Yashyizweho kuri 24 August, 2016 | 07:58

Kunga abantu utazi bisaba ubushishozi

Nubwo bhawe ububasha bwo kurenga ifasi bakoreramo bakemura ibibazo, ariko ngo kunga abantu utazi ntibiba byoroshye. Bisaba ubushishozi cyane ko hari byinshi uwunga bijyanye n’imibanira yabo ataba azi ugereranije n’igihe baba baba mu ifasi imwe. Gusa ngo umwunzi nyawe ufite ubushishozi ikibazo si aho abo yunga bari, icyingenzi ni ubunyangamugayo bwe n’ubushishozi agomba kuba afite igihe yunga.

Itegeko rigenga abunzi ribaha ububasha bwo kunga mu kagari gatandukanye n’ako batuyemo igihe bibaye ngomwa. Kuri bamwe ngo ibi bibangamira ihame ryo kunga, kuko umuntu yunga abo baziranye agendeye no ku buryo azi ikibazo. Bamwe bavuga ko n’ubwo ibi byagira akarusho ko kutabogama ariko ngo," ihame ryo kunga abantu ni uko uwunga agomba kuba azi abo yunga akanamenya uko ikibazo giteye."

Umunyamategeko Hitababyaye Jean Pierre wo muri RCN J&D (umuryango utari uwa Leta ukorera mu Rwanda uharanira iyubahirizwa ry’uburenganzira bw’ ibanze bwa muntu ), agaragaza impungenge ze kuri iki kibazo. Ati “kujya kunga abantu utazi imiterere y’ikibazo cyabo, yewe rimwe na rimwe utanabazi birabangamye ku buryo umwunzi ashobora no kudaha agaciro cyane ikibazo bitewe n’uko atamenyereye abo bantu.”

Agaruka ku kazi k’abunzi nk’abakorerabushake, Jean Pierre yungamo ati “cyane cyane ibi bibaho mu gihe umwe mu bafitanye ibibazo yajuriye. Ibyo rero bisaba no kwifashisha izindi nzego kuko byonyine no guhuza abantu nk’abo bigora umwunzi wenyine.”

Bamwe mu baturage bakunze gufashwa n’abunzi bo babibona nk’ibifite akamaro ku ruhande rumwe. Ngamije utuye mu Gatsata, avuga ko ibi bigabanya ibibazo biterwa n’ikimenyane. Agira ati “hari igihe abunzi babogama. Mperutse kugira ikibazo cy’isambu yanjye abaturanyi bari bagiye kwiyitirira, abunzi b’iwacu bashaka kundenganya binaniranye mpitamo kugana inkiko. Iyo haba abunzi batatuzi byari kuba byarakemukiye mu bunzi ariko byanjyanye mu manza.”

Cyakora umusaza Nkunda Pontien wo mu murenge wa Rwezamenyo, avuga ko umwunzi ari umuntu ufite inararibonye, wumva ikibazo akagisobanukirwa n’aho yaba ari ubwa mbere acyumvise. Gusa ngo nanone hari ikibazo kigora umuntu kucyumva. Ati “bibaye byiza rwose nta mwunzi wakarenze umudugudu atuyemo, kuko iyo uturanye n’abafitanye ikibazo kandi ukaba uri inyangamugayo koko ukemura ikibazo ugendeye ku kuri."

Ubundi itegeko riteganya ko abunzi bunga abafitanye ibibazo bijyanye n’amasambu n’indi mitungo itimukanwa, ariko bitarengeje agaciro k’amafaranga miliyoni 5. Barebwa kandi n’ibibazo bijyanye n’amatungo n’indi mitungo yimukanwa itarengeje agaciro ka Miliyoni imwe ndetse n’abatarubahirije amasezerano bagiranye.
Ibi ngo bisaba ubushishozi bukomeye ku buryo umwunzi uvuye ahandi ashobora kutabisobanukirwa ku buryo bworoshye, ahubwo bigaterwa n’uko ikibazo kigoye kucyumva.

Musonera Sosthѐne


Tanga igitecyerezo

Who are you?