Yashyizweho kuri 16 June, 2016 | 14:56

Nyarusange: Abakuru barashinja iterambere kurarura abato

Abaturage bakuze mu murenge wa Nyarusange barashinja itermabere kuba intandaro y’ukuraruka kw’abana babo. Ngo ni nyuma y’uko abana b’abakobwa benshi muri ako gace basigaye bagaragaraho kubyara bakiri mu rugo.

Imbere y’iduka ryanditseho KZG mu ibara ry’ubururu, kuri santeri y’ubucuruzi ya Nyarusange, ku myaka ye 20, SK aronsa akana k’agakobwa kari mu kigero cy’umwaka umwe. Hirya ye gato, biragoye kumenya ibara ry’imyenda y’ubwana nka bune bw’indahekana bwabaye ba “rukujuju” kubera ivumbi. Aba bana si abe. Ariko kimwe n’uwe akikiye, na bo ba se ngo ntibazwi. “Iyi ni indwara imenyerewe ino. Kubona umukobwa utarabyariye iwabo ni ikizami gikomeye!” Agahinda umubyeyi Mukeshimana Imakulata avuganye aya magambo, ubwako kagaragaza ko iki kibazo gishobora kuba cyarafashe intera ndende. Nk’uko binumvikana mu kanwa k’umukecuru w’imyaka 65, Anyesi Nyirahabineza, we utunga agatoki Leta. Agira ati “ Leta ni yo yabahaye agaciro ngo nibabyare (…) Ubuyobozi ni bwo buduteje abakobwa b’ubu”, ngo kuko iyo ababyeyi bavuze, abana navuga ko bagiye kubarega.

Ngo ni amajyambere!

Ubu mu murenge wa Nyarusange, hari ingo zifite nk’abakobwa 3 bose babyariye iwabo. Bivugwa kandi ko umwe ku bakobwa batatu aba yarabyaye. Aho ihagamye hagati ya Nyabarongo n’imisozi miremire ya Karongi-Kibuye, hakurya, n’ibisi bigizwe n’imisozi ya Muhanga, Mushubati, Kanyarira na Saruheshyi, hakuno, Nyarusange ngo igezweho n’izuba ry’amajyambere vuba aha. Kimwe no mu bindi byaro by’u Rwanda, ngo abana b’i Nyarusange barangwaga n’uburere no gutinya kwiyandarika, kubera igitsure cy’ababyeyi. Ni uku Mukeshimana, Nyirahabineza n’abandi barezwe! Mukeshimana yibuka ko “umukobwa wabyariraga iwabo yabaga yataye ibara! Twabumvaga iyo kure, ino ntibyahabaga!”

Bukeye demukarasi iraza, haza umuhanda w’umukara, utubari ku muhanda, abakobwa bakora imirimo imwe na basaza babo…Amajyambere araza! “Ubusirimu bwahageze butinze, maze benshi babwitabirana ubujiji…ubusirimu ntibukuraho kirazira!” Nyandwi Karoli avuga ibi asobanura ko amabuye y’agaciro n’indi mishinga yazanye amafaranga i Nyarusange byahaye urubyiruko “ubwigenge ku babyeyi” no mu bukungu, bituma bitaza igitsure na kirazira byabo. Umusore umwe we abikabiriza agira ati “iyo umukobwa yiguriye icupa ku kabari, akihagarika ahagaze nk’abahungu, haba hasigaye iki?” Ibi ngo bituma wa mukobwa atinyuka ibyo yari abijwe byose. Wa wundi na we udafite ubushobozi akabushakira ku bagabo ngo “amere nk’abandi bagenzi, biyambika, barya kandi banywa neza”. Ibi ni byo Nyandwi asanga byarambuye ababyeyi imbaraga ku burere bw’abana, “byibagije ababyeyi igitsure, n’urubyiruko ubupfura…ngo ni amajyambere!”

Guhana no gufunga

Mu gihe hari ababyita ngo ni amajyambere, abandi ngo ni ibishuko, umukecuru Nyirahabineza asanga babeshya. Agira ati “ ese bamushuka none, umwaka utaha bakongera bakamushuka, noneho n’ukurikiyeho na wa wundi yabyaye agashukwa? Abo bana, uri se uri nyina, wagira ngo uravuze ati jyewe ngiye kukurega…Ahubwo (…) Leta ni yo yabahaye agaciro ngo nibyare, twe kuvuga twebwe nk’ababyeyi…Ubuyobozi ni bwo buduteje abakobwa b’ubu”. Ngi ni na yo rero ikwiye no gufata ibyemezo.

Ubuyobozi bw’umurenge wa Nyarusange bwo ariko busanga “uburemere bw’iki kibazo busaba kongera kwigisha n’ubukangurambaga”, hari abaturage bashira amanga bakavuga abakobwa n’abagore biyandarika bakwiye gufatirwa ibihano. Umukecuru asanga kubera gukunda iraha no gucira mu nda utwo abahungu babahaye, ngo “abakobwa b’ubu baba baba ku kabari, n’abadamu ni uko (…) kugeza ubwo saa sita, ku manywa y’ihangu, bajya gukora ubwenge [ndlr.gusambana], abantu babaha induru”. Kubera aya mahano, asanga “hakwiye gufatwa ingamba zikomeye zirimo no gufata no gufunga abagore n’abakobwa nk’abo banarara bagenda”.

Iri fatwa n’ifungwa, cyangwa se ibihano muri rusange bihuriweho na bamwe mu bantu bakuze bo muri Nyarusange, biravugwa mu gihe harimo n’abanenga umushinga uha inka buri mukobwa wabyariye iwabo. Nubwo bemera ko bifasha “abo bana b’ibinyandaro n’imiryango ya ba nyina”, hari abasanga ngo byatuma n’umukobwa utashakaga kubyarira iwabo abikorera kubona iyo nka. Mukeshimana aribaza ati “wabyariye mu rugo; umwana wabyaye na we aratwite…”. Ni icyorezo, kigamije iraha no kugabirwa inka.

Sehene Ruvugiro


Tanga igitecyerezo

Who are you?