Yashyizweho kuri 12 July, 2018 | 11:44

Kubura ubushobozi bwo gukurikirana imanza za genocide zibera hanze bituma abanyarwanda benshi batazigiraho amakuru

Mu kiganiro n’Abanyamakuru cyateguwe n’Umuryango w’abanyamakuru baharanira amahoro PaxPress, ku bufatanye n’indi miryango itari iya leta, ariyo umushinga ushinzwe ubutabera no kwibuka (Justice& Memoire), RCN Justic&Democratie na haguruka, hagaragaye ko hakiri imbogamizi zo kubura ubushobozi bwo gukurikirana imanza z’abakoze ibyaha bya genocide zibera mu mahanga.

Inama n’abanyamakuru yarigamije kurebera hamwe uko abanyarwanda barushaho gusobanukirwa imiburanishirize y’imanza z’abakurikiranyeweho, ibyaha bya Jenoside zibera mu mahanga. Mu gihe I Paris mu Bufaransa hari hari kuburanishwa urubanza, rw’ubujurire rwa Ngenzi Octavien na Tito Barahira,rwatangiye ku ya 2 Gicurasi 2018 bakurikiranyweho ibyaha bya genocide yakorewe abatutsi mu Rwanda mu 1994,ubwo bari ba burugumesitiri ba komini ya Kabarondo.

Ntampuhwe Juvens Umuhuzabikorwa w’umushinga ushinzwe ubutabera no kwibuka (Justice&Memoire), avuga ko hari imanza nyinshi zibera mu mahanga zagakwiye gukurikiranwa ariko hakabura ubushobozi . Ati “Uretse urubanza rwa Octavien Ngenzi na Tito Barahira twakurikiranye , hari izindi zibera ahantu hatandukanye, ariko ntitubone ubushobozi bwo gukurikirana imiburanishirize yazo ngo tubashe kuba twasobanurira abanyarwanda uko ziba ziri kugenda n’imyanzuro yazo. ”

Ntampuhwe akomeza avuga ko imanza badakurikirana ngo boherezeyo abanyamakuru bashaka amakuru bagakora inyandiko zohererezwa imiryango itandukanye kugira ngo abantu bamenye amakuru.

Umukozi mu muryango Haguruka Ushinzwe guharanira uburenganzira bw’abagore n’abana Murekatete Jeanne d’Arc avuga ko ari ingenzi cyane ko kugira abanyamakuru bakurikirana imanza z’abakurikiranyweho ibyaha bya bya jenoside zibera hanze kugira ngo abanyarwanda basobanukirwe imiburanishirize yazo. Agira ati “Iyo ubutabera bukozwe nyirabwo ntabimenye ntabwo aba yarenganuwe, niyo mpamvu natwe nka Haguruka twagiye i Kabarondo aho Ngenzi na Barahira bakoreye ibyaha. Tubasomera ubuhamya bwatangiwe mu bufaransa twahawe n’umunyamakuru wa PaxPress witwa Sehene Ruvugiro warukurikiranaga umunsi ku wundi. Ni ingenzi cyane kugira abanyamakuru bakurikirana imanza z’abakurikiranyweho ibyaha bya bya jenoside zibera hanze, kugira ngo abanyarwanda basobanukirwe imiburanishirize yazo.

Imiryango itari iya leta ariyo Umuryango w’abanyamakuru baharanira amahoro PAX PRESS, Haguruka,RCN – Justice et Democratie, umuryango ushinzwe ubutabera no kwibuka (Justice&Memoire) iyi miryango yashyize imbaraga mu gukurikirana imanza zibera mu mahanga z’abaregwa ibyaha bya jenoside yakorewe abatutsi mu 1994.

Ibi kugira ngo bamenyeshe abanyarwanda ukuri kw’ibyabaye muri jenocide yakorewe abatutsi. Aho kuva ku ya 2 Gicurasi,2018 mu rukiko rwa rubanda rw’I Paris mu Bufaransa hatangijwe urubanza, rw’ubujurire rwa Ngenzi Octavien na Tito Barahira, bakurikiranyweho ibyaha bya genocide yakorewe abatutsi mu Rwanda mu 1994,ubwo bari ba burugumesitiri ba komini ya Kabarondo. Uru rubanza rwarangiye ku ya 6 Kamena 2018 bakatiwe igifungo cya burundu.

Hategekimana Innocent


Tanga igitecyerezo

Who are you?