Yashyizweho kuri 8 November, 2016 | 14:24

Kiziguro :Girinka yababereye imbarutso yo kwikenura

Girinka yagiriye akamaro abayihawe mu murenge wa Kiziguro batera imbere. Nyamara ariko abatari bishoboye babaga muri nyakatsi bo ngo bahisemo kuzigurisha ngo bubake ahacyeye. ubu barasabwa kugarura izo nka, ibintu bigaragra nk’ibidashoboka.

Bamwe mu baturage bagezweho na gahunda ya Girinka mu murenge wa Kiziguro barishimira intambwe iyi gahunda imaze kubagezaho by’ umwihariko kuva mu cyiciro cy’ ubudehe ujya mu kindi .Aba baturage bumvikana cyane mu mvugo ishimira umukuru w’ igihugu Paula Kagame kubera gahunda ya Girinka yatangije , ntibarya iminwa mu kugaragaza intambwe bamaze gutera mu mibereho yabo kubera Girinka .

Hakizimana Aloys atuye mu mudugudu w’ Akabuye , akagari ka Mbogo mu murenge wa kiziguro, akarere ka Gatsibo .Uyu mugabo w’ igikwerere iyo avuga ibyo yagejejweho na girinka , agaragaza amarangamutima cyane .agira ati “Perezida wa Republika yankoreye byinshi cyane .yamvanye muri nyakatsi, arangije ampa n’ inka.

Ubu kubera iyo nka nabonye ifumbire , mpinga karoti , mbona amafaranga. Ubu naguzemo telefoni ya tekino (Tecno ) ndetse ngura n’ ingurube “Mugenzi we Nsengiyumva Elisa wo mu mudugudu wa Byaruhura we avuga ko kubera Girinka yavuye mu cyiciro cya mbere cy’ ubudehe , kuri ubu akaba ari mu cyiciro cya gatatu. Agira ati “Girinka yanteje imbere kuko ntarabona inka nezaga umufuka umwe w’ ibishyimbo ariko kuri ubu deza imifuka irindwi “Nawe ashimira Perezida wa Republika kubera ko yatekereje ku baturage cyane cyane abatishoboye akabagabira inka .Yungamo ati “Perezida Kagame yadukuye ahantu habi.“

Si aba gusa kuko Nyirangendahimana Chantal utuye mu mudugudu wa Nyakanungu akagari ka Mbogo nawe yari mu cyiciro cya kabiri ariko ubu ngo ari mu cya gatatu kubera Girinka .Uyu mugore w’ ijigija ugaragaza ku maso ko ameze neza kubera imyambarire ye n’ igihagararo cye agira ati “ abana banjye bameze neza banywa amata barashishe kandi ngirango nanjye murandeba uko meze …,ibi byose mbikesha Girinka .“

Nubwo iyi gahunda ya Girinka yafashije abaturage batishoboye kwivana mu bukene hari bamwe bayifashishije mu kwikenura ariko inka bahawe ikagenda ubutagaruka. Ibi ngo byagaragaye cyane cyane muri gahunda yo guca nyakatsi aho imiryango imwe n’ imwe yagiye yitwaza kuva muri nyakatsi ikagurisha izo nka ngo ibashe kugura ibikoresho byo kubakisha. Umunyamabanga nshingwabikorwa w’ umurenge wa Kiziguro Bwana Hakizimana Achille Samson avuga ko abakoze ibyo bakoze amakosa kandi ko ubu bategetswe kugarura izo nka kugira ngo babashe kwitura bagenzi babo.

Abandi baturage bagaragaza impungenge ko hari ingo zimwe na zimwe z’ abatishoboye zidafite ubushobozi bwo kuzitaho. Ndetse ibi ngo binagaragarira aho bamwe muri bo usanga bazigurisha mu buryo budasobanutse kugira ngo babashe kugura ibindi bikenewe mu ngo zabo nk’abo bavuzwe haruguru.

Umuhire Valentin


Tanga igitecyerezo

Who are you?