Yashyizweho kuri 12 December, 2017 | 19:23

Gutanga indezo ntibihanaguraho icyaha uwahohoteye umwana akamutera inda – Busingye

Mu kiganiro Abasenateri ba Komisiyo ya Politike n’Imiyoborere myiza ya Sena bagiranye na Minisitiri w’Ubutabera mu rwego rwo kumenya no kugenzura imikorere ya Guverinoma mu birebana no kurwanya ihohoterwa rikorerwa abana n’abagore n’irikorerwa mu ngo muri rusange, Minisitiri Johnston Busingye yababwiye ko umuco wo kumvikana mu baturage ubangamira amategeko mu gukurikirana abahohotera abana b’abakobwa.

*Ababyeyi bahishira abahohoteye abana babo ngo barumvikana na bo bakwiye guhanwa*,
*Abasenateri basanze muri buri karere hari abana bari munsi y’imyaka 18 nibura 500 batewe inda.*

Komisiyo ya Politike n’Imiyoborere myiza ya Sena yagiranye ikiganiro na Minisiteri y’Ubutabera ku biro by’iyi minisiteri nyine. Abasenateri batatu bo muri iyi Komisiyo ya Politiki kuri batanu bayigize, nibo baganiriye na Minisitiri bayobowe na Perezida wayo Dr Jean Nepomuscene Sindikubwabo. Dr Sindikubwabo wavuze ibyo Abasenateri basanze mu turere twose tugize igihugu mu ngendo bakoze, ngo basanze nibura muri buri Karere hari abana b’abakobwa hagati ya 500 na 700 bari munsi y’imyaka 18 batewe inda, ariko igiteye inkeke ngo abatageze ku 10% by’abakoze icyo cyaha nnibo bageze mu butabera kandi no muri bo abenshi ntibakurikiranwa kubera kubura ibimenyetso.

Abasenateri bagaragarije Minisitiri ko bimwe mu bibazo bihari harimo icy’abana b’ababyeyi, abarezi, abashinzwe umutekano n’inzego z’ibanze bashyira imbere kunga uwakoze icyaha n’umuryango w’umwana wahohotewe.

Abakobwa na bo ngo babura ababunganira mu nkiko igihe bigeze ku kuburana indezo, ahandi naho urubanza rwaciwe ugazanga kururangiza biratinze.
Hon. Senateri Mukasine Marie Claire yabwiye Minisitiri w’Ubutabera ko basanze abana bahohoterwa n’abo mu miryango yabo, ababarera cyangwa babyara babo, bityo ugasanga ubwumvikane nibwo bashyira imbere, ariko agasaba ko icyaha kigoba kwitwa icyaha.

Minisitiri w’Ubutabera Johnston Busingye yavuze ko Minisitieri y’Ubutabera nayo ihangayikishijwe n’iki kibazo k’ihohotera rikorwa abana, agasaba ko imbaraga zashyizwe mu bukangurambaga bwo kurirwanya mu minsi 16 bazaharanira ko na nyuma yayo bizakomeza.Yavuze ko ibikorwa mu muryango nyarwanda byo kunga uwateye uwahohoteye umwana akamutera inda n’umuryango byitwa ko yahemukiye ari amakosa akomeye kuko ngo usanga ari uguhishira uwakoze icyaha.Ati “Umuntu mukuru wateye inda umwana uri munsi y’imyaka 18 yakoze icyaha, iby’indezo ni ikindi kibazo, guhanirwa icyaha ni ikibazo kimwe agomba kugihanirwa icya kabiri ni ukurera uwo mwana na byo urukiko rurabitegeka rukagena uko bizagenda kandi akabikurikiza nabwo atabikurikiza bigakorwa ku ngufu z’itegeko.”
Minisitiri w’Ubutabera avuga ko kumvikana hagati y’uwahohoteye umwana n’umuryango w’umwana yahohoteye ari ibintu bibi cyane.Ati “Kumvikana birashingira ku mbabazi z’ubwumvikane nyine, icya kabiri nta n’uwumvikana hejuru y’icyaha, hejuru y’icyaha umuntu yakoreye umwana, ubwo bwumvikane bukwiye gutuma umubyeyi wabugiyemo abuhanirwa, bukwiye gutuma umuryango wabugiyemo ubihanirwa, icyaha gikwiye kumenyekana kigakurikiranwa nk’icyaha kikagira inzira yacyo yo gukurikiranwa nk’icyaha.”

Mu byo Minisiteri y’Ubutabera ivuga yabashije gukora, ni ugushyiraho itegeko rikuriraho igarama ry’urubanza umwana wahohotewe igihe yatanze ikirego mu rukiko, ndetse ngo hari urwego rwa MAJ rukorera kuri buri Karere rufasha aba bana mu by’amategeko, kandi ngo n’Urugaga rw’abavoka rufite izo nshingano.
Mu myaka 2016/2017, Minisiteri y’Ubutabera yagaragaje ko urwego rwa MAJ rwakiriye ibibazo 602 by’abagabo bahohotewe, iby’abagore 4 611 bahohotewe (GBV) ndetse rwakiriye ibirego by’abahungu batandatu basambanyijwe ku ngufu n’iby’abakobwa 1721 bahuye n’icyo kibazo.

Imibare iheruka gutangazwa na Minisiteri y’Uburinganire n’Iterambere ry’Umuryango igaragaza ko abana b’abakobwa 17 000 batewe inda mu gihugu hose, Minisiteri y’Ubutabera ikavuga ko yakira ibirego bikiri bike cyane kubera ko abahohotewe bagitinya kuvuga.

H. A. E


Tanga igitecyerezo

Who are you?