Yashyizweho kuri 3 July, 2018 | 11:22

Kabarondo: Umwotsi wazamukaga ku kiliziya, “naketse ko ari uva mu gikoni cy’impunzi” (Barahira)

Mu iburanisha, ubu rigana ku musozo, ry’urubanza rwa Tito Barahira na Ngenzi Octavien baregwa jenoside mu rukiko rwa rubanda rw’i Paris mu Bufaransa n’ibindi byibasiye inyokomuntu bakoreye i Kabarondo, ku wa kane habaye ibazwa ryimbitse rya Barahira ku iyicwa ry’abatutsi ku Kiliziya kuri 13 mata no ku bitero byakurikiyeho.

Kuri 13 Mata, ubwo abatutsi barenga 3000 batikiriraga mu kiliziya ya Kabarondo, nk’uko bisanzwe , we yari mu mirimo ye yo gukorera urutoki no gushaka ubwatsi bw’amatungo. Akimara kumva urupfu rwa Perezda Habyarimana yarababaye ku buryo atongeye kuva mu rugo iwe. Nka saa cyenda, avuye mu kazi ageze kuri kaburimbo, impunzi nyinshi za Byumba zahungaga zerekeza Tanzaniya zimubwira ko zibonye Kiliziya ya Kabarondo icumba umwotsi mwinshi cyane. Babivuga gutyo “natekereje ko ari umwotsi uturuka mu gikoni aho impunzi zitekera. Ariko ngira amatsiko yo kujya kureba”.
Ibilometero 4 bitandukanya iwe i Cyinzovu na Kabarondo, Barahira Tito yahisemo kubikora n’amaguru aho gufata igare rye. Saa kumi n’imwe n’iminota icumi (17:10) ni bwo yari ageze ku muhanda imbere ya kiliziya. Ku bantu benshi ngo bari bahashwamamariye, abo yatungukiyeho bamubwira ko “kiliziya yarashwe n’abasirikare bajyaga ku rugamba”. Ngo yatunguwe no kumva ko ari abasirikare babikoze. Hari imirambo wabonye? Ubwinshi bw’abantu bwatumaga umuntu atareba neza ku kiliziya, ariko “nashoboye kubona imirambo 5” imbere ya kiliziya.

Ikihutirwaga ni ugukora amashanyarazi!

Bwana Barahira ntiyatinze aho, ubanza ari na yo mpamvu atabonye byinshi byari aho ku kiliziya, kuko yabonye umuyobozi we Electrogaz, ishami rya Kibungo, bajya muri metero 200 gukora amashanyarazi yari yabuze. Ibibazo bya Perezida w’urukiko birasaba ko asobanura impamvu yahise agenda kandi yari yaje aje ku kiliziya.

Nk’umuntu wari warabaye burugumesitiri ntiwatekereje ko haba hari inshuti, umuturanyi, undi muntu se uzi baba bari inkomere? Wumvaga se nta cyo wabafasha? Kuba warahise ugenda, ubu urumva warahisemo neza?

Byabaye ngombwa ko agumana na shefu we kuko yari abimusabye. Banavuye kureba ikibazo cy’amashanyarazi banyura haruguru y’ibiro bya Komini aho kugaruka ku kiliziya. Byatewe n’uko “shefu yabinsabye”, uretse ko n’ubundi “numvaga ari ikibazo kireba ubuyobozi bwa komini…ko nza kureba burugumesitiri kugira ngo turebe icyo twamarira impunzi”.

Yaba yaramubonye bakabivugana? Yamubonye arimo kwinjira muri komini ariko ntibavuganye kuko yakomezanyije na shefu we.

