Yashyizweho kuri 29 June, 2018 | 13:50

Kirehe: Batora batazi inshingano z’abo batora

Mu gihe mu Rwanda hateganijwe amatora y’abadepite azaba muri Nzeli uyu mwaka, abaturage bo mu Karere ka Kirehe mu ntara y’Iburasirazuba, bavuga ko n’ubwo bazatora abadepite, batarasobanukirwa inshingano z’abo. Ibi babigaragaje, mu biganiro hagati y’abaturage n’abayobozi bitegurwa n’umuryango w’abanyamakuru baharanira amahoro "PAX PRESS".

Umuryango w’abanyamakuru baharanira amahoro "PAX PRESS" wateguye, tariki ya 13 Kamena 2018, ikiganiro gihuza abaturage n’abayobozi ku mw’iteguro y’amatora y’abadepite ateganijwe muri Nzeli 2018. Muri icyo kiganiro, abaturage berekanye ko nubwo bamaze gushaka abazabahagararira mu Inteko Nshingamategeko ku ruhande rw’inshyaka rya FPR, bataramenya neza zimwe mu nshingano z’abadepite.
Karima Potien umugabo wabana barindwi, yagize ati “Turasaba ubuyobozi kurushaho kudusobanurira neza inshigano z’abadepite, tukazatora tuzi neza inshingano zabo. Njye narinzi ko badufasha kutuzanira ibikorwaremezo by’iterambere, ariko bitewe n’ibiganiro numviye hano, menye ko abadepite ari intumwa za rubanda zivuganira abaturage munteko nshingamategeko.”

Nyirarugendo Josephine umubyeyi w’abana batatu aziko inshingano z’abadepite ari ugufasha abaturage kubarindira umutekano. Yagize ati “Nzi yuko inshingano zabo ari ukurinda umutekano w’abaturage, no kubazanira ibikorwaremezo.”
Ntakirutimana Vedaste w’imyaka 18 wari muri icyo kiganiro, avuga ko we ari ubwambere agiye gutora, ariko akaba atazi inshingano zabo azatora, ati “Ni ubwambere ngiye gutora, kandi sinzi inshingano zabo nzatora. Ndasaba ubuyozozi ko bwarushaho kudusobanurira neza ku bigendanye n’inshingano z’abadepite, tukazatora dusobanukiwe abo dutora n’ibyo tubatoreye.”

Umunyamabanga nshingwa bikorwa w’umurenge wa Kirehe, Bihoyiki Léonard avuga ko bafatanyije na komisiyo y’igihugu y’amatora, bari mu gikorwa cy’ uburere mboneragihugu, harimo kuvuga ku matora n’akamaro k’inteko nshingamategeko, ati “Tubikorera munama zihuza abaturage buri wa kabiri, mu inteko rusange z’abaturage. Ni naho tubonera umwanya wo kubasonurira umudepite ni muntu ki? Ashinzwe iki. Tugira kandi n’inama nyuma y’umuganda, umugoroba w’ababyeyi, tukanifashisha ubuyobozi bw’amadini, amakoperative atandukanye, aho hose ni uburyo dukoresha kugira ngo abaturage basobanukirwe neza inshingano z’abadepite.” Léonard akomeza avuga ko hari urundi rwego ruri munsi y’umudugudu, arirwo "Amasibo", agizwe n’ingo ziri hagati ya 10 na 15. Abaturage bigishirizwamo byinshi harimo n’amatora y’abadepite.”

Imitwe ya politiki iri gushakisha abakandida bazayihagararira, bihereye mu nzego zibanze, aho abaturage bagiye batora abazabahagararira mu matora. Kuri ubu, mu baturage harimo n’urubyiruko rugiye gutora bwambere. Igikorwa cyo kwitegura amatora y’abadepite cyatangiriye mu midugudu, hakorwa ubukangurambaga, no kwikosoza kuri lisiti y’itora.

Umutwe w’abadepite ugizwe n’imyanya 80 harimo 53 ihatanirwa binyuze mu mashyaka, 24 yagenewe abagore, 2 y’urubyiruko ndetse 1 wagenewe abafite ubumuga.

Hategekimana Innocent


Tanga igitecyerezo

Who are you?