Yashyizweho kuri 7 March, 2017 | 08:13

Nyabihu: Ingingo zimwe z’itegeko rigenga abantu n’umuryango rirabangamirwa n’umuco n’ imyemerere

Itegeko rishya rigenga abantu n’umuryango ryasohotse ku wa 28/08/2016. Mu ngingo yaryo ya 209 rivuga ko”abashyingiranywe bafatanya ubuyobozi bw’urugo rwabo harimo kurwitaho kugira ngo rugwize umuco mwiza n’ibirutunga no kurwubaka rugakomera. Umwe mu bashyingiranywe yiharira iyo nshingano iyo undi adashobora kuyikora. Iyo batabyumvikanyeho byemezwa n’inzego zibifitiye ububasha.”

Bamwe mu baturage bo mu murenge wa Rurembo mu Karere ka Nyabihu,bemeza ko iri tegeko ari ryiza. Ariko ku rundi ruhande bagahamya ko rishobora kuzabangamirwa n’umuco n’imyemerere abenshi bagitsimbarayeho .
Ibi babigaragaje ubwo bakoranaga ibiganiro n’itsinda ry’Abanyamakuru bahuriye mu muryango w’abanyamakuru baharanira amahoro Pax Press hamwe n’umuryango Rwanda Women’s Network mu mushinga Indashyikirwa, kuwa 27/03/2017 mu murenge wa Rurembo.

Uwimana Beatice ni umuturage wo muri uyu murenge . Hamwe na bagenzi bavuze ko nubwo byabaye itegeko hari imico karande abashakanye bagitsimbarayeho kandi ko bitoroshye kuyihindura. Ati”Ahari abantu babiri hakagombye kuba umutware umwe,kandi bibiriya hamwe n’imico gakondo yadutoje ko umugabo ari umutwe akaba n’umutware w’urugo. Ni we ufata icyemezo cya nyuma mu rugo rwanjye nubwo tujya inama(…)ntabwo nzajya mu misango y’ubukwe. Ni akazi k’abagabo gusa. Nitujya inama kuri buri kantu nibyiza ariko abandi bazaduseka ,ndetse bananyite igishegabo nawe bamwite inganzwa,…”

Abandi bitabiriye iki kiganiro nabo bagiye bagaragaza ko umugabo ariwe ufite imbaraga ,kandi hari imwe mu mico igomba guhinduka kugira ngo iri tegeko ribashe kubahirizwa. Musafiri Ildephonse yagize ati”ko ari abagabo batanga inkwano ni ryari umugore azakwa umugabo,ubwo bubasha twabuhawe n’Imana ndetse biri no muri bibiriya mu ntangiriro, bizadusaba igihe kugira ngo tubyumve,kandi niyo twabyumva abayobozi b’insengero batabyumvise byatugora. ”

Kumva neza icyo itegeko rivuga

Asubiza kuri izi mpungenge z’aba baturage bo mu murenge wa Rurembo mu karere ka Nyabihu, umunyamategeko Maitre Nizeyimana Elie yagarutse cyane kucyo iri tegeko rivuga mu buryo bwo kuyobora urugo hagati y’abashakanye. Ati “kuva mu mwaka wa 1988 kugeza 2016 itegeko ryavugaga ko umugabo ari we mutware w’urugo. Mu ngo nyinshi byagiye bigira ingaruka zikomeye zirimo abagabo bamwe bagaragaweho kwikubira umutungo batagishije inama abo bashakanye, gufata icyemezo wenyine kandi barasezeranye ivangamutungo n’ibindi. Iri tegeko rishya rikaba rije gushimangira ihame nyaryo ry’uburinganire, bigamije guca amakimbirane ubwikanyize bw’abagabo ku mutungo w’urugo no guca akarengane gakorerwa abagore.”

Kubyerekeranye n’umuco Me Elie avuga ko itegeko rivuga ku buyobozi bw’urugo. Ariko ko hari ibindi bene urugo biyumvikaniraho bitewe n’uko babanye. Ati “ umugabo n’umugore nibemeranya hagati yabo ko mu birori umugore azajya aba ari we ufata ijambo, agasaba cyangwa agasabwa, ibyo birabareba. Ni ibyabo biyumvikaniyeho. Umwe nahitamo kurara irondo kuko ari we ushoboye ibyo birabareba uko bo babyumvikanyeho. Icyo itegeko rigarukaho ni bwa buyobozi ku byemezo bireba urugo.”

Nubwo aba baturage bagaragaje impungenge zishingiye ku mico n’imyumvire hamwe n’imyemerere, hari bamwe mubabisobanuriwe mbere barivuga imyato. Kanyabuganza Théogene yagize ati”twe tumaze igihe turisobanurirwa,mu gihe gito naryumvise ntabwo nkijya gusesagura umutungo w’urugo mu kabare cyangwa ngo nihe inshingano zo kugurisha igitoki tutabyumvikanyeho n’umugore wanjye.”

Ku ruhande rw’ubuyobozi bw’umurenge wa Rurembo nabo bemeza ko hari imico ikibangamiye amatekeko yo mu muryango ariko bakanahamya ko kuva batangira gusobanurira abaturage iri tegeko ibibazo byabashakanye byatangiye kugabanuka kuburyo bugaragara.Gafasi Jean de Dieu ni umunyamabanga nshingwabikorwa w’agateganyo w’uyu murenge. Yagize ati”mu myaka ine ishize ku munsi twakiraga ibibazo by’abashakanye bigera kuri 20,ariko ubu hari igihe twakira ibibazo bitarenze bine ku munsi, kandi iyi ntambwe irashimishije cyane.”

Ubuyobozi bw’uyu murenge hamwe n’abaturage bari bitabiriye ibi biganiro bavuga ko byahoraho kuko basanga amakimbirane yo mu miryango ashingiye ahanini ku bwumvikane buke buri hagati y’abashakanye kandi rimwe na rimwe buturuka ku isesagurwa ry’umutungo. Kurisobanurira inzego zitandukanye z’abaturage, nk’uko babisaba, byafasha mu guhindura imyumvire ishingiye ku muco,ubujiji hamwe n’imyemerere.

M.T


Tanga igitecyerezo

Who are you?