Yashyizweho kuri 28 August, 2018 | 09:09

Rulindo:Abagore barasaba abadepite bazatorwa ubuvugizi ku byiciro by’ubudehe

Mu gihe hasigaye icyumweru ngo hatorwe abadepite b’abagore 30% bazabahagararira mu nteko ishingamategeko, bamwe mu bagore bo mu karere ka Rulindo intara y’Amajyaruguru barasaba abazatorwa kuzakora ubuvugizi ku byiciro by’ubudehe batanyuzwe nabyo. Bavuga ko abagore bazatorwa bazakurikirana uko ibyiciro by’ubudehe byanozwa kuko bibagiraho ingaruka.

Mu gikorwa cyo kwiyamamaza kw’abakandida depite icyiciro cy’abagore mu mu Karere ka Rulindo umurenge wa Bushoki cyabaye kuri uyu wa kane tariki ya 23 Kanama 2018, bamwe mu bagore bibana bo muri ako Karere basabye abakandida depite bazatorwa ubuvugizi ku byiciro by’ubudehe bavuga ko bitajyanye n’amikoro yabo.

Mukandungutse Jacqueline atuye mu murenge wa Rusiga. Avugana ikiniga yavuze ko asaba abazatorwa kuzamura abagore cyane cyane abibana bakavanwa mu byiciro bashyizwemo bibasumbije ubushobozi. Agira ati: ”Icyo numva cya mbere bashyira imbere ni ukuzamura umugore. Ikintu mbona bamarira cyane nkajye mba mu cyiciro cya gatatu kandi mbona ntagishoboye nshobora kugira umwana ujya kwiga muri Kaminuza. Kubera ubushobozi bwanjye akananirwa kujyayo” . Avuga ko adakwiriye kujya mu cyiciro cya gatatu aho atabona amafaranga yo kwishyurira umwana muri Kaminuza. Arasaba cyane abagore bazatorwa kureba kuri ibi byiciro kuko ni ikintu kibabangamiye.

Ahobantegeye Valentine nawe atuye mu kagali ka Nyirangarama amaze igihe kitari gito yibana. Aravuga ko kuvugururwa kw’ibyiciro by’ubudehe bizatuma abasha guhabwa serivisi zimuteza imbere. Ati: ’’Nagerayo akamaro nifuza ko azamarira ni uko batuvuganira twebwe abagore,nk’ubu ndibana maze imyaka 14.banshyize mu cyiciro cy’ubudehe cya gatatu ngo ni uko mfite inzu mbamo. Nta karima nta sambu ngira nta tungo mbayeho gikene. Mu by’ukuri icyiciro cya gatatu singikwiriye”. Valentine we yifuza kujya mu cyiciro cya kabiri akabona inguzanyo muri VUP nk’abandi akiteza imbere.

Ubuvugizi ku byiciro burashoboka

Dr Kayumba Christopher impuguke mu bya politiki arasobanura uruhare rw’abadepite mu gukemura ikibazo cy’aba baturage batakiriye neza ibyiciro by’ubudehe n’inzira binyuramo kugeza ikibazo gikemutse. Abisobanura atya ’’Birashoboka ko abadepite koko bavuganira abo baturage kuri icyo kibazo. Byanyura mu nzira yo guhamagaza minisitiri ubishinzwe ariwe minisitiri w’ubutegetsi bw’igihugu akabisobanurira inteko uko byakozwe. Inteko itanyurwa ikamutegeka ko byasubirwamo. Bitakorwa hagatumizwa minisitiri w’intebe .’’

Ubusanzwe kugirango urugo rujye mu cyiciro cy’ubudehe bareba ibisabwa. Iyo babyibeshyeho urwo rugo rurajurira kugirango rujye mu kindi cyiciro.Gusa benshi bemeza ko uburyo abantu bashyirwa mu byiciro bikwiye kunozwa. Ibyiciro by’ubudehe bivuguruye byatangajwe mu 2016 bamwe mu bagore batanyuzwe nabyo bakaba bateze ubuvugizi ku bagore b’abadepite mu nteko ishingamategeko bazatorwa muri manda ya 2018-2023 kuwa 4 Nzeri 2018.

Nyirangaruye Clementine


Tanga igitecyerezo

Who are you?