Yashyizweho kuri 8 August, 2016 | 16:35

Icyemezo cyo kutabasha kwiyishyurira abunganizi kigora abafite imanza mu Rukiko rw’ikirenga

Abaturage baburanira mu rukiko rw’Ikirenga batishoboye bagorwa no gushyirwa mu cyiciro cy’abatishoboye kugira ngo babone abunganizi mu Rukiko rw’ikirenga.Ibi biterwa nuko ibiciro byo kwishyura ababunganira mu rw’ikirenga biba bihenze ku buryo bitigonderwa n’ubonetse wese.

Itegeko rigenga imiburanishirize y’imanza mu Rukiko rw’ikirenga rivuga ko nta muburanyi wemerewe kuhaburanira adafite umwunganizi mu mategeko (avocat). Iyi ngingo cyakora ntiyobohera benshi bitewe n’uko hari abatabasha kubona igihembo cy’umwunganizi ndetse n’amagarama y’urubanza nayo aba agomba kwiyongera ku mafaranga asabwa kugira ngo abashe kujya gushaka ubutabera muri uru Rukiko rusumba izindi mu Rwanda.

Umuturage umwe yavuze ko afite urubanza ariko kubona umwunganizi byamubereye ingorabahizi kuko bamutumye icyemeza ko atabasha kwiyishyurira umwunganizi ntakibone mu nzego z’ibanze. Yagize ati «Nagize urubanza ariko imikirize yarwo ntiyanyura. Nifuje kujuririra mu rw’Ikirenga ariko aho ntuye banyima icyangombwa bavuga ngo ndishoboye nyamara amafaranga umwunganizi yancaga ni menshi ntaho nayakura‘’. Akomeza avuga ko mu Rukiko rukuru nabwo uwamwunganiraga yamwishyuye nabi ku buryo atari kwongera kumwemerera kumufasha mu rw’Ikirenga.

Undi we avuga ko inzego z’ibanze zitiranya ibyiciro by’ubudehe no kubasha kwiyishyurira ukwunganira mu mategeko. N.E aganira n’umunyamakuru yagize ati: «Kwishyura Avoka si nko kwishyura ubwisungane mu kwivuza. Inzego z’ibanze ntizumva ko ushobora kuba wifashije muri duke tw’ibanze mu muryango wawe ariko udashobora kubona ibihumbi za magana byo kwishyura Avoka».
Amabwiriza ashyiraho ibihembo mbonera by’Abavoka yo ku wa 11Kanama 2014 mu ngingo yayo ya 32, avuga ko «Avoka ukurikirana bwa mbere dosiye mu rukiko rw’Ikirenga afite uburenganzira ku gihembo kiri hagati y’amafaranga miliyoni imwe na miliyoni n’igice».

Umuvugizi w’Inkiko mu Rwanda, Itamwa Mahame Emmanuel, avuga ko kuba nta muntu wiburanira mu Rukiko rw’ikirenga ariko itegeko riteye, ariko ngo ntibyakagombye kuba imbogamizi ku baburanyi kuko uzanye icyangombwa cy’uko atishoboye bamwohereza mu rugaga rw’Abavoka bakamuha umwunganizi. Kuba hari abimwa ibyemezo, Itamwa yagize ati: «Si twe (Urukiko) dutanga ibyemezo. Ni inzego z’ibanze. Iyo babona ko utabasha kwiyishyurira umwunganizi mu mategeko baguha icyemezo ukakizana tukakwohereza mu rugaga rw’Abavoka».
Umuvugizi w’Inkiko anemeza ko ushobora no kuzana icyo cyemezo ariko bagera mu nama ntegurarubanza bakagitesha agaciro. Atebya yagize ati «ntabwo wazana icyemezo cy’uko utishoboye nyamara waparitse imodoka hanze ngo tugihe agaciro. Ni ngombwa gushishoza».

Kuba hari amadosiye atinzwa n’abantu bafite ikibazo cy’ubushobozi buke, Itamwa Emmanuel avuga ko adafite ingano y’umubare wayo ariko ko ibibazo nk’ibi bihari ariko bagerageza kubikemura.

Itegeko rishyiraho Urugaga rw’Abavoka mu Rwanda rikanagena imikorere n’imitunganirize yarwo, mu ngingo ya 60 agace ka mbere rivuga ko «Minisitiri ufite ubutabera mu nshingano ze ategura kandi agashyira mu ngengo y’imari ya Minisiteri amafaranga yo gufasha mu by’amategeko abatishoboye n’abandi badashobora kwiyishyurira abavoka».

Dosiye 150 mu mezi atandatu

Uwabashije kubona iki cyemezo Urukiko rw’Ikirenga rukacyemera, Urugaga rw’Abavoka rutangaza ko ruhita rumufasha kuko baba barabyiteguye mbere.
Perezida w’Urugaga rw’Abavoka, Me Kavaruganda Julien Gustave avuga ko buri mwaka bategura Abavoka mirongo itatu (30) bagomba kuburana bene izi manza. Me Kavaruganda yabivuze muri aya magambo: «Hari ikigega Minisiteri y’Ubutabera yashyizeho gifasha kwunganira abantu nk’abo. Twe dutegura Abavoka bafite ububasha bwo kuburana mu Rukiko rw’Ikirenga, dosiye batuzaniye turabafasha».

Umukuru w’Urugaga rw’abunganira abandi mu mategeko avuga ko iyi gahunda ari umwaka wa kabiri bamaze bayikora ku bufatanye na MINIJUST akanavuga ko abakeneye ubufasha nk’ubu atari bake. Me Kavaruganda ati : «Kuva muri Gashyantare 2016 kugeza ubu tumaze kwakira dosiye zigera ku ijana na mirongo itanu (150) kuko mu bunganizi 30 byibuze umwe afite eshanu».

Me Kavaruganda avuga ko hashobora kuba hari n’izindi dosiye zigisuzumwa mu Rukiko rw’ikirenga cyangwa hari n’abatarabona ibyangombwa bisabwa ariko bafite ibibazo byo kwiyishyurira ababunganira mu Rukiko rw’ikirenga kimwe n’uko no mu zindi Nkiko bahari.

MANZI Gérard


Tanga igitecyerezo

Who are you?