Yashyizweho kuri 3 May, 2016 | 16:10

Ki-Moon arasaba buri wese kurinda ubwigenge n’ubwisanzure bw’itangazamakuru

Kuri uyu munsi wa 3 Gicurasi 2013 wizihizwaho Ubwisanzure bw’Itangazamakuru, Umunyamabanga Mukuru wa Loni yasabye za guverinoma, abanyepolitiki ibigo, ndetse n’abaturage gushyigikira no kurinda ubwigenge n’ubwisanzure bw’itangazamakuru.

Mu butumwa bwe kuri uyu munsi wagenewe ubwisanzure bw’itangazamakuru Ban Ki-Moon yongeye kwibutsa isi ko uburenganzira bwa muntu, demokarasi, ndetse n’iterambere rirambye byose bishingira ku guhanahana amakuru mu bwisanzure bigerwaho kubera ubwisanzure bw’itangazamakuru. Yavuze ko kwizihiza umunsi mpuzamahanga w’itangazamakuru ari uguha icyubahiro abakora uwo mwuga bashyira ubuzima bwabo mu kaga cyangwa se babutakaje kubera akazi bakora.

Ban Ki-Moon yavuze ko ubwisanzure bw’itangazamakuru n’ubwo guhanahana amakuru ari ingenzi mu gutuma abaturage bamenya intego z’iterambere rirambye, ariko na none bikabafasha gutuma abayobozi bubahiriza inshingano zabo n’ibyo biyemeje. Ngo itangazamakuru cyane cyane iryifashisha internet rigenda rifata indi ntera, ni amaso n’amatwi y’isi yose, kuko amakuru ritanga agera kuri benshi.
Ngo ku bw’ibyo, ni ngombwa ko itangazamakuru ryigenga rikanisanzura, kugira uwo mwuga ukorwe mu mutekano wuzuye.

Nk’uko igitangazamakuru www.izubarirashe.rw, cyahinduye iyi nkuru gikomeza kibitangaza, Ban Ki-Moon akomeza avuga ko inshuro nyinshi abanyamakuru batotezwa, baterwa ubwoba, ndetse bahura n’imbogamizi bamwe bakanicwa bazizwa gushakisha amakuru. Yemeza ko hari benshi bafungwa, abandi bakabaho nabi kubera ko bashyize ahagaragara intege nke za guverinoma, amanyanga y’ibigo cyangwa se ibibazo bya sosiyete. Ati “Mpangayikishijwe n’ibibazo bigenda byiyongera abanyamakuru bahura na byo mu bihugu byinshi. Ndasaba za guverinoma, abanyepolitiki, ibigo n’abaturage guteza imbere no kurinda ubwigenge n’ubwisanzure bw’itangazamakuru.” Ngo iyo nta bwisanzure bw’itangazamakuru buhari, abaturage na bo ntibaba bisanzuye “mu gihe buhari dushobora kubaka isi nziza kandi itanga amahirwe kuri bose.”

Icyegeranyo ku bwisanzure bw’itangazamakuru cyakozwe n’umuryango utagira umupaka w’abanyamakuru mu Mpera za Mata uyu mwaka, cyagaragaje ko habayeho gusubira inyuma mu bwisanzure bw’itangazamakuru ugereranyije n’umwaka ushize ku isi yose.

PAX PRESS


Tanga igitecyerezo

Who are you?