Yashyizweho kuri 29 August, 2018 | 11:53

RUHUHA: Baracyafite inyota ku gusobanukirwa imigendekere y’amatora

Mu gihe imyiteguro y’amatora y’Abadepite ateganyijwe muri Nzeli umwaka wa 2018 ikomeje, abatuye mu Murenge wa Ruhuha mu Karere ka Bugesera bo baracyafite inyota yo gusobanukirwa imigendekere myiza yayo.

Mu kiganiro n’itangazamakuru abaturage b’Umurenge wa Ruhuha bagaragaje amatsiko bagifite, ngo basobanukirwe ibyitabwaho mu gihe cy’amatora. Mu bitekerezo bitandukanye bagarutse ku byo basanzwe bazi ku matora bibukiranya, ndetse banaboneraho kugaragaza aho batarasobanukirwa neza kugeza ubu.

Kawera Angélique utuye mu Kagari ka Gikundamvura, we avuga ko atari azi neza ibisabwa ngo umunyarwanda abashe kuba yakwiyamamariza kuba Umudepite.
Ati" Nzi ko Abadepite ari intumwa za rubanda, ariko sinzi neza niba nanjye nk’umuturage nakwiyamamaza bakantora kuko akenshi tubatora mu bari basanzwe ari abayobozi."

Amatsiko si ayo kumenya gusa ibisabwa umukandida nk’uko Ndimubanzi Céléstin we yabigaragaje, agira ati "Batubwiye ko amatora ateganyijwe mu minsi itatu ariko nkanjye numva ko n’umunsi umwe waba uhagije nk’uko tubigenza mu yandi."
Amatora y’Abadepite azakorwa mu minsi itatu nk’uko biteganyijwe ko hagomba guhuzwa ibizava mu majwi y’abazatorera hanze y’Igihugu (Diaspora) n’azakusanywa mu byiciro bitandukanye by’abagomba gutorerwa imbere mu gihugu, abatowe bose bagatangarizwa rimwe.

Umuhuzabikorwa wa Komisiyo y’amatora mu Murenge wa Ruhuha, Ngarambe Félix, asobanura aho imyiteguro y’amatora bayigejeje, yagarutse ku byo abaturage bibaza ngo babashe gushira amatsiko. Ati "Twamaze gukosora liste y’itora ubu yoherejwe i Kigali ngo izagaruke ari ntakuka, mu nteko z’abaturage no mu nama za nyuma y’umuganda dukangurira abaturage kuguma mu myiteguro y’amatora ngo azagende neza. Aha tubibutsa kwikosoza kuri liste y’itora ndetse tunabasobanurira impamvu zo kwitorera Abadepite nk’intumwa za rubanda, zifite mu nshingano kubagerera aho batigerera nk’abaturage.”

Yakomeje avuga ko kandidatire (candidatures) zarangije kwakirwa na Komisiyo y’Igihugu y’amatora, ku wa 25 Nyakanga 2018. Kuva tariki ya 13 Kanama kugeza ku ya 1 Nzeli hateganyijwe ibikorwa byo kwiyamamaza ku bakandida bazaba baremewe.

Abaturage kandi basobanuriwe ibisabwa umuturage mu kwitabira amatora, harimo kuba uri umunyarwanda wujuje imyaka cumi n’umunani, kuba utarahamijwe ibyaha n’Inkiko cyangwa utarakatiwe amezi kuva kuri atandatu kuzamura. Hari kandi n’imwe mu miziro yabuza umuturage kwemererwa gutora no gutorwa nk’uko byaganirijwe abitabiriye iki kiganiro, harimo kuba umuturage atari impunzi cyangwa ngo abe yararekuwe ariko atarasabye gukurwaho ubusembwa.

Umunyamabanga nshingwabikorwa w’Umurenge wa Ruhuha, Umulisa Marie Claire, agaruka ku byo abaturage batarasobanukirwa yagize ati “Ni byiza ko mufite inyota yo kumenya byinshi, biragaragaza ubushake mufite bwo kwitorera Abadepite nk’abo muzatuma mu nzego zo hejuru. Nkaba mbasaba kujya mwitabira inteko y’abaturage n’izindi nama iwanyu mu midugudu, bityo hamwe n’inzego z’ibanze mu bufatanye na Komisiyo y’amatora muzakomeza kuhasobanurirwa n’ibindi mukibaza. Ndetse n’ibikorwa byo kwiyamamaza ni mwe bigenewe ngo mwumve icyo mutegereje ku bifuza gutorerwa kuba Abadepite, munabamenye ku buryo twese tuzaba twabucyereye ku munsi w’itora kandi dusobanukiwe.”

Amatora y’Abadepite ateganijwe ku matariki ya 2, iya 3 n’iya 4 z’ukwezi kwa Nzeri. Hakazabanza gutora abanyarwanda bari hanze y’Igihugu (Diaspora), hanatorwa uzahagararira abafite ubumuga ku itariki ya 2 Nzeri. Amatora ku banyarwanda bari mu gihugu azaba ku wa 3 Nzeri hatorwa Abadepite 53 bazava mu mu mitwe ya politike no mu bakandida bigenga, naho ku itariki ya 4 Nzeri hazatorwe Abadepite 24 bazahagararira 30% y’abagore mu Nteko ndetse na babiri bazahagararira urubyiruko; bose hamwe bakuzuza Abadepite mirongo inani bahagararira abaturage mu Nteko Ishingamategeko.

Umubyeyi Nadine Evelyne


Tanga igitecyerezo

Who are you?