Yashyizweho kuri 28 September, 2016 | 08:27

Gufatanya akazi gasanzwe no kunga ntibyorohera bamwe mu bunzi

Umurimo wo kunga ni umurimo ubusanzwe ukorwa n’abunzi, aba ni komite igizwe n’abantu 7,batowe hakurikijwe ubunyangamugayo bwabo. Ikorera ku rwego rw’umurenge n’akagari. Abafite akandi kazi bakora, ntiboroherwa no kunga kuko bibasaba guhora basaba impushya ku kazi cyangw rimwe na rimwe imiterer y’akazi kabo igatuma bataboneka.

Nk’uko bigaragara mu ngingo ya karindwi y’itegeko nomero 37/2016 ryo ku wa 08/09/2016 rigena imitunganyirize, ifasi, ububasha n’imikorere bya komite y’abunzi, abagize Komite y’Abunzi batorwa n’Inama Njyanama y’Akagari cyangwa y’Umurenge bitewe n’urwego barimo. Batorwa mu bantu batari Abayobozi b’ikirenga, abagize Guverinoma, abagize Inteko Ishinga Amategeko, abakozi mu nzego z’ubutabera, abari mu nzego z’umutekano, abakozi bo mu nzego z’ibanze n’abandi amategeko yihariye atabyemerera.

Batorerwa igihe cy’imyaka itanu (5), gishobora kongerwa, bagomba kandi kuba barimo mirongo itatu ku ijana(30 %) by’abagore.

Gufatanya akazi gasanzwe no kunga

Nsanzimana Raphael wo mu murenge wa Kabacuzi mu karere ka Muhanga ni umwunzi. Yamaze imyaka icumi afatanya uwo murimo no kwigisha ndetse no kwiga muri kaminuza. Kugira ngo yuzuze izo nshingano, kuko bateranaga kabiri mu kwezi umunsi wose, ngo” yahoraga asaba impushya”. Ibi kandi binavugwa na Nyabyenda Jean Marie Vianney, umurezi mu mashuri abanza mu murenge wa Kiyumba. Avuga ko ku wa kane wa buri cyumweru, asaba uruhushya ku kazi akajya kunga. Kubifatanya byombi bimusaba gushishoza kuko hari igihe aba yigisha, agashiduka ameze nk’urimo kunga, cyangwa yaba arimo kunga, agashiduka ameze nk’uwibereye mu dukino n’abanyeshuri yigisha.

Ntibyoroshye kubibangikanya. Nk’uko abafite akandi kazi bakora n’umurimo wo kunga babivuga, ngo ntibahura gusa baje "kuburanisha" . habaho guhura kwa komite bategura uko iburanishwa rizagenda, gufata umwanya wo kujya ku kiburanwa... Ibi ngo biragoye ko umuntu usanzwe afite akazi gahoraho, yabifatanya byombi nk’uko bitangazwa na Hitababyaye Jean Pierre umukozi wa RCN Justice et Démocratie umuryango w’ababiligi, utanga ubufasha mu guhugura abunzi, kubaha ibikoresho ndetse ukanakurikirana imikorere yabo umunsi ku munsi

Hitababyaye avuga ko ku bakozi bahoraho bitaborohera kuzuza inshingano zo gukora akazi kabo kabatunze n’ak’uru rwego. Atanga urugero rwa mwarimu, ukenerwa umunsi ku wundi mu ishuri, mu gutegura amasomo no gukurikirana abana, mu nama z’uburezi zitandukanye... Kuko kubona umwanya wo kubikora byombi utaboneka,asanga ngo hari igihe bimwe birengana ,mu gihe amasaha yari abigenewe yahawe inama cyangwa se ugasanga inteko yateranye.

Akomeza avuga ko igihe bamurunzeho inshingano nyinshi,nawe bimugiraho ingaruka, mwarimu nk’umukozi, ukeneye ikiruhuko, ngo yubake ubuzima bwe, ndetse n’umuryango we.

Hitababyaye agira ati" ...usanga mwarimu aboneka yiyibye akanya gato, mu gukemura ibibazo, ariko ahandi agasubira mu ishuri, rimwe na rimwe ,ikemurwa ry’ibibazo rigasubikwa, kuko adashobora kuboneka, nko mu bihe by’ibizamini cyane cyane."

Kuri we, kubangikanya akazi gahoraho n’imirimo yo kunga hari igihe byica kimwe bigakiza ikindi.

Nk’uko itegeko rishya ry’abunzi ribiteganya komite y’Abunzi ku rwego rw’Akagari ifite ububasha bwo gusuzuma ibibazo byose by’imbonezamubano byerekeranye n’ibi bikurikira: Umutungo wimukanwa n’utimukanwa n’izungura kuri iyo mitungo mu gihe agaciro kabyo katarengeje miliyoni eshatu z’amafaranga y’u Rwanda (3.000.000 Frw); kutubahiriza amasezerano yakozwe hagati y’abantu ku giti cyabo, iyo agaciro kayo katarengeje miliyoni eshatu z’amafaranga y’u Rwanda (3.000.000Frw); ibibazo by’umuryango uretse mu gihe igisabwa ari ugufata icyemezo ku irangamimerere y’abantu.

Itegeko rishya rigena imitunganyirize, ifasi, ububasha n’imikorere bya komite y’abunzi ryaje risimbura iryari risanzweho ryari ryagaragaje inenge hamwe na hamwe mu ngingo zirigize.

Uwambayinema Marie Jeanne


Tanga igitecyerezo

Who are you?