Yashyizweho kuri 11 May, 2018 | 16:54

Ngenzi na Barahira barasubira imbere y’ urukiko kuri uyu wa mbere

Octavien Ngenzi na Tito BARAHIRA bombi bakurikiranyweho kugira uruhare muri Jenoside yakorewe abatutsi, ubu bakaba bari kuburana ubujurire mu rukiko rw’ I Paris mu Bufaransa, barasubira imbere y’ urukiko kuri uyu wa mbere tariki ya 14 Gicurasi 2018.

Urubanza rwabo rwari rwasubitswe tariki ya 04 Gicurasi nyuma y’ iminsi ibiri gusa rutangiye kuburanishwa ku mpamvu zuko hari iminsi y’ ikiruhuko yikurikiranya mu Bufaransa ndetse hakaniyongeraho ko Tito Barahira yari afitanye gahunda na muganga umuvura indwara y’ impyiko arwaye .

Ubwo uru rubanza rwasubikwaga tariki ya 04 Gicurasi 2018, abunganira Octavien Ngenzi ndetse na Tito Barahira bagaragaje impungenge baterwa no kuba urukiko ruburanisha uru rubanza ngo rutabifitiye ububasha , bityo basaba ko amategeko agenga iburanisha rw’ imanza nkizo z’ibyaha bikomeye yubahirizwa .Ikindi kandi ababunganira bagaragaje mu iburanisha riherutse nuko ngo abatangabuhamya bo ku rwego rushinjura batigeze babazwa mu buryo bwisanzuye mu Rwanda kuko ngo babaga bahagarikiwe n’ abayobozi bo mu nzego z’ ibanze.

Abunganira aba bagabo bombi basimburanywe k’ubuyobozi bw’ iyahoze ari Komini Kabarondo, Perefegitura ya Kibungo,bakavuga ko ibi byatumye amakuru yatanzwe n’ababashinjura akemangwa ndetse bakaba bari basabye ko bakoroherezwa uburyo bwo kubona visa ndetse no gukorera mu bwisanzure kugira ngo babashe kuza mu Rwanda kuvugana n’ abo ku ruhande rushinjura abakiliya babo .

Octavien Ngenzi na Tito Barahira bombi bayoboye Komini Kabarondo yahoze muri Perefegitura ya Kibungo kuva mu w’ 1977 .Bombi bakurikirwanyweho kugira uruhare mu iyicwa ry’ abatutsi b’ i Kabarondo aho ku rwego rwa mbere bari bahamijwe ibyaha birimo gutanga amategeko yo kwica abatutsi basaga ibihumbi bitatu na magana atanu, by’ umwihariko bahungiye kuri paruwasi ya Kabarondo. Banaregwa kandi ibyaha byibasiye inyoko muntu , ibikorwa bigamije kurimbura imbaga no gucura umugambi wo kurimbura ubwoko bw’abatutsi .

Urukiko rw’ I Paris mu Bufaransa rwari rwabakatiye igifungo cya burundu mu kwezi kwa karindwi kwa 2016 bahita bajuririrra iki cyemezo cy’ urukiko ari narwo rubanza rwatangiye kuburanwa kuva tariki ya 02 Gicurasi kugeza tariki ya 06 Nyakanga 2018.

Umuhire Valentin


Tanga igitecyerezo

Who are you?