Yashyizweho kuri 9 November, 2020 | 08:35

Mururu : Abarokotse jenoside yakorewe abatutsi barasaba kuregera indishyi

Umuryango RCN Justice et démocratie ufatanjie n’umuryango w’abanyamakuru baharanira amahoro PAXPRESS waganiriye n’abacitse ku icumu rya jenoside bo mu murenge wa Mururu, akarere ka Rusizi, ku rubanza rwa Rukeratababo wahamye n’icyaha cya jenoside, akaba afungiye muri Suède. Abarokotse bagaragaje ikibazo cy’indishyi zitaregewe.

Rukeratabaro Theodore yavukiye mu cyahoze ari segiteri Winteko, komini Cyimbo, perefegitura Cyangugu mu 1969. Mu mwaka 1994, Rukeratabro yari umujandarume. 1998 yahungire muri Suède abona ubwenegihugu muri 2006; Ubushinjacyaha bw’u Rwanda bwatangiye kumukurikirana 2010, kubera uruhare yakekwagaho muri jenoside yakorewe abatutsi. Urukiko rwa Suède rwamuhamije icyaha cy’ubwicanyi, ubufatanyacyaha mu bwicanyi no gushimuta abatutsi akatirwa igihano cyo gufungwa burundu.

Mu kiganiro ku makuru ku rubanza rwa Rukeratabaro mu murenge wa Mururu; Gasarabwe Jean Damascène, uhagarariye Ibuka mu kagali ka Kabahinda, muri uyu murenge, yagize ati « abagize ingaruka kubyo yangije, yasahuye nabo yagize imfubyi n’abapfakazi kugeza ubu batarashobora kwiyubaka, ubwo koko babonye ubutabera ? Aha biba bishatse kuvuga ko bagomba guhabwa indishyi, zaba indishyi z’akababaro ». Yakomeje agira ati « Njyewe nsa n’uwakurikiye ruriya rubanza cyane, iyo urebye délégation zazaga hano iwacu, imodoka zazaga, indege zazaga, amafaranga yakoreshejwe ni menshi kugira ngo Rukeratabaro abone ubutabera, kuko dukurikije ukuri kw’ibyo twari tumuziho ntibyari gutwara kiriya gihe cyose, noneho ukibaza ngo aya mafaranga yamutanzweho ngo abone ubutabera ? Ariko bikaba bigaragara ko za mfubyi n’abapfakazi batashobora kwigira ngo bakire za ngaruka zo kubura ababo, nabo yangirije imitungo kugeza magingo aya batari bashobora kugera kubyo bari bafite ? Mu byukuri ubwo bo babonye ubutabera? Aha bishatse kuvuga ko bakwiye guhabwa indishyi z’akababaro ».

Muhigirwa Innocent, ahagarariye Ibuka mu murenge wa Mururu, nawe yagize ati « abantu baregeye indishyi ni abantu 16.Ariko nuko abo bantu 16 aribo babashije kumenya urwo rubanza. Ariko ukurikiranye ibyaha yakoze n’ibitero yagiyemo ni abantu benshi yangirije bacitse ku icumu ; urubanza rwarabaye ariko abacitse ku icumu bafite impungenge kuko abaregeye indishyi ni bake ugereranije nabo yangirije imitungo n’ibitero yagiyemo. Hari abandi bantu baregera indishyi kuko ari benshi ».

Me Ntampuhwe Juvens, umuhuzabikorwa w’umushinga Justice et Mémoire ukurikirana imanza za jenoside yakorewe abatutsi zibera mu bindi bihugu, avuga ku kibazo cy’indishyi ku rubanza rwaciwe rukarangira. Mu rubanza rw’inshinjabyaha ibi ngo ntibivuze ko abatararegeye indishyi muri urwo rubanza, biba byarangiye. Ahubwo ngo «abataraziregeye nabo bemerewe gutanga ikibazo cy’indishyi na nyuma yuko urubanza rw’inshinjabyaha rwamaze gucibwa. » Ametegeko akaba abyemera kuko ibyaha Rukeratabaro yahamijwe ari ibyaha bidasaza, n’ibirego by’indishyi bishingiye kuri ibyo byaha ntibisaza. Ati « ni ukuvuga ngo uwaba atararegeye indishyi muri urwo rubanza, aba ashobora no kubiregera mu rukiko rwo mu Rwanda atagombye gutanga ikirego mu rukiko rwo muri Suède ».

Ntampuhwe yakomeje asobanura ko ari ugutanga ikirego mu rukiko rwo mu Rwanda, ugakoresha rwa rubanza rwa rwabereye muri Suède, rwahamije Rukeratabao icyaha, nk’ikimenyetso kigaragaza ko koko indishyi usaba zifite aho zishingiye. Kuri uru rubanza, Ntampuhwe yavuze ko Rukeratabaro aburana yafashwe nk’umuntu utishoboye, udafite imitungo mu gihugu cya Suède, bityo hakaba harebwa niba hano mu Rwanda ahafite imitungo yavamo indishyi.

Kuri iki kibazo cy’indishyi zidatangwa, Leta y’u Rwanda yashyizeho ikigega cyo gufasha abacitse ku icumu rya jenoside. Kimenyi Alex, Uhagarariye umuryango Kanyarwanda avuga ko ku bijyanye n’indishyi zidatangwa, ariyo mpamvu Leta y’u Rwanda yashyizeho ikigega cy’abacitse ku icumu FARG, akaba aribwo buryo bwonyine bwo kugira ngo bariya bapfakazi n’abana b’imfubyi igerageze kubafasha ku birebana n’ubuvuzi, imyigire y’abana, kububakira n’izindi gahunda yagiye ishyiraho zo kugoboka ku buryo bw’umwihariko abacitse ku icumu rya jenoside batishoboye.

Mu bantu 16 babashishije kugera mu rukiko muri Suède bakaregera indishyi n’urukiko rukavuga ko bazazihabwa, nta numwe wazihawe.

Umukunzi Médiatrice


Tanga igitekerezo

Ibitekerezo