Yashyizweho kuri 26 September, 2016 | 09:05

Itegeko rishya ry’umuryango riraha gasopo abasezerana mu mategeko bagaparika

Itegeko rishya rigenga abantu n’imiryango riraburira abasore n’inkumi bashakana, bamara gusezerana mu mategeko bagaparika, ngo bategereje kubana bavuye mu nsengero. Ingingo ya 207 n’iya 218 ivuga kurenza amezi 12 nta mpamvu ifatika bihita biba impamvu ya gatanya. Nubwo kandi muba mutabanye, ntibikura ho ko mugabana imitungo, igihe mwasezeranye ivangamutungo. Iri tegeko, ryongereye impamvu 2 kuri 6 zari zisanzwe zishingirwaho mu gusaba gatanya, zose hamwe zibaye 8.

Hari abasore bari bafite umuco wo “gusya ubwo kuraza”, akarambagiza imyaka itatu, uwa kane agasaba, uwa gatanu agakwa, uwa gatandatu agasezerana mu murenge(imbere y’amategeko); maze agaterera agati mu ryinyo. Ubwo agahugira mu kubaka amazu, umukobwa akabanza kurangiza amashuri no kubakira iwabo. Benshi banitwaza ko batarabona amafaranga ahagije yo gukoresha ubukwe, aho basezerana imbere y’imana. Ngo agatimba n’amakoti mu majipe y’amahoni, bajye mu mahema, kwiyakirana n’imbaga y’inshuti n’abavandimwe. Mu busitani bwuje amafu n’amafunguro, shampanyi igaturika, bakarya amazi intagara ikaziba. ”Ibyo koko bigakereza umuntu kubana n’uwo bashyingiranwe imbere y’amategeko”.

Kuvanga umutungo mutabana byari ikibazo

Iyo gusezerana imbere y’amategeko bibaye, kuva ubwo abashakanye bitwa umugore n’umugabo. Ababikerensa bagaterera iyo, bahura n’ingorane mu micungire y’umutungo iyo biyemeje kuwuvanga. Muhayimana wo mukarere ka Kayonza agira ati “ ese ko nasezeranye n’umukobwa ivangamutungo tukaba tutarabana, nkaba nshaka kugurisha akabanza ngo ndangize kubaka inzu, ubwo ni ngombwa kumusaba uburenganzira?”

Me Manirafasha Jean Paul asubiza Muhayimana ko kwitwa umugore n’umugabo bitavuga kubana cyangwa kuryamana. Ni amategeko. Ati “Amasezerano y’ivangamutungo ajya mu bikorwa akimara gushyirwaho umukono. Kubana ni ibindi byanyu, mu mategeko ni umugore wawe. Uba wabisinyiye. Ntaba umugore kuko mwabanye, mwaryamanye. Umutungo muba muwufatanije”.

Abandi nka Muhayimana nabo bakumviraho, bagaragaza n’andi makibirane ashobora kuvuka. Uyu wo mu karere Gicumbi ati “twasezeranye ntarubaka, aba agumye iwabo. Nyuma y’amezi arindwi numva ngo aratwite, kandi tutarabana. Abantu bakambwira ngo inda ni iyanjye kandi ntarigeze ndyamana nawe”.
Gusa kumara umwaka mutabana bishobora kugira impamvu ifatika, bityo ntibibe bikibaye impamvu yashingirwaho mu gusaba ubutane. Iyo mpamvu igomba kuba yarumvikanweho na bombi, kandi urukiko rusaba ibimenyetso by’ubwo bwumvikane. Iyo mpamva ishobora kuba akazi cyangwa amashuri ya kure, uburwayi cyangwa izindi zzufatika zemezwa n’urukiko.

Igisubizo mu itegeko rishya

Itegeko rishya rigenga abantu n’umuryango ryazanye impinduka mu bishobora gutuma abashyingiranwe basaba gutana burundu. Iri tegeko ni nº 32/2016 ryo ku wa 28/08/2016 ryasohotse mu Igazeti ya Leta nº37 yo ku wa 12/09/2016.
Ku bintu 6 byari bisanzwe bishingirwaho mu gusaba gatanya, ingingo ya 218 yongeyeho bibiri. Ibyo ni “Ihohoterwa rishingiye ku gitsina, ndetse no kutabana mu gihe kirenze amezi cumi n’abiri akurikirana uhereye igihe habereye ishyingirwa”.Abashyingiranwe mu mategeko, bakagombye gutangira ku ban anta yandi mananiza, iyo batinze bikagera ku mwaka, umwe muri bo yemerewe gusaba gatanya.

Ubusanzwe abasaba gatanya bashingiraga ku bintu bitandatu biteganywa n’itegeko ryo muri 1988. Ibyo ni ukuba umwe muri bo yarahawe igihano cy’ icyaha gisebeje cyane, ubusambanyi, guhoza undi ku nkeke, kwanga gutanga ibitunga urugo, guta urugo igihe cy’amezi cumi n’abiri nibura no kumara nibura imyaka itatu abashakanye batabana ku bushake bwabo.

Izindi mpinduka mu itegeko

Muri iri tegeko, abatangabuhamya mu rubanza rw’ubutane bongerewe. Riteganya ko iyo bibaye ngombwa ko hakorwa iperereza, umuntu wese ashobora kubazwa mu rubanza. Ingingo ya 222, ivuga ko “Ubuhamya bw’abakozi bo mu rugo, ubw’abana n’ababyeyi b’abashyingiranwe bwitabwaho”. Aba ni abantu ba hafi, bakurikirana ibibera mu rugo rw’abashakanye, ku buryo baba bazi neza ibiruberamo
Itegeko rishya kandi ryagabanije igihe cyo gusaba gatanya ku bashakanya batabana ku bushake bwabo, kiva ku myaka 3 kijya kuri 2. Rinasobanura neza icyitwa « Guta urugo », rivuga ko « iyo umwe mu bashakanye afashwe nabi abimenyesha ubuyobozi bumwegereye, bukabikorera inyandiko, nyuma akajya kuba ahamuha amahoro, biba bitakitwa guta urugo ».

Karegeya Jean Baptiste


Tanga igitecyerezo

Who are you?