Yashyizweho kuri 7 March, 2017 | 07:38

Musanze: Barasaba urwibutso rubafasha kwibuka ababo neza

Abarokotse jenoside yakorewe Abatutsi bo mu Karere ka Musanze bashavuzwa no kutagira urwibutso rwa jenoside rwujuje ibisabwa, bakavuga ko urwibutso rwa jenoside ruri mu Murenge wa Muhoza hafi y’ibiro by’Akarere ntaho rutaniye n’irimbi risanzwe kubera imiterere yarwo n’abarushyinguwemo.

Ni urwibutso rugaragaramo imva zitandukanye ziriho n’imisaraba kandi hakaba hashyinguwemo n’abatarazize jenoside ahubwo bishwe n’abacengezi mu myaka ya 1997 na 1998 mu gihe jenoside yakorewe Abatutsi yatangiye ku itariki ya 1/10/1990 igahagarikwa ku wa 4/7/1994.

Nyirasafali Sawiya, warokotse jenoside akaba n’umukuru w’Umudugu wa Mwidagaduro mu Kagari ka Bukinanyana, Umurenge wa Cyuve avuga ko bifuza kubona urwibutso rwiza rugaragaramo amazina y’abazize jenoside bakajya bahibukira bikabafasha kuruhuka mu mutima. Yagize ati “Turifuza kubona amazina y’abacu bazize jenoside biciwe hariya ku rukiko iruhande rw’ibiro by’Akarere nibura hagashyirwaho ibuye ririho amazina yabo kandi n’imibiri yabo iri hariya mu rwibutso rwa Muhoza igatandukanywa n’iy’abandi batazize jenoside.”

Abayobozi b’Akarere ka Musanze ntibashidikanya na gato ku bipimo bishyira Akarere ku isonga mu gihugu mu kugira ingengabitekerezo ya jenoside bakavuga ko kuba batagira urwibutso rwa jenoside rwujuje ibisabwa ari imwe mu mpamvu z’ingenzi.
Umuyobozi wungirije w’Akarere ushinzwe ubukungu, Ndabereye Augustin aragira ati “ibyavuye mu bushakashatsi bwa Komisiyo y’Ubumwe n’Ubwiyunge turabyemera kandi impamvu zabiteye ziragaragara, tukaba twarafashe ingamba zo kurushaho kurwanya ingengabitekerezo ya jenoside kandi ndemeza ko izarushaho kugabanuka cyane.”Ubushakashatsi bwo mu mwaka wa 2015 ku bwiyunge mu Rwanda bwagaragaje ko Akarere ka Musanze kagaragaramo ingengabitekerezo ya jenoside ku gipimo cya 78.9 ku ijana.

Umuyobozi wungirije w’Akarere ushinzwe imibereho myiza, Uwamariya Marie Claire avuga ko ashingiye ku ngero zitandukanye z’ingengabitekerezo ya jenoside zikunda kugaragara mu gihe cyo kwibuka abazize jenoside yakorewe Abatutsi ndetse agatanga n’urugero rw’umwana wiga mu mwaka wa gatatu w’Amashuri abanza wagaragaje ingengabitekerezo ya jenoside ubwo yasangaga amakaye ye yacitse akavuga ko nta wundi wabikora atari umututsi bigana. Yagize ati “ubu twongereye imbaraga cyane mu kurwanya iyi ngengabitekerezo ya jenoside ikigaragara mu Karere kacu(…)abakozi b’Akarere twese turamanuka buri ku wa Gatatu w’icyumweru tugasanga abaturage aho batuye tugiye gukemura ibibazo bitandukanye harimo no gutanga inyigisho ku kurwanya ingengabitekerezo ya jenoside. Ku bufatanye na Komisiyo y’Igihugu yo kurwanya Jenoside (CNLG), ubu tugiye guhugura abantu muri uku kwezi bazajya batanga ibiganiro ku kurwanya jenoside n’ingengabitekerezo yayo muri buri Mudugugu.”

Uwamariya avuga ko hari inzibutso za jenoside eshatu mu Karere ka Musanze ariko zose nta na rumwe rukoze neza ku buryo rwakwitwa urwibutso rw’Akarere, ikibazo avuga ko cyaturutse ku kuba Akarere katarashoboraga kumvikana n’abarokotse jenoside ku hantu urwibutso rugomba gushyirwa ariko ubu byamaze kwemezwa ko urwibutso rwa jenoside rw’Akarere ka Musanze rugiye kubakwa i Busogo.

Yagize ati “Ubu turimo kwimura abaturage i Busogo ndetse isoko ryo kurwubaka ryamaze guhabwa Inkeragutabara ku buryo mu gihe cya vuba imirimo yo kubaka izatangira. Muri uku kwezi tuzanashyira kuri uru rukiko rukuru (ruri mu karere ka Musanze ahiciwe abatutsi muri 1994) ibuye ryanditsweho amazina y’abahiciwe bagera kuri 91 kandi turacyakomeje gushakisha andi mazina ku buryo hazandikwa abazize jenoside babarirwa hagati ya 200 na 300.”

Mugabo Jean d’Amour


Tanga igitecyerezo

Who are you?