Yashyizweho kuri 17 February, 2017 | 09:03

Impunzi zitahuka zigiye kujya zihabwa amafaranga

Ishami ry’umuryango w’abibumbye ryita ku mpunzi, HCR, ryatangaje ko rigiye gutangira guha amafaranga impunzi z’Abanyarwanda zitahuka, aho gukomeza kubaha inkunga y’ibiribwa n’ibindi bikoresho nk’uko byari bisanzwe.

Uburyo impunzi zitahutse zahabwagwamo imfahanyo yo kuzitunga bugiye guhinduka. Impunzi ahanini zizajya zituruka mu bihugu bya Afurika yo munsi y’ubutayu bwa Sahara, zizajya zihabwa telefoni na simcard ya airtel ishobora gukoresha Airtel Money, ndetse na I&Bank ikazabafasha kubona serivisi za banki ngo bahabwe ayo mafaranga.

Umuntu mukuru utahutse azajya ahabwa $250, ni ukuvuga asaga 200 000 Frw, naho umwana ahabwe $150 hiyongeraho telefoni ngendanwa. Umuyobozi uhagarariye HCR mu Rwanda, Azam Saber, yavuze ko kubaha amafaranga bizaha ubwigenge busesuye abatahuka bagakoresha ubufasha bagenerwa uko bashaka.

Mu itangazo HCR yageneye itangazamakuru kandi yavuze ko “Iki cyemezo cyo gutanga amafaranga kigamije gushishikariza impunzi nyinshi z’Abanyarwanda ziri mu karere gutahuka, mbere y’uko itariki yo kwitwa impunzi igera, mu mpera z’uyu mwaka.” Saber yavuze ko guha amafaranga abatahuka ari ukubaha agaciro ngo babashe kwihitiramo yaba icupa ry’amazi bashaka, imyenda, cyangwa ibyo kurya. Yakomeje agira ati “Icya nyuma rero nk’uko nabivuze, bizagira uruhare mu bukungu bw’u Rwanda kubera ko twashyize amafaranga mu bukungu.”

Iyi nkuru igihe.com cyakuye kuri Royal TV ikomeza ivuga ko uko abazajya bahabwa aya mafaranga bazajya bagura ibyo bakeneye mu Rwanda, bitandukanye n’uko ibikoresho bahabwaga byavaga hanze yarwo kandi bikinjizwa mu gihugu bidatangiwe umusoro.
Iri shami ry’Umuryango w’Abibumbye ryita ku mpunzi rivuga ko ryiteze ko nibura mbere y’uko uyu mwaka urangira ari nawo uzarangirana n’ubuhunzi ku Banyarwanda, impunzi 20 000 zigomba kuba zatahutse.

Mu Ugushyingo 2016 mu nkambi y’agateganyo ya Nkamira mu Karere ka Rubavu, nibwo Ishami ry’umuryango w’bibumbye ryita ku mpunzi ryatangiye guha ubufasha bw’amafaranga impunzi z’Abanyarwanda zatahukaga ziva muri Repubulika Iharanira Demokarasi ya Congo, hagamijwe kugenzura niba iki gikorwa gishoboka, cyangwa se niba kizakirwa neza n’impunzi.

Kugeza mu mpera z’umwaka ushize, impunzi 403 nizo zahawe ubwo bufasha bw’amafaranga.

Pax Press


Tanga igitecyerezo

Who are you?