Yashyizweho kuri 27 March, 2018 | 07:32

Kagano: Kugabirana byashimangiye ubumwe n’ubwiyunge

Abaturage batuye mu Murenge wa Kagano, mu Karere ka Nyamasheke, mu ntara y’Iburengerazuba, bemeza ko kugabirana amatungo byabafashije kubaka imibanire myiza hagati yabo binabageza ku bumwe n’ubwiyunge. Aho imibanire yabo yabaye myiza cyane ubu bakaba babanye neza mu mahoro.

Kugabirana kw’abaturage bo muri aka gace, bikorwa binyuze mu matsinda bibumbiyemo, agizwe n’abacitse ku icumu rya jenoside yakorewe abatutsi mu 1994 n’abayikoze bakaba barafunguwe, cyangwa bararangije ibihano nsimburagifungo( TIG).

Nzabumunyurwe Epimaque wakoze jenoside nawe avuga ko mbere yumvaga afite ipfunwe, kubera ibyo yakoze kuko iyo yahuraga n’uwo yahekuye yumvaga nta mahoro afite muriwe. Ati“ natekerezaga ko uwo nahemukiye nawe ashobora kwiyishyurira nkumva ko isaha iyo ariyo yose nanjye banyica , nkumva mfite ikimwaro ahantu ngenda hose ngatekereza ko baganira bose ari ngewe bari kuvuga." Akomeza avuha ko atari atuje nubwo yari yarasabye imbabazi agahanwa kandi akarangiza igihano. Ati " Icyaje kuntinyura ndetse ngasabana nabo, nahemukiye, nagiye kubona mbona umubyeyi, angabiye ihene birantungura, ariko birananshimisha cyane. Guhera uwo munsi natangiye kumva mbohotse kuko twaganirye byinshi bituma twiyunga.”

Mukankusi Francoise umubyeyi wacitse ku icumu rya jenoside,avuga ko nubwo nyuma y’amahano yabaye mu gihugu nta wavugaga rumwe n’undi, ubu siko bikimeze kuko bakundanye. Ati "Mbere ntabwo navugaga rumwe n’uwanyiciye kuko nahuraga n’umuntu witwa umuhutu nkumva ubwoba buranyishe ndetse nkanamutuka kuko numvaga umutima wanjye warazinutswe abantu bose bagize uruhare muri jenoside."
Yungamo ati “ Iyo nabonaga umwana wanjye ari kumwe n’uw’uwampekuye naramukubitaga nkamubuza kugendana nawe. Nyuma yaho Umuryango Nyarwanda w’Abakorerabushake Baharanira Amahoro (Association des Volontaires pour la Paix) iduhuguye uburyo tugomba kubana neza nta makimbirane, ndetse tugaharanira gushaka icyaduteza imbere, yaduteye inkunga. Twaguze amatungo magufi turagabirana bizamura imibanire hagati yacu. Ubundi ubusanzwe iyo umuntu akugabiye itungo, ni nk’igihango cy’ubucuti muba mugiranye gikomeye. Kuko nyuma twarushijeho kujya dusurana ndetse tukanasangira mu minsi mikuru, tugatabarana, mu by’ukuri ubuzima bwarahindutse tubanye neza mu mahoro. ”

Abaturage bavuga ko umuco wo kugabirana,wagize uruhare rukomeye mu gutuma bagera ku bumwe n’ubwiyunge. Ariko byose bakaba babikesha uyu muryango. Ukaba warabakanguriye kubana mu mahoro hagamijwe iterambere no gushimangira imibanire myiza.

Umuyobozi wa AVP Kamanzi Innocent, avuga ko Nyuma ya 1994 hari akazi gakomeye ko kongera kubaka imibanire myiza y’abanyarwanda. Ati " twegereye abaturage tubigisha kureka amakimbirane abantu bakabana neza mu mahoro
Nyuma yo kwigisha abaturage uburyo bwo gukemura amakimbirane, habayeho no kubafasha gushyiraho ibikorwa byabafasha mw’ iterambere. Aho twabahaye inkunga y’amafaranga agera kuri miliyoni imwe n’ibihumbi ijana (1.100. 000 Frw), baguramo amatungo magufi nyuma bagenda bagabirana kugira ngo bakomeze kubaka ubumwe hagati yabo”.

Intumwa y’Urwego rw’igihugu rw’imiyoborere (RGB) Rwabuyonza Jean Paul yavuze ko AVP ari umufatanyabikorwa wa RGB. Ati “Nk’imiryango itegamiye kuri leta yo igera aho twe tudashobora kugera, iyo tuyiteye inkunga irahatugerera tubinyujije muri iyo miryango kugira ngo dufatanye kugera kuri rya terambere twese dushaka kugeraho. Turabashimira ko inkunga tubaha bayikoresha neza baharanira ko abaturage bakomeza kubana neza.”

Umurenge wa Kagano uherereye mu Ntara y’Iburengerazuba mu Karere ka Nyamasheke. Ibiganiro hagati y’abaturage n’abayobozi, byateguwe n’Umuryango w’abanyamakuru baharanira amahoro PAX PRESS, n’umuryango nyarwanda utegamiye kuri leta w’abakorera bushake baharanira amahoro AVP. Ku nkunga y’Urwego rw’Igihugu rw’Imiyoborere, RGB.

Hategekimana Innocent


Tanga igitecyerezo

Who are you?