Yashyizweho kuri 12 December, 2017 | 19:10

Imikoranire itanoze y’inzego mu kwimura abaturage ituma batabonera ingurane igihe- Ubushakashatsi

Kuba nta genamigambi rinoze rikorwa mbere yo kwimura abaturage ahazashyirwa ibikorwa cy’inyungu rusange n’ibindi bikorwa by’iterambere, ni bimwe mu bituma inzego bireba zitana ba mwana bigatuma abaturage basiragizwa ntibishyurirwe igihe.

Ibi ni bimwe mu byavuye mu bushakashatsi bwiswe “Isesengura ku kwimura no gutanga ingurane hamwe no gurerekanya ubutaka” bwakozwe n’ihuriro nyarwanda ry’imiryango ya Sosiyete sivile (RCSP) bwashyizwe ahagaragara ku wa 30 Ugushyingo 2017 mu cyumba cy’inama cya Convention Center i Kigali.
Ubu bushakashatsi bugaragaza ko amategeko agenga kwimura no gutanga ingurane asobanutse ndetse anagena uko bigomba gukorwa, nyamara imikoranire y’inzego zitandukanye ziba zirebwa n’aho igikorwa kigiye kubera ugasanga ari yo ituma abaturage batishyurirwa igihe ndetse hakaba n’aho ibikorwa byuzura abaturage batarabona amafaranga yabo.

Dr Eric Ndushabandi wayoboye ubu bushakashatsi, avuga ko basanze abaturage basiragizwa batazi aho bajya kubariza, inzego z’ibanze zikabatererana kandi ari zo baba bazi. Dr Ndushabandi ati “Hari igihe usanga ari nko kwubaka umuhanda cyangwa Umudugudu, abaturage bajya kubaza ku murenge Gitifu ati muzabaze uwa RTDA, ubundi ngo muzabaze uw’Ikigo gishyinzwe imyubakire, uwa RDB… kandi umuturage we yaramenyereye ko urwego rumwegereye ari rwo rumukemurira ibibazo. Umuyobozi azi umuhagarariye ni Gitifu cyangwa Meya”.

Dr Ndushabandi avuga ko ikibabaje usanga umuturage bamwicaza bakamusobanuza, aho kugira icyo bamufasha bakamubwira ngo uru rwego ruzabikora. Ati “Ibi bitinza ikibazo kubera kugihererekanya, ugasanga abantu batumva akamaro k’imikoranire y’inzego mu gukemura ikibazo cy’umuturage”. Uyu mushakashatsi avuga ko inzego zose zirebwa n’igikorwa kigiye gukorerwa ahantu zakagombye kujya zikorera hamwe kugira ngo zorohereze umuturage akenshi utaba ufite ubumenyi bwo gutandukanya izo nzego zose.

Umuturage witwa Jean Paul w’i Rushashi ho mu Karere ka Gakenke wagaragaje akababaro we na bagenzi be bafite, yavuze ko hari umuyoboro mugari w’amashanyarazi wanyujijwe mu masambu yabo batabanje no kwumvikana ku igenagaciro, ati “Nubu ntiturishyurwa kandi intoki zacu zaratemaguwe, ntituzi aho kubariza”.

Bahingana Vincent ukora mu kigo cy’Igihugu cyo gutanga no gukwirakwiza amashanyarazi (REG), avuga ko ikigo akorera ari kimwe mu bigo byimura kandi bigatanga ingurane henshi mu gihugu kandi ku buso bunini. Nawe yemera ko ikigo akorera gitinda kwishyura abaturage, ariko akavuga ko biterwa n’uko amategeko y’imyishyurire ateye. Bahingana abisobanuye yagize ati “Amafaranga atinda kubera uko itegeko ryo kwishyura amafaranga ya Leta riteye. Hari igihe usanga ugomba kwishyurira rimwe abaturage benshi, harimo abo ugomba kwishyura amafaranga make nk’ibihumbi bitanu cyangwa icumi kandi agomba kunyuzwa ku ma konti nyamara umuturage ntayo agira, ugasanga amafaranga yo kuyifungura aruta ayo azahabwa bigatuma bamwe banga kujya kuzifunguza. Ibi rero usanga bidindiza abandi bagombaga kwishyurirwa hamwe”. Uyu muyobozi muri REG asanga hagakwiye ubuvugizi itegeko rigahinduka ku buryo abaturage bishyurwa amafaranga make batazajya badindizwa n’iyo nzira ndende ituma bidindiza n’abagombaga kwishyurwa menshi.

Cyakora umuyobozi muri Minisiteri y’ubutegetsi bw’igihugu ushinzwe igenamigambi, Ningabire Yves Bernard yemeza ko nta gikorwa cy’inyungu rusange gikorwa kitateguwe, bityo agasanga nta mpamvu abayobozi b’inzego z’ibanze bakagize mu gufasha abaturage kubona ingurane yabo. Ati “inzego zasabwe kujya zikora inyigo y’aho amafaranga azava, bikamenyeshwa abaturage mbere, ntibitume basiragira”. Akomeza avuga ko ubushake bwo kworohereza umuturage buhari ahubwo inzego bireba zigomba kubishyira mu bikorwa.

Itegeko ryo kwimura no gutanga ingurane n° 32/2015 of 11/06/2015 rivuga ko ingurane itangwa mu gihe kitarenze iminsi 120 (amezi ane) umuntu abariwe, yarenga umuturage agatangira kubarirwa inyungu ya 5% y’agaciro k’ingurane.

Manzi Gérard


Tanga igitecyerezo

Who are you?