali ka Kamwambi mu murenge wa Rwaniro. N’agahinda kenshi, asobanura uburyo ikibazo kijyanye n’imitungo yaburanaga n’umuvandimwe we basangiye Se gusa rwarangiye ariko we akaguma mu gihirahiro kuko yabanje kwimwa imyanzuro yarwo. Agira ati “Natse imyanzuro barayinyima, nyuma yaho umwanditsi w’Abunzi mbona ayinzaniye mu rugo, nsanga baransinyiye kandi ibyo navuze bimwe baranze kubyandikamo. Ubwo se ikibyihishe inyuma ni iki?”

Kabayiza avuga ko yabajije uwamuzaniye imyanzuro mu rugo impamvu bamusinyiye, undi amusubiza ko “bashakaga ko biva mu nzira bagakurikirana n’ibindi bibazo.” Ubu ngo ategereje kubanza kujya ku ushinzwe irangamimerere mu murenge akamugisha inama akabona kugira ikindi atekereza yakora.
Si Kabayiza gusa, undi mubyeyi wo mu kigero cy’imyaka 50 avuga ko nawe yasanze Abunzi baramusinyiye ku myanzuro kandi bataramubuze ndetse bitanemewe. Nawe arabakemanga agira ati “ Ubuse iyi ni imikorere nyabaki? Njyewe ubanza ari uko ntacyo ngira, uku ni ukudusuzugura. Barambindikiranyije bakemura ikibazo bakigoretse.”

Akomeza avuga ko asanga ubutabera buturutse ku Bunzi badahembwa ari ubwo gukemangwa kuko bakorana n’ubafasha kugaruza umwanya bataye bunga cyangwa baburanisha abafitanye ibibazo.

Udahembwa arihemba …

Bamwe basanga imikorere idahwitse ya bamwe mu Bunzi iterwa n’uko bakora badahembwa. Itegeko no37/2016 ryo ku wa 08/09/2016 rigena imitunganyirize, ifasi, ububasha n’imikorere bya komite y’Abunzi, mu ngingo yaryo ya 4 rigira riti “Umurimo w’abagize Komite y’Abunzi ni umurimo w’ubwitange kandi udahemberwa.”

Hari abasanga kuba Abunzi badahembwa ari intandaro kuri bamwe yo gushaka uko bihemba, bityo ubutabera bugahabwa abafite icyo batanga. Kabayiza agira ati “Hari ubwo usanga urubanza ari arucabana ariko wareba uko rucyemuwe ukumirwa. Uhita ubona nyine ko utsinze hari icyo yatanze ngo atsinde, nawe wabona uzahora usiragira ukabyihorera.”

Umunyamabanga nshingwabikorwa w’umurenge wa Rwaniro, Sebarinda Ferederiko ntahakana ko hari abagiye barangwaho iyo myitwarire idahwitse, ndetse bakaba barayihaniwe. Atanga urugero rw’abo bafatiye mu cyuho bayakira ku murenge.Agira ati “Ubwo bari bagiye gutangaza imyanzuro y’urubanza, babiri mu Bunzi bihereranye mu cyumba cy’umurenge n’umwe mu bari bagiye gusomerwa barifungirana, mugenzi wabo bamuheje. Yarabikemanze arabitumenyesha, tugiye tubafatira mu cyuho bari guhabwa ruswa.” Umwe yari yahawe ibihumbi makumyabiri (20.000 frw), ariko undi abonye agiye gufatwa arayajugunya atoragurwa n’undi muntu wihitiraga.
Itegeko rivuga ko amafaranga cyangwa indi mpano byahabwa Umwunzi kugira ngo "ace urubanza" mu buryo bwumvikanyweho n’umwe mu baburana, yitwa ruswa.

Komite y’Abunzi ku rwego rw’Akagari ifite ububasha bwo gusuzuma ibibazo byose by’imbonezamubano byerekeranye n’umutungo wimukanwa n’utimukanwa n’izungura kuri iyo mitungo mu gihe agaciro kabyo katarengeje miliyoni eshatu z’amafaranga y’u Rwanda (3.000.000 Frw); kutubahiriza amasezerano yakozwe hagati y’abantu ku giti cyabo, iyo agaciro kayo katarengeje miliyoni eshatu z’amafaranga y’u Rwanda (3.000.000Frw), n’ibibazo by’umuryango uretse mu gihe igisabwa ari ugufata icyemezo ku irangamimerere y’abantu.

Higiro Adolphe


Tanga igitecyerezo

Who are you?