Yashyizweho kuri 6 June, 2016 | 16:01

Kabarondo : « Mutangire mukore ahandi barangije » (Barahira)

Mu gihe urubanza rwa Octavien Ngenzi Na Tito Barahira rwatangiye, i Kabarondo aho aba bakekwaho ibyaha bya jenoside bayoboye babavuga uko babazi. Ubuhamya butandukanye bwaba ubw’abacitse ku icumu n’abakoze jenoside butanga amakuru kubyo bashinjwa. Nubwo bitoroshye kuyabona uko umunyamakuru ayifuza.

Utitegereje wagira ngo ni inzu isanzwe, ya bya bisenge bifite inguni n’ubusongero burenze kamwe. Uhereye ku mubiri wayo w’itafari rya mpunyu, hose ni tukutuku, nk’amaraso ngo yahamenekeye. Umusaraba uri ku gasongero k’imbere ni wo uranga ko ari kiliziya ya Kabarondo. Misa zihasomerwa buri munsi, zananiwe kugangahura "muzimu ugamb"a wa Barahira na Ngenzi. « Mutangire mukore…Muteme ! ».

Hari taliki ya 13 mata 1994, ubwo Burugumesitiri wa Kabarondo Octavien Ngenzi na Tito Barahira yasimbuye, bayoboraga igitero kuri iyi kiliziya.None nyuma y’imyaka 22, nk’uko basangiye kuyobora komini ya Kabarondo, ni na ko basangiye icyicaro mu rukiko mpanabyaha rw’i Paris mu Bufaransa, kimwe no ku rurimi rw’abiciwe n’ababiciye b’i Kabarondo. Nubwo mu miryango bavukamo bo bategereje imyanzuro y’urukiko, Kabarondo irabavuga, mu gahinda kenshi babateye. Nka Rutagungira Yohani Damaseni, wacitse ku icumu, uvuka mu murenge wa Cyinzovu asobanura yerekana uko byagenze kuri iriya taliki. Imbere y’umuryango wa Kiliziya, n’agahinda kenshi, agira ati « mama ubwe, ni aha yaguye, bamukubise impiri mu mutwe ». Mu kiniga cyinshi yongeraho umuryango we, umugore n’abana batatu bose ariho baguye.

Ngo interahamwe, abasirikare n’abajandarume bamaze kumena inzugi za kiliziya, abatutsi bari bakiri bazima barabasohoye. Bageze hanze, Ngenzi na Barahira bategetse ko bapfukama bunamye. Maze ngo bavugira rimwe, umujyo umwe ngo « gutema sha ! ». Umupanga, amahiri…icumu rirahoga. Rutagungira arabyibuka. « Ngenzi yari afite imbunda ya masotera (pistolet) iri mu gafuka k’umweru, nk’abajandarume…naho Barahira we yari afite icumu, yambaye n’ikote rirerire rigera mu mavi ».

Umukecuru Yozafina Mukabugingo yasohotse mu kiliziya atakambira Barahira ngo ntibamwice we ni umuhutu. Nyuma y’akanya acecetse, ngo Barahira « yateye wa mukecuru ijanja, agwa yubamye, interahamwe imukubita impiri mu mutwe, ntiyasamba », mbere yo kumwambura ibitenge byose yari yambaye. Usibye aha ku kiliziya, bariya bayobozi ngo bagaragaye n’ahandi henshi mu bwicanyi, ku buryo « uretse n’urukiko, n’Imana izababaza amaraso yose y’inzirakarengane ». Iki ni icyizere Rutagungira asangiye na benshi.

« Murarya amatungo bene yo babareba ! »

Mu bacitse ku icumu, hari abandi benshi basanga uru rubanza rurimo amasomo menshi, nubwo ku bwabo rwari rukwiye kubera aho ibyaha byakorewe. «Nyuma y’imyaka 22 tumaze dutegereje, ubutabera bwajya bujya kuboneka ». Ibi, umugabo wahoze ari umuturanyi wa Ngenzi, watotezwaga buri gihe akicirwa n’umuryango we wose muri jenoside, abisangiye na Samuel Ndoba wari Burigadiye wa Komini ku ngoma ya Barahira na Ngenzi. By’umwihariko, uyu mugabo ngo utaracanaga uwaka na ba shebuja, we asanga « uru rubanza rugiye gushyira ibintu mu buryo. Bapfa kuba bicaye ku ntebe y’abaregwa ! Batsinda, batsindwa, bazaba bumvise ko buri gihe bahitagamo inzira mbi »

Aho atuye mu kagari ka Cyinzovu Mukabugingo Jakilina w’imyaka 52 yazunguye se Murindahabi Yakobo, mukuru wa Barahira.Ngo yumva byinshi. Yicecekeye cyane nk’uvuga ibintu bisanzwe agira ati « ko nta cyo twahindura se ku byabaye cyangwa se ibirimo kuba ! Uko bizagenda kose, ukuri kuzajya ahagaragara maze abantu bave ku nkeke ».

