Yashyizweho kuri 19 November, 2018 | 15:34

Ku nshuro ya 27, U Rwanda ruritegura iminsi cumi n’itandatu yo kurwanya ihohoterwa

Guhera taliki ya 25 Ugushyingo kugeza ku ya 10 Ukuboza 2018, u Rwanda ruzifatanya n’isi mu minsi 16 yahariwe ku rwanya ihohoterwa rikorerwa abagore n’abakobwa. Benshi bakunze kwibaza impamvu iyi minsi yiswe cumi n’itandatu (16) ndetse ikaba buri gihe kuri ariya mataliki.

Kuva tariki 25 Ugushyingo kugeza kuya 10 Ukuboza buri mwaka, ku Isi hose hazirikanwa iminsi 16 yahariwe kurwanya ihohoterwa rikorerwa abagore n’abakobwa. Iyi minsi yemejwe bitewe cyane cyane n’impamvu zizwi ku rwego mpuzamahanga n’ubundi igarukwaho muri ayo mezi. Kuva tariki 25 Ugushyingo kugeza kuya 10 Ukuboza buri mwaka.

Nk’uko urubuga http://www.unwomen.org rubigaragaza, taliki ya 25 Ugushyingo ni umunsi mpuzamahanga wahariwe kurwanya ihohoterwa rikorerwa abagore. Taliki ya 10 Ukuboza ni umunsi mpuzamahanga wahariwe uburenganzira bwa muntu. Iyo minsi utangira n’urangiza ikaba umwanya wo kuzirikana bitewe n’ingingo runaka iba yateguwe muri buri gihugu no kurwego mpuzamahanga ku kurwanya ihohoterwa iryo ari ryo ryose ribakorerwa. Ariko kandi iyo usubiye mu mateka hari impamvu zituma iyo minsi iba muri ayo mezi no muri ayo mataliki.

Mu Ugushyingo 1960, ababikira barenga batanu bo muri Repubulika ya Dominikani bishwe n’ubutegetsi bwariho kubera ko bahoraga bahamagarira Leta gukuraho ubusumbane bw’ibitsina bwagaragaraga muri icyo gihugu. Muri uko kwezi kandi, abanyeshuri b’abakobwa 14 bo muri Kaminuza ya Moreyali (Moreal) muri Canada bishwe bunyamaswa na bagenzi babo kubera guharanira ko batezwa imbere kuko bari barasigaye inyuma. Iya mbere Ukuboza ni umunsi mpuzamahanga wo kurwanya SIDA nk’imwe mu ngaruka zugarije umugore n’umukobwa mu gihe akorewe ihohoterwa rishingiye ku gitsina.

Buri mwaka haba insanganyamatsiko y’Isi ariko na buri gihugu kikagira umwihariko bitewe n’uko kibyumva. Iy’uyu mwaka igira iti " twubake umuryango twifuza , turwanya gusambanya abana."

PAX PRESS


Tanga igitecyerezo

Who are you?