Yashyizweho kuri 7 March, 2017 | 07:55

Nubwo bafunze, bishimira urugero rw’ubumwe n’ubwiyunge mu banyarwanda

Abagororwa bo muri Gereza ya Musanze biganjemo abafungiwe icyaha cya jenoside bavuga ko bamaze gucengerwa n’ubwiyunge bwubaka Ubunyarwanda binyuze muri gahunda ya Ndi Umunyarwanda, bakagaya cyane abaturage n’abari mu mahanga bagihembera ingengabitekerezo ya jenoside.

Ndi Umunyarwanda ni gahunda yashyizweho na Leta y’u Rwanda igamije guhuza Abanyarwanda batewe ishema no kuba Abanyarwanda bahuriye ku gukunda igihugu no kugiteza imbere kandi bakomorana ibikomere binyuze mu gutanga ubuhamya, gusaba imbabazi no kubabarirana.

Ruzimenyera Ezechiel avuga ko yakatiwe igifungo cy’imyaka 20 ku cyaha cya jenoside, akaba yaracyemeye akanagisabira imbabazi abarokotse jenoside bakazimuha n’urukiko rukazimuha kuko ngo yakabaye yarakatiwe gufungwa burundu akurikije ko yari umuyobozi wa polisi mu rwego rwa Commune (Akarere).

Muhingabe Clemence wakatiwe gufungwa burundu ku cyaha cya jenoside avuga ko gahunda ya Ndi Umunyarwanda yabafashije cyane kuko irimo kunga Abanyarwanda kandi ko ubwiyunge abona bumaze kugerwaho ku gipimo cyo hejuru mu gihugu, akababazwa n’abakoze jenoside bakaba banayipfobya aho bacyidegembya mu mahanga. Agira ati “nk’ubu umwuzukuru wanjye na murumuna wanjye bafite abagabo b’abasirikari babohoye iki gihugu kandi babanye neza, nkumva Ndi Umunyarwanda yarakoze akazi gakomeye kuko njye numvaga nk’ibyo bitashoboka.” Yongeraho ati “Twumva ubu buhamya bwacu bwajya hanze, n’abo basakuriza hanze bahakana jenoside cyangwa bakavuga ko habaye double jenoside (jenoside ebyiri) bakamenya ko tutari kumwe na bo, ntabwo turi kumwe na bo rwose!”

Nyiranshuti Rose watiwe imyaka 15 y’igifungo ku cyaha cya jenoside na we avuga ko Ndi Umunyarwanda yabafashije kumenya ubunyarwanda no kubusigasira, mu gihe mbere hari abataravuganaga, ubu bagasabana buri umwe akabona undi ko ari Umunyarwanda. Ati “Ubu ntawakongera kutumeneramo ngo adutandukanye kuko twamenye ko igifite agaciro ari ukuba Umunyarwanda aho kwitwa icyindi cyose. Dufite Club yo kurwanya jenoside (Anti-Genoside) aho abantu batangira ubuhamya bw’uko bijanditse muri jenoside, bigafasha ubivuga kuruhuka kandi n’abandi bakamwigiraho.”

Nubwo bafunzwe bashimishwa kandi n’urugero igihugu kigezeho. Niyonsaba Alvera wakatiwe burundu y’umwihariko ku cyaha cya jenoside avuga ko ashimishwa n’intambwe ubwiyunge bugezeho mu Rwanda kuko abana be bagiye bashyingiranwa n’abarokotse jenoside, akabona ni byiza ndetse abakazana be bakamusura muri gereza no kurusha abahungu be. Ati “Ikindi nakunze cyane nkavuga nti ubwiyunge ni bwiza kandi u Rwanda ruratera heza, nari mwalimu mbere ya jenoside ariko sinigeze ntsindisha umwana, ariko ubu aho mfungiwe, abana bose barize kandi bakarangiza kaminuza, hari n’uwashyizwe mu ishuri n’umugore wa Perezida (wa Repubulika), amusubiza mu ishuri, njye nagira ngo ntibyashoboka, ariko mbona arize, baramurihiriye, ararangije, ndavuga nti iki gihugu ni cyiza, cyari cyarapfuye mbere.”

Umuvugizi w’Urwego rw’Igihugu Rushinzwe Imfungwa n’Abagororwa, CIP Sengabo Hilary avuga ko bishimira intambwe abagororwa bagezeho bitabira gahunda ya Ndi Umunyarwanda kuko nyuma yo kwigishwa, hari abiyemeza kujya gusaba imbabazi abo bahemukiye kandi bigakorerwa mu ruhame aho icyaha cyabereye. Agira ati “Nk’uko itegeko ribigena, tugeza ku mfungwa n’abagororwa gahunda zose za leta nk’uko ziri hanze harimo na Ndi Umunyarwanda. Hari n’abadepite bamaze igihe bazenguruka mu magereza bigisha ibyiza byo kwemera icyaha no gusaba imbabazi kandi hari abagororwa babikoze n’abahemukiwe babaha imbabazi.”

Mugabo Jean d’Amour


Tanga igitecyerezo

Who are you?