Yashyizweho kuri 26 July, 2016 | 15:48

Igikomo gikoresha ikoranabuhanga kigiye kwifashishwa mu gukurikirana abakatiwe

Abantu batandukanye barasaba ko u Rwanda rwatangira gukoresha igikomo gifasha gukurikirana ku buryo bw’ikoranabuhanga abakatiwe n’inkiko, (bracelet electronique /Ankle Monitor) ku bantu banyuranye bakatirwa n’inkiko igihano cyo gufungwa.

Abanyamategeko n’abagize société civile bahuriye mu kiganiro cyateguwe n’Urugaga rw’abafasha mu by’amategeko, Legal Aid Forum, LAF, ku ya 25/07/2016, bungurana ibitekerezo ku byakorwa mu guhana abahamwe n’ibyaha atari ukubafunga gusa.
Kimwe mu byo basabye, harimo igikomo gifasha gukurikirana ku buryo bw’ikoranabuhanga abakatiwe n’inkiko, (bracelet electronique /Ankle Monitor).

Minisitiri w’ubutabera yabwiye abitabiriye ibyo biganiro ko Leta yiteguye kwakira igitekerezo cyose cyafasha kugabanya abantu mu magereza. Ngo uretse n’uko abafunzwe batishimiye ubuzima bwo muri gereza, banakomeza kuba umuzigo uremereye kuri Leta kuko ibatangaho amafaranga menshi yo kubatunga. Kuri we ngo nubwo iki gikomo gihenda, abantu bakwiye gukomeza gutekereza uburyo cyakoreshwa kuko cyatuma abahamwe n’ibyaha biciriritse bakomeza kuba mu buzima busanzwe ariko bakurikiranywe n’ubutabera.

Iki gikomo ubutabera butegeka uwahamwe n’icyaha kucyambara ku kaguru cyangwa ku kaboko. Aba agomba kugihorana, kuko aho ari hose abakozi b’ubutabera bashinzwe kumukurikirana baba bamureba aho ageze hose.
Kibuza uwakatiwe n’inkiko kurenga imbibi bamuhaye. Ariko umuntu aba yemerewe kwikomereza imirimo asanzwe akora.

Bitewe n’uko umucamanza yabigennye, uwambaye iki gikomo iyo atubahirije amategeko akenshi aba ashobora kujyanwa muri gereza.

Bwana Emmanuel Itamwa, umuvugizi w’inkiko yasabye abacamanza kutihutira buri gihe gukatira abatsinzwe imanza gufungwa, ahubwo ngo batekereze ku bihano bituma umunyacyaha yikosora, ariko adahombeje igihugu. Asanga iki gikomo gikoreshejwe cyatuma abakurikiranyweho ibyaha badatoroka ubutabera. Kuko ngo abacamanza batinya gukatira abantu gufungurwa by’agateganyo kuko akenshi bahita batoroka. Urugaga rw’abavoka ruvuga ko nibura 80 ku ijana by’imanza zicibwa, abacamanza basabwa n’ababuranyi gufungura by’agateganyo, ariko bikanga.
Umwe mu bitabiriye ibyo biganiro yasabye ko niba iki gikomo gihenze, cyatangira gukoreshwa ku bagishaka aho kujyanwa muri gereza. Bityo ugisabye ngo akaba ari nawe wishyura amafaranga akigendaho.

Benshi mu bagize société civile basabye ko igihe kigeze abacamanza bagatangira gutanga ibindi bihano bitari igifungo. Ngo abanyarwanda nabo muri rusange bagomba kumva ko igihano kiza ku wakoze ibyaha atari ugufungwa gusa.
Amategeko y’u Rwanda ateganya ibindi bihano bitari igifungo, harimo gukora imirimo ifitiye igihugu akamaro, TIG. Ubu itegeko yemeza ko iki gihano cyahabwa n’abakoze ibyaha bisanzwe atari jenoside. Harimo kandi igifungo gisubitse, n’ibindi.

Karegeya Jean Baptiste


Tanga igitecyerezo

Who are you?