Yashyizweho kuri 8 November, 2016 | 11:12

Muzo: Uburwayi bw’imbuto bwateye abahinzi igihombo

Bamwe mu bahinzi b’imbuto z’amatunda mu murenge wa Muzo baratakambira ikigo cy’igihugu cy’ubuhinzi RAB kubafasha kubona imbuto nziza y’amatunda yihanganira ubutaka bwabo kuko iyo basanzwe bahinga yabarumbiye. Ubu abenshi muri bo barataka igihombo.

Nkuranga Eugene ni umwe muri aba bahinzi bo mu murenge wa Muzo. Atanga ubuhamya asobanura ko mbere yahingaga amatunda akeza neza ku buryo mu kwezi kumwe yabaga yizeye kunguka amafaranga arenga ibihumbi ijana. Ati “imbuto duhinga yarananiranye kuko igera igihe cyo gukura ahubwo amababi y’igiti cy’itunda akuma n’urubuto rukuma”. Habiyaremye Jean Pierre nawe avuga ko yari amaze imyaka 20 ahinga amatunda ndetse ngo yagemuriraga n’inganda zirimo na Entreprise Urwibutso Nyirangarama.Ngo ariko uburwayi bwafashe amatunda bumusigiye ubukene. Ati” Njyewe nagemuriraga Nyirangarama, mfite umurima wera amatunda meza cyane ku buryo nta kibazo cy’ifaranga nagiraga none ubu maze imyaka itanu nteza neza, niyo hari utweze tuba ari tubi ku buryo ujya ku isoko bakaguhenda.Ejo bundi najyanye amatunda ijana bakajya rimwe barigura kuri mirongo itatu n’arindwi”.

Perezida wa Koperative y’abahinzi b’amatunda mu murenge wa Muzo, Bwana Ndagijimana Laurent nawe nk’umuhinzi ndetse akanaba na Perezida wa Koperative ahamya ko ubuhinzi bw’amatunda bwasubijwe inyuma n’uburwayi bw’imbuto we avuga ko bwatewe na virusi ngo yibasiye ubutaka bwabo. Ati” Uragenda ugahinga, amatunda ukabona arimo arakura neza. Yewe akanagaragaza n’uruyange ariko ntiyere, ahubwo yajya kwera ukabona urubabi rutangiye gukura rureba hasi aho kujya hejuru, igikurikiraho nuko ruhita rwuma”. Akomeza asaba ubuvugizi kugira ngo babone imbuto nziza yihanganira ubutaka bwabo, cyane ko amatunda yari atunze benshi muri bo. Iyo asubije amaso inyuma yibuka ko bacyeza neza nta muhinzi wajyaga abura ibihumbi ijana bye ku kwezi.

Nzabakurikiza Alphonse, umusaza uri mu kigero cy’imyaka 70 yivugira ko ariwe wa mbere wahinze amatunda mu murenge wa Muzo. Ngo mu myaka 40 amaze ahinga ni bwo bwa mbere abonye ubu burwayi we agereranya n’icyorezo. Ati” Kuva muri 1960 natangiye mpinga amatunga, akera ku rugo, ariko aho iyi ndwara yaziye, yabaye nk’icyorezo”

Habonetse imbuto nshya

Umunyambanga nshingwabikorwa w’umurenge wa Muzo, Bwana Gasasa Evergiste nawe yemeza ubu burwayi bw’amatunda bwibasiye uyu murenge guhera mu ntangiriro z’umwaka wa 2009 bwahombeje abahinzi mu murenge we cyane ko mbere ubu burwayi butaraza, uyu murenge wezaga amatunda menshi ugasagurira n’amasoko. Ibi byafashaga abahinzi gukirigita ifaranga kubera imodoka zazaga buri cyumweru gupakira ayo matunda ziyajyana ku masoko yo mu gihugu harimo n’ayo mu gihugu cya Uganda. None ubu ntibigishoboka kubera ubwo burwayi.

Ku bufatanye na RAB hari indi mbuto yabonetse ubu ikaba igiye guhabwa abahinzi nk’uko Gasasa Evergiste abitangaza. Ngo bizeye ko izahangana n’ubutaka bwabo cyane ko imbuto bari basanzwe bahinga yananiranywe n’ubutaka bwabo.

Nizeyimana Elias


Tanga igitecyerezo

Who are you?