Yashyizweho kuri 28 May, 2018 | 18:11

Musasa : Abaturage bahendwa n’ababafasha guhabwa servisi z’Irembo

Mu murenge wa Musasa mu karere ka Rutsiro, abaturage bahendwa n’abakozi b’Irembo, ikigo gitanga serivisi za Leta hifashijwe ikoranabuhanga. Babaca amafaranga magana abiri atemewe kuri buri serivisi isabwe kandi babihemberwa.

Mu mirenge ya Musasa na Murunda yo mu karere ka Rutsiro, mu ntara y’Iburengerazuba, abaturage binubira guhendwa n’abakozi b’Irembo. Basaba abaturage amafaranga y’inyongera ku kiguzi kizwi kuri serivisi za Leta zo mu nzego z’ibanze no muzindi nzego, kandi babihemberwa buri kwezi. Urubyiruko nirwo rusanga servisi z’Irembo zihenze kuko ari rwo rusaba izo serivisi kurusha abakuze. Karinganire Justin, ati "Ni twe rubyiruko twisunga izi serivisi cyane kurusha abakuze, kuko tuba dusaba ibyangombya byinshi. Iyo dusabye ikemezo cy’amavuko ku Irembo, cyangwa se kuriha amafaranga yo gukora ikizamini cyo gutwara ibinyabiziga, abakozi b’Irembo bongeraho amafaranga magana abiri kuri buri serivisi twatse".

Munyaneza Claude, umusore urangije amashuli y’isumbuye, nawe yemeza ko zihenda, ati "Numva kuri radiyo ko ibyangombwa byo mu nzego z’ibanze bifite igiciro bigahinduka. Ariko hano muri Musasa, twongeraho andi mafaranga abakozi b’Irembo basaba". Akomeza avuga ko nk’ikemezo cy’amavuko, icyo kuba umuntu ari ingaragu n’ibindi, ko buri kimwe kigurishwa amafaranga 500, ariko abakozi b’Irembo (agents) bagasaba amafarnga 700.

Dusabimana Sekidende uhagarariye Irembo mu karere ka Rutsiro, yemeza ko kongera amafaranga ku byangombwa bitangwa n’inzego z’ibanze bitemewe, ati "Ibyo ntibyemewe. Amafaranga y’ibindi byangombwa bitari iby’inzego z’ibanze nibyo bishyuzwa nk’iby’imisoro ya Rwanda Revenue Authority".

Ubuyobozi bw’umurenge wa Musasa mu izina ry’Umunyamabanga Nshingwabikorwa w’akagari ka Gisiza, Eliezer Bizimana, ashishikarije abaturage kumenya gukoresha telefone kugira ngo birinde gusaba ubufasha uwari we wese, harimo n’abo bakozi babasaba amafaranya y’inyungu kandi bitemewe. Yagize ati "Telefone iyo ari yo yose ifasha umuntu kubona serivisi z’Irembo utiriwe uva iwawe. Turashishikariza buri wese kubimenya kuko hakoreshwa n’ikinyarwanda".

Ingendo ndende

Uwamaliya Veronique uri mu kigero cy’imyaka 40 akora urugendo ry’ibirometero bine ashakisha izi serivisi ati "Mu mudugudu wa Gisiza aho ntuye, nta bene izi serivisi zibamo. Ngenda ibirometero bine njya mu kandi kagari gushakisha umukozi w’Irembo. Ubwo aba ari akandi kazi karibumfate umunsi wose. Hari n’igihe biba ngombwa ko ngaruka incuro ibyiri cyangwa eshatu habuze rezo. Turasaba ko Leta yashyira abakozi b’Irembo hose mu mudugudu".

Kanakimana Jeannette, umubyeyi w’abana batatu, utuye nawe mu mudugudu wa Giziza, avuga ko ibikorwa remezo bike bituma abaturage bata umwanya wabo bashakisha serivisi z’irembo kure y’aho batuye. Yemeza ko iminara y’ibigo by’itumanaho bya MTN, Tigo na Airtel bihora bifite ibibazo cyane cyane iyo imvura yaguye, bityo bigatuma abaturage batabona umurongo w’itumanaho (réseau) nkuko bikwiriye.

Zawadi, umubyeyi w’imyaka 27 yunganiye avuga ko akarere ka Rutsiro kameze nkaho kari mu kato kubera ko imiyoboro y’itumanaho itahagera neza, ati " Mu kwezi gushize kwa Mata, twabuze rezo igihe cy’iminsi ine. Byatumye tujya mu tundi turere. Byaraduhenze cyane".

Serivisi z’Irembo mu Rwanda zigamije kwihutisha serivisi za Leta hagamijwe kugabanya ingendo abaturage bakora bajya kuzishaka mu nzego z’ibanze n’ahandi mu bigo bya Leta. Ni muri urwo rwego u Rwanda rukataje no gukangurira abaturage gukoresha telefoni na mudasobwa kugirango batere ikirenge mu ikoranabuhanga ridahenze.

Ndekezi Jean Pierre


Tanga igitecyerezo

Who are you?