Mu rwego rwo gukosora imvugo, Umunganizi we mu by’amategeko asanga uwo yunganira, kimwe n’ibyo yabonye ku batangabuhamya, afite inzitizi zishamikiye ku muco mu gusubiza abafaransa badahuje umuco. Kugenda n’amaguru kandi hari igare, kutareba ko haba hari inkomere ngo uzitabare, kuvuga ko wagize ngo ni umwotsi wo mu gikoni…reba ukundi ubivuga, kuko mu “muco wa hano ikihutirwa ni ugutabara” . Nyuma y’amakorosi atagira ingano, no kumurandata cyane arashyira ati “kubera ko bwari bwije, icyihutirwaga byari ugukora amashanyarazi, nyine abakomeretse batabarwe habona”

Ngo umucamanza yaramubeshyeye!

Imbere y’ubutabera bw’u Rwanda, byagereranywa no kujya muri ndemeye. Aho umucamanza asuzuma ifungwa cyangwa ifungurwa ry’agateganyo nyuma y’iperereza ry’umugenzacyaha. Mu Bufaransa, umucamanza nk’uyu, bita “juge d’instruction”, afite n’ububasha bwo gukomeza iperereza no kugena niba umuntu akurikiranwa cyangwa arekurwa. Abikora ari hamwe n’uwunganira uregwa, uregwa ubwe, umwanditsi w’urukiko, ndetse n’abacunga umutekano.

Ku wa kane, ubwo yabazwaga niba yarabonye Ngenzi kuri 13 Mata, Barahira avuga ko yamurabutswe yinjira muri komini. “ Nta bundi nongeye, kubera ko nta n’impamvu…nongeye kumubona Benako!” Kuri Perezida w’urukiko, ibi bihabanye n’ibyo yavuze kandi yasinyiye imbere y’umucamanza. Yemeye ko yabonye Ngenzi inshuro eshatu (3), harimo imwe ku kiliziya, “kiliziya ishya, abarokotse bari imbere mu kiliziya agiye gushaka aho kubimurira”.Yaba ngo yarasinye atabisomye.

Umwunganizi we amubwiye ko byose ari sawa. Akandi kanya ati “ariko umucamanza narabimubwiye ntiyabihindura”. “None ukaba ubivuze urubanza rwawe rusozwa?”.

Iki kibazo, ari perezida w’urukiko, ari umwe mu bunganira abaregera indishyi, ari umwunganizi we ubwe barakibajije. Umushinjacyaha we anamwibutsa ko amategeko yamuhaga uburenganzira bwo kurega uwo mucamanza. Ariko se ibyo yaba yarabikoze ari koko ari hamwe n’ukunganira mu by’amategeko? Nyine, ni yo “mpamvu nanjye nahinduye avoka!”.

Ari abavuga bose ko bamubonye ku kiliziya, “barambeshyera!” Abavuga ko bamubonye mu bitero bya nyuma yo ku kiliziya “bihiga abatutsi mu ngo”, “barambeshyera!” Na Karekezi Osee na Rwizibukira? “Bose barambeshera”. Mu babeshyera Barahira harimo n’umuhanga mu bumenyi bwa muntu wamusuzumye wemeza ko “yirinda gukoresha ijambo jenoside”, ko “ahakana byose nk’ufite icyo ahisha!”.

Biteganyijwe ko nyuma ya Barahira, hagomba gukurikiraho ibazwa rya Ngenzi ku byo aregwa. Imwe mu miryango iregera indishyi nka IBUKA-France cyangwa CPCR yagize uruhare rutaziguye mu manza na za dosiye zose za jenoside byageze imbere y’ubutabera bw”igihugu cy’Ubufaransa. Hagomba gukurikiraho imyanzuro y’abavoka b’abaregera indishyi, imyanzuro y’ubushinjacyaha no gusabira ibihano abaregwa. Ku munsi wa nyuma, kumva icyo abaregwa bongera ku rubanza rwabo. Kwiherera kw’urukiko no gusoma urubanza, ku wa 6 Nyakanga hatagize igihinduka kuri gahunda.

Sehene Ruvugiro


Tanga igitecyerezo

Who are you?