Yashyizweho kuri 5 April, 2018 | 09:10

Kagano- Jenoside: Bayiro Bernard yasabye imbabazi uwamwishyuye imitungo abeshyerwa

Umurenge wa Kagano mu Karere ka Nyamasheke, ni umwe mu mirenge igaragaramo ubwiyunge butaryarya hagati y’abarokotse Jenoside yakorewe Abatutsi n’abayikoze. Bayiro Bernard yasabye imbabazi umuryango wa Ndabikunze Alphonse, kuba waramwishyuye ibyo mu muryango we byangirijwe muri Jenoside kandi ubeshyerwa.

Bayiro Bernard yateye intambwe y’ubutwari, asaba imbabazi umuryango wa Ndabikunze Alphonse kubera ko yakiriye indishyi z’ibyo mu muryango we byangijwe muri Jenoside yakorewe Abatutsi muri 1994, kandi uyu Ndabikunze abeshyerwa. Ubu buhamya, bwatanzwe mu biganiro umuryango w’Abakorerabushake b’Amahoro (AVP) ufatanyije n’umuryango w’Abanyamakuru baharanira amahoro (PAX PRESS) mu murenge wa Kagano mu karere ka Nyamasheke, tariki ya 23 Werurwe 2018.

Bayiro Bernard amaze kumenya ko Ndabikunze Alphonse ntaruhare yagize mu gusahura iby’iwabo, yahisemo kumusanga kugirango amusabe imbabazi, ati ″Maze kumenya neza uko byagenze, nasanze nta ruhare bagize muri Jenoside, by’umwihariko nta kintu cy’iwacu bangirije, nahisemo kubasaba imbabazi imbere y’imbaga. Nabasabye kubasubiza ibyo banyishyuye kuko icyo nashakaga si ibintu ahubwo ni ukubana neza no mu mahoro”. Bayiro Bernard yemeza ko biyunze, ndetse n’imiryango yombi ibyarirana abana muri batisimu.

Magnifique Thèrese umugore wa Ndabikunze Alphonse, yemeza ko Bayiro Bernard yabasabye imbabazi, kandi akazihabwa. Yatanze ubuhamya yemeza ko umuryango we wishyuye imitungo y’umuryango wa Bayiro Bernard yangijwe muri Jenoside, mu gihe umugabo we yari muri Gereza afungiwe icyo cyaha. Magnifique Therese yavuze ko nubwo bishuye iyo mitungo, ntibemeraga icyaha cyo gusahura, kuko Jenoside iba, umugabo we NdabikunzeAlphonse yari arwaye marariya ikaze cyane kandi nawe (Magnifique Therese) yari atwite inda nkuru, yari yaramuguye nabi ku buryo atabashaga gusohoka mu nzu.

Magnifique Thèrese asanga hari intambwe ikomeye yamaze guterwa mu bumwe n’ubwiyunge, kuko hari hamenyerewe ko abishe ari bo bemera icyaha bagasaba imbabazi abo biciye bakanazihabwa, ati ″Iyo uwacitse ku icumu ateye intambwe akavuga ati muri iyi mitungo nishyuwe harimo uwanyishyuye ataragize uruhare mu kwangiza ibyanjye, reka musabe imbabazi nanamusubize ibyo yanyishyuye, ni ubumwe n’ubwiyunge buhambaye bwashinze imizi″. Magnifique avuga ko Bayiro Bernard yabahamagaye akababwira ko abashaka iwe mu rugo, bamwitabye bakeka ko agiye kwongera kubafungisha. Nyamara icyo yari agamije kwari ukubasaba imbabazi kuko yari amaze kumenya neza ko umuryango wa Ndabikunze Alphonse nta ruhare wagize mu kwangiza no gusahura imitungo y’iwabo.

Kanzayire Bernadette, umukorerabushake wa AVP akaba yaranahoze ari Umuvunyi mukuru wungirije, yashimye intambwe yatewe mu bumwe n’ubwiyunge mu murenge wa Kagano, ati “Ibikomere ku mpande zombi haba kuwiciwe cyangwa n’uwabeshyewe nk’ibyabaye kuri Magnifique, ntibiba byoroshye kubikira. Kubikira ni ubutwari bukomeye”. Asanga kuba hari abatinyuka kubitangamo ubuhamya bizarushaho kwubaka umuryango nyarwanda.

Umuyobozi mukuru ushinzwe imirimo rusange mu Karere ka Nyamasheke, Niyibizi Ntabyera Hubert, nawe yashimye imiryango yiyunze. Yavuze ko iyo abantu babanye batishishanya, bariyunze n’ibikomere byaromotse, n’inzira z’imiyoborere zirushaho kworoha.

Mu izina ry’Umuyobozi mukuru wa RGB, umuhuzabikorwa w’imiryango itari iya Leta mu kigo cy’Igihugu cy’imiyoborere (RGB), Rwabuyonza Jean Paul, yishimira ibikorwa bya AVP mu gufasha abaturage kwiyunga no kwiteza imbere.
Mu bikorwa by’Umuryango w’abakorerabushake b’amahoro (AVP) harimo no guhugura abacitse ku icumu rya jenoside yakorewe abatutsi mu 1994 n’abagize uruhare muri ubwo bwicanyi barangije ibihano bagafungurwa cyangwa barangije ibihano nsimburagifungo (TIG). Bifashisha amatsinda, buri tsinda rigizwe n’abantu mirongo itandatu ku rwego rw’Akagari harimo abacitse ku icumu n’abakoze Jenoside. Batozwa kubana mu mahoro no gufatanyiriza hamwe ibikorwa by’iterambere.

Manzi Gérard


Tanga igitecyerezo

Who are you?