Yashyizweho kuri 18 June, 2019 | 14:14

Nyuma y’urubanza rwa Rukeratabaro mu bujurire, abafashwe ku ngufu barishimira ko bahawe ubutabera

Nyuma yo guhamwa n’icyaha cyo gufata ku ngufu muri jenoside abayirokotse cyane abafashwe ku ngufu I Rusizi bavuga ko bishimiye igihano cyahawe Rukeratabaro kuko atari yaragihanweho mbere. Ikindi ngo bigaragaza koko ko icyo cyaha cyakoreshejwe nk’intwaro ya jenoside. Ku banyamategeko ngo uku guhamwa iki cyaha si inyungu gusa ku barokotse jenoside ni n’inyungu ku butabera.

Mu rubanza rwa Rukeratabaro Théodore urugereko rwa mbere I Stockhlom muri Suède, yari yakatiwe gufungwa burundu ariko ntiyahanywa icyaha cyo gufata abagore ku ngufu. Ibi byatumaga abarokokeye cyane cyane ku Winteko b’igitsinagore, bavuga ko n’ubwo yahamwe n’icyaha cya Jenoside ariko bo bumva batahawe ubutabera bwuzuye. Mu rubanza rw’ubujurire rwapfundikiwe mu kwezi kwa kane 2019, hanzuwe ko akomeza gufungwa burundu ariko mu byaha yahamijwe harimo n’icyo gufata ku ngufu. Abarokotse Jenoside yakorewe abatutsi mu karere ka Rusizi bavuga ko nibura ubutabera bwashishoje.

Bamwe mu bakecuru bo mu mirenge ya Mururu na Gashonga cyane cyane ahitwa Winteko, Mibilizi ndetse na Nyakanyinya, bavuga ko byari bitunguranye kubona atari yahamijwe icyo cyaha bagendeye by’umwihariko ku byabereye aho avuka, yari anafite akabari. Umwe muri bo ati “njye ntabwo nari kuzumva ko nabonye ubutabera bwuzuye kuko ibyo yadukoreye…. kereka Imana yonyine, niyo yabimubaza”.
Ku Winteko hari hari icyiswe bulende, yakusanyirizwagamo abagore n’abakobwa ari ho babasangaga bagafata ku ngufu bamwe abandi bakicwa. Iyi Bulende yari inzu isanzwe y’umwe mu “nterahamwe”, yashyirwagamo abagore bizeye ko ari ukubakiza ariko icyari kigamijwe ari ukubasambanya mu gihe bavuye kwica abandi batutsi.
Kuri Nkusi Vedaste, ngo abarokokeye ku Winteko bazi byinshi byaberaga muri Bulende. Agira ati “byari bitangaje kubona ibyo yakoze tukumva ngo ntiyahamwe n’icyaha cyo gufata ku ngufu. Abagore bashyirwaga muri bulende bafite ubuhamya bwinshi”.

Umwe mu barokokeye ku Winteko(ubu ni umukecuru), avuga ko ubundi uwakumva bulende, yakumva ahantu hatekanye umuntu yaboneye ubuhungiro ariko si ko byari bimeze. Agira ati “Barahadushyiraga turi igitsinagore gusa, ku mugoroba bakaza gukuramo abo bafata ku ngufu mbere yo kubica. Ndibuka umukobwa wanze ko bamufata ku ngufu, baramutemagura bamusiga bazi ko yapfuye. Ubwo uwo kumubwira ko Théodore yabaye umwere ku cyaha cyo gufata ku ngufu, si agashinyaguro koko? Bumvise amaganya yacu”.

Inyungu ku butabera

Abanyamategeko bavuga ko ibi bifite icyo bivuze ku butabera n’ubwo atari bishya, kuko ubu hashobora kuboneka abo bareganwa, bigafasha kwihutisha urubanza bigendeye ku rugero rw’urubanza rwa Rukeratabaro n’ubwo icyaha ari gatozi (jurisprudence). Juvens Ntampuhwe, umunyamategeko akaba n’umukozi w’umuryango RCN Justice et Démocratie, agaruka ku guhamywa iki cyaha kwe n’ubwo bitahinduye igihano yari yahawe.

Agira ati “Uretse ubutabera bwahawe abafashwe ku ngufu, ariko binashimangira uruhare rwe muri Jeoside yakorewe abatusi. Ibi kandi bigaragaza ko koko n’ubwo umuryango mpuzamahanga wemeje gufata ku ngufu nk’intwaro yifashishijwe muri jenoside yakorewe abatutsi ariko bitanga isura y’uko hirya no hino mu Rwanda byakozwe koko. Ni ikintu gikomeye ku butabera bw’abahemukiwe”.
Rukeratabaro Théodore kuwa 27/6/2018, yakatiwe igifungo cya burundu ari nacyo kinini kiba muri Suède, ashinjwa ibyaha by’ubwicanyi n’ibyaha bya jenoside yakorewe abatutsi. Gusa icyaha cyo gufata ku ngufu nticyamuhamye. Nyuma yaho yarajuriye asaba kugabanyirizwa igihano, n’ubushinjacyaha bujurira busaba ko yashinjwa n’icyaha cyo gufata ku ngufu. Birangira ku itariki ya 29/4/2019 urukiko rw’ubujurire rugumushijeho igihano yari yahawe, runamuhamya icyaha cyo gufata abagore ku ngufu.

Musonera Sosthène


Tanga igitecyerezo

Who are you?