Yashyizweho kuri 20 August, 2018 | 17:39

Kansi: Urubyiruko ruritwararika ku babyeyi ngo ruzahabwe impano

Itegeko No 27/2016 ryo kuwa 8/7/2016 rigenga imicungire y’umutungo w’abashyingiranywe, impano n’izungura ntiritegeka umubyeyi guha umwana umunani. Ahubwo riteganya ko umubyeyi ashobora guha impano uwo ashaka.Urubyiruko rwo mu murenge wa Kansi mu karere ka Nyaruguru ngo rwarushijeho kubaha ababyeyi mu rwego rwo kubareshya ngo batazagira icyo babima.

Bamwe mu babyeyi bavuga ko iri tegeko ryahinduye imyitwarire y’abana bigaragara, kuko abo wasangaga barigize intabwirwa ubu bisubiyeho, ababyukiraga mu dusanteri nabo ubu bakangukiye gukora ndetse ngo n’umuco wo kwiharika mu rubyiruko wariyongereye.

Mukankusi Domitille, wo mu kagali k’Umunini, ni umubyeyi w’abana batandatu. Avuga ko nibura ubu iri tegeko ryahaye ababyeyi ubwinyagamburiro. Agira ati “kera umwana yarakujujubyaga, ntagire icyo akorera umubyeyi cyangwa ngo nawe akore yiteze imbere ahubwo agahora ategereje umunani azahabwa n’ababyeyi.” Uyu mubyeyi avuga ko nubwo byari itegeko gutanga umunani ariko nabwo ngo abana bose ntibahabwaga kimwe bitewe n’uko umwana uyu n’uyu yakoze. Yewe iryo tegeko No 22/99 ryo kuwa 12/1/1999 ryateganyaga ko umwana wabaga yaraciwe kubera kwitwara nabi cyangwa guhemuka atagiraga uburenganzira ku mubano.
Bamwe mu rubyiruko basanga iri tegeko ryo muri 2016 ryaraje ribapyinagaza ariko nyine ngo nabo bagomba gushaka uko byanga bikunda umunani bawuhabwa nk’impano. Byukusenge Emmanuel ati “ababyeyi badutoza gukura amaboko mu mifuka tugakora, cyakora bisaba ubufasha bwabo icyo gihe rero utavuga rumwe n’umubyeyi byakugora.”

Cyakora ngo n’ubwo ubona urubyiruko rwitwararika gushimisha ababyeyi, ariko ngo itegeko ubona ryararakaje abahungu by’umwihariko. Nk’uko bitangazwa na Louise Musabyemaliya, umubyeyi wo mu kagali k’Umunini, mu murenge wa Kansi.
Musabyemaliya ati “imyitwarire y’abana ku babyeyi yarahindutse pe. Nta mwana hano mperuka kumva yakubise umubyeyi we, ubundi wasangaga umubyeyi n’umwana bashyamirana kubera iminani ariko ubu ahubwo abazi ubwenge bitwararika guserereza ababyeyi.”

Gusa kuri Clarisse Uwineza, umukobwa wo muri uyu murenge avuga ko bitumvikana ukuntu umubyeyi yabyara umwana akamureka akandavura bitewe no kubura ubushobozi. Ati “ umubyeyi utubakira umwana we ni umubyeyi gito rwose. Njye ku bwanjye simbona impamvu ya ririya tegeko.”

N’ubwo ariko urubyiruko rwitwararika, ariko bamwe mu babyeyi babona guha abana umunani babifata nk’inshingano zabo. Ibi kandi babyemeranya na Me Elia Nizeyimana uvuga ko n’ubwo itegeko ridahatira umubyeyi guha umwana we umunani ariko ngo ntiryaje gukuraho inshingano z’ababyeyi ku bana babo harimo no kubarera.

Iri tegeko ryasohotse muri 2016 ryaje rivugurura iryo muri 1999 ryo ryateganyaga ko buri mubyeyi aha umwana we umunani. mu ngingo yaryo ya 42 ryagiraga riti “ itanga ry’umunani ni igikorwa ababyeyi bakora bakiriho kigamiije kugabira umutungo abana babo cyangwa ababakomokaho bagahita bawegukana bikitwa ko bashoje inshingano yo kubarera no kububakira”. Mu ngingo ya 43 ryavugaga ko abana bose n’abahagarariye abakomoka ku bana bapfuye mbere y’ ababyeyi uretse abaciwe kubera kwitwara nabi cyangwa guhemuka, bagira uburenganzira ku munani.

Ingingo yaryo ya 23 ivuga ko “Impano itanzwe mu rwego rw’umuryango ishobora gutangwa hagati y’abashyingiranywe ubwabo cyangwa hagati y’abashyingiranywe n’undi muntu cyangwa igatangwa hagati y’ababyeyi n’abana babo kuri bimwe mu bigize umutungo wabo. Iyo ababyeyi baha umwana wabo impano, babikora hadashingiwe ku ivangura hagati y’abana b’abakobwa n’abahungu. Gusa riteganya ko umubyeyi ashobora gutanga impano ku bushake bwe.”

Bamwe mu rubyiruko rwakomeje gusaba ko iyi ngingo yahindutse itari ngombwa, ndetse basaba abadepite ko bakwisubiraho kuko bizongera amakimbirane mu muryango.

Cyakora Umunyamategeko Me Elia Nizeyimana agira inama urubyiruko mu gihe hataraba izindi mpinduka, ko icyiza ari uko buri wese yakwita ku nshingano ze. Ati “nk’umwana ugomba kumenya ko kugirango ubone ku munani ari uko ugusha neza umubyeyi wawe kuko ntiyaguha umunani mu gihe wamuburabuje. Ku babyeyi nabo bagomba kumenya ko icyubahiro cyabo ari uko umwana abayeho (…)”.

Musonera Sosthѐne


Tanga igitecyerezo

Who are you?