Mbere gato y’ubwicanyi bwo ku kiliziya, Barahira yakuyemo umuryango wa Léopold Gahongayire , umuhutu ufite nyina w’umututsi. Nubwo Gahongayire ashimira Imana, anibaza ariko impamvu Barahira atakoresheje imbaraga nka ziriya ngo arokore abatutsi. Anibaza byinshi. Yakoraga iki mu gitondo cyo ku wa 13 mata imbere ya kiliziya cyangwa se ku isoko ari hamwe na burugumesitiri Ngenzi ? Byari ugukoma imbere se interahamwe, abajandarume n’abasirikare cyangwa byari ukubayobora ngo barimbure abatutsi ? Ese ubundi baganiriye iki na Koloneli Pierre-Célestin Rwagafirita, wari ikimandwa cya Kibungo yose, muri kiriya gitondo cy’ubwicaanyi bwo ku Kiliziya ? Ni nk’aho Gahongayire asaba urukiko rwa Paris kumubariza ibi bibazo !

Etienne Gakwaya, wari konseye wa segiteri ya Rundu, we ntarya amagambo. Jenoside yabaye arora, ahari, dore ko yanafungiwe jenoside. Ubwo segiteri ya Rubira, Ngenzi akomokamo, yateraga segiteri ye ya Rundu, Gakwaya ngo yatabaje burugumesitiri we Ngenzi. Ahageze ngo yatangajwe no kubona abahutu barya ihene z’abatutsi babareba. Ngo yashyize ejuru ati « murarya amatungo beneyo bari aho babareba ! » Kui uyu konseye, aya magambo, anemezwa na burigadiye Ndoba wari waherekeje Ngenzi, yasobanuraga ngo « Mugomba kubanza kwica abatutsi mbere yo kurya amatungo yabo!»

« Mutangire mukore »

Mu byo burigadiye Ndoba yibuka, harimo n’itegeko yahawe na burugumesitiri we Ngenzi ryo kutongera guhisha abatutsi. « Kuki wivanga mu bibazo by’abaturage ? Ntiwongere ! » Nyuma ngo acisha make, amusaba bamwe mu nkomere yari ahishe mgo azijyane kwa muganga. Abo Ngenzi yajyanye ku kigo nderabuzima cya Kabarondo bose barahiciwe.

Naho se kuri Barahira wayoboye Kabarondo mbere ya Ngenzi ? Umugabo washishikaye mu bitero binyuranye, Léonard Gatera, avuga byinshi ku byabaye kuri iriya taliki ya 13 mata 1994. Ubwo Barahira yabasangaga mu kabari k’uwitwa Hilari, ku gasanteri ka Kacyiru, muri Cyinzovu, ngo yarababwiye ati « mutangire mukore, ahandi barangije ! », ahita yishyura amajerikani atatu y’urwagwa nk’agahimbazamusyi. Akomeza agira ati « yaradushutse nk’umuyobozi, adukoresha mu kurimbura abaturanyi, inshuti…Yagombye kubiryozwa, cyangwa se agapfukama agasaba imbabazi abo yahemukiye ».

I Kabarondo, buri wese azi buri wese…kandi Kabarondo iribuka ikavuga. Bavuga Barahira yiyicira Bizimana Samuel wari waravuye mu gisirikare mu myaka ya 1980. Ngo uyu musore bavugaga ko yasambanyije umukobwa, Barahira yamuziritse kuri karosori y’imodoka, amukubita ku gitsina kugeza ashizemo umwuka. Baravuga, bakagera no kuri Colonel Pierre - Célestin Rwagafirita bita umubyeyi wa batisimu wa Kibungo. Nk’umuntu ushyiraho akanakuraho kuva kuri perefe kugera kuri konseye wa segiteri. Wubashywe na bose ! Ariko rero na none, ibya wa mugani, ngo abanzi ba Koloneli ni abanzi ba Ngenzi na Barahira yiterekeye ku ntebe. « Twigeze gutongana (na Ngenzi), amfata no mu ijosi, ngo kubera ko nanze kurasa umucuruzi wari ufitanye ikibazo n’inshuti ya Rwagafirita ». Mu kwibuka ibi, burigadiye Ndoba avuga Ngenzi nk’umuntu wahubukaga cyane. Kuri we, asanga ngo Barahira na Ngenzi jenoside yaratangiye bararangije kurohama. Kuba bari barafashije Rwagafirita « gutegura indunduro ya jenoside » muri perefegitura ya Kibungo « nta rutangira yo kubabuza kugera ku musozo ».

Sehene Ruvugiro


Tanga igitecyerezo

Who are you?