Yashyizweho kuri 5 April, 2018 | 21:04

Kamarampaka Matayo, urugero rw’uwakoze Jenocide akiyunga n’abo yahekuye

Kamarampaka Matayo wo mu kagari ka Mubumbano mu murenge wa Kagano mu Karere ka Nyamasheke, yemera ruhare rwe muri Jenocide yakorewe Abatutsi muri 1994. Yabanje gusubiza ibyo yasahuye mbere yuku Inkiko Gacaca zishyirwaho, anemera uruhare rwe mu rupfu rwa Papias Rubwebwe, umugore, n’umukobwa we bari baturanye.

Kamarampaka Matayo ni umusaza w’imyaka 62. Arangwa no kuba buri gihe yambaye ishapure mu ijoshi. Iyo abonye akanya, anyarukira ku Kiriziya kwiragiza Rurema no kongera gusaba imbabazi ku bwicanyi yakoreye Papias Rubwebwe, umugore we n’umukobwa we w’impfura bari baturanye. Yabashoreye arikumwe n’abagenzi be, babicira kuri Paruwasi ya Nyamasheke.Mbere yuko Inkiko Gacaca zishyirwaho, yagize umutinanama wo gusubiza ibyo yari yasahuye. Yateye n’intambwe, yemera uruhare rwe muri Jenoside yakorewe Abatutsi yahitanye inzirakarengane zirenga miriyoni. Yanze ko isi n’ijuru bimucira urubanza, bikamuhana byihanukiriye, bityo ahitamo kuvuga ukuri, yerekana abo bafatantyije mu kwica Papias Rubwebwe n’abo yapfanye nabo.

Nibwo yegereye Mukarubibi Aulérie, ikirondampfura cya Papias Rubwebwe, warokotse Jenoside, amusaba imbabazi. Ubwo Kamarampaka yari yarakatiwe igihano cy’imyaka itanu n’amezi 11 n’andi mezi atandatu ya TIG (Travaux d’Intérêt Général). Kamarampaka Matayo ntiyigeze agira umutima utuje atarabona imbabazi. Yisunze Padiri Alexis Nshimiyimana kugirango yicuze ibyaha bye, harimo nicya Jenoside (gusaba penitensiya), ariko Padiri aramuhakanira! Yamubwiye yuko agomba kubanza gusaba imbabazi abo yiciye.

Kamarampaka Matayo, siwe wenyine umutima wakomangaga. Yari kumwe n’abandi 126 bakoze Jenoside barangije ibihano byabo. Ubwo bisunze Padiri Alexis Nshimiyimana kugirango bahambwe penitansiya. Ni mu mwaka wa 2016, aho mu Karere ka Nyamasheke, Kiriziya yari irimbanyije mu gikorwa cy’isanamitima, haba kubiciwe cyangwa abishe. Kamarampaka yahise abatizwa n’abagensi be 84 bemeye uruhare rwabo muri Jenoside, kandi bagasaba n’imbabazi.

Imvano y’izina ″Kamarampaka″

Kamarampaka Matayo yavutse kuva 27 Nzeli 1959, ubwo amatora ya kamarampaka mu Rwanda yabaga ku tariki ya 25 Nzeli 1959. Ababweyi be bamwise ″Kamarampaka″, kuko bavugaga ko impaka zirangiye ku kibazo cyo guhitamo ubwami cyangw
a Repubulika. Icyo gihe igihugu cyari mubihe bikomeye bishingiye ku moko.
Se wa Kamarampaka wari umuyobozi (umuserire) wa serire Mikingo, segiteri Mubumbano muri komini ya Kagano ahagana 1987-1991, yari n’umurwanashyaka w’ishyaka rya MDR (Mouvement Démocratique Républicain) nyuma aza kuba umurwanashyaka wa MRND (Mouvement Révolutionnaire pour le Développement) rya Perezida Juvénal Habyalimana.
Kamarampaka Matayo avuga ko nubwo se yarakomeye muri politiki, we atiyigeze ayinjiramo cyane. Ibyamubayeho ajya mubitero byo kwica Abatutsi ni gikorwa kigayitse, cyatewe n’umwuka wa politiki wari uhari icyo gihe cya Jenoside.

Uyu mukecuru w’imyaka 78 yahaye imbabazi Kamarampaka Matayo kuko yagaragaje umutima umenetse k’ubwicanyi bwa se Papias Rubwebwe, nyina umubwara na mukuru we. Atangaza ko Kamarampaka yamusubije ihene n’akabati yari yarababohoje. Mukarubibi ntiyari azi ko Matayo Kamarampaka yarari mu gitero cyamwiciye ababyeyi be kuri Paruwasi ya Nyamasheke.

Mukarubibi Aulérie watanze imbabazi, afite n’intimba ku mutima kuko umugabo we Hitimana Antoine wigeze kuba burugumestiri wa komine Kagano ari muri gereza kubera icyaha cya Jenoside. Uyu mugabo yarahagarariye ishyaka rya MRND muri komine ya Kagano ryateguye rikanashyira mu bikorwa Jenoside yakorewe Abatutsi muri 1994. Mukarubibi anababazwa nuko bamusenyeyi inzu ye bakanamusahura. Muri icyo gihe yarafite abana umunani. Ntanumwe wishywe n’ubwo ubu babiri bitabye Imana.

Kamarampaka Matayo na Mukarubibi Aulérie babanye neza cyane. Basengera mu Kiriziya imwe no mu Muryangoremezo umwe. Bigishijwe n’Abakorerabushake baharanira amahoro mu muryango wa AVP (Association des Volontaires de la Paix) kubabarirana. Bari mu itsinda rimwe rigizwe n’abacitse kw’icumu rya Jenoside n’ababiciye, bagafungwa, bakarangiza ibihano, bagasaba n’imbabazi.
Bibumbiye mu itsinda ryitwa : ″Abunze ubumwe″ rigizwe n’abantu 30. Muribo, hari igice kimwe kigizwe n’abantu 15 barokotse Jenocide n’ikindi gice cy’abakoze Jenoside basabye imbabazi bakanazihabwa.

Boroye ihene 44 ariko batewe inkunga na AVP, aho buri munyamuryango ashobora kuziturira undi uri mu gice runaka. Kuberako rikora neza, rifite gahunda yo koroza irindi tsinda ry’abiyunze ryitwa : ″Abiyunze″.

Kamarampaka Matayo avuga ko izo hene zibaha ifumbire kandi zikaba zibafasha kuva mu bukene, kuko itsinda ryumvikana uko ryagurisha abane b’ihene, bityo bakikemurira ibibazo by’imibereho.
Uyu mugabo Kamarampaka Matayo ashishikariza abakoze Jenoside kwiyunga n’abo bahemukiye kuko ariwo muti wo gukira ibikomere.

Nizeyimana Elias


Tanga igitecyerezo

Who are